Ұлы істер — кішкентай бастамалардан тұрады

Елбасымыз Нұрсұлтан Әбішұлы Назарбаевтың «Болашаққа бағдар: рухани жаңғыру» атты бағдарламасы халқымыздың қызу қолдауына ие болған маңызды жоба.
Көптің көңілінен шыққан бұл бағдарламада «Белгілі бір мақсатқа жету үшін біздің санамыз атқарар істерден озып жүруі, одан барып жаңғырып отыруы тиіс» деген жолдар әр қазақстандыққа оймақтай ой салып, ерекше әсер береді.
Сонымен қатар, мемлекет басшысы рухани жаңғыру – елді елең еткізетіндей тосын жаңалық жасау емес, бабаларымыздан мирас болып қалған ізгі қасиеттерді қайта түлетіп, ұлттық қазыналарымызды қастерлеп, ұрпағымызға игілік пен адамгершілік әкелетін дәстүрлерімізді өркендету екенін баса айтады. Осы орайда жақында Сарыөзек әскери гарнизоны 29108 ә\б командирі, подполковник Алихулов Ерлан Мәулембердіұлының бастамасымен, бөлім командирінің тәрбие және идеологиялық жұмыстары жөніндегі орынбасары, майор Бркенов Нариман Есетұлының ұйымдастыруымен көп балалы әскери қызметшілердің балаларына Шоқан Уәлихановтың мемориалдық мұражайына танымдық саяхат ұйымдастырды.
Бұл іс-шараның басты мақсаты — өскелең ұрпақты өз елінің, туған жерінің тарихын білуге ата-баба әруағына тәу ете білуге, ұлттық құндылықтарды құрметтеуге тәрбиелеу. ХІХ ғасырдың екінші жартысында Қазақстанда туып, демократтық-ағартушылық мәдениеттің тұңғыш өкілдерінің бірі болған шығыстанушы, тарихшы, фольклоршы этнограф, географ, шығыстың жарық жұлдызы атанған, өмірі қысқа болса да артына өмірлік мұрағат қалдырған Шоқан Уәлихановтың мұражайынан көптеген мағлұматтармен танысқан оқушылар алған әсерлерімен өзара бөлісіп, пікірлерін ортаға салды. Олар «Туған жерге туыңды тік» деген сөздің мағынасын ұғып, «болашақта елдің даңқын шығарар азамат болсақ» деген армандарымен бөлісті. Шоқан аталарының мұражайына жасаған саяхат олардың өмірлеріне үлкен әсер еткенін жасырмады.
Ұлы істер – кішкентай бастамалардан тұрады. Ендеше өскелең ұрпақты өз елінің патриоты болуға тәрбиелейтін осындай іс-шаралар біздің бөлімде әлі де жалғасын табады.
Мейрам ОЛЖАБЕКОВ,
29108 ә/б шабуылдаушы артиллериялық
дивизиясының бөлімше командирі.