Жетісу облысында инклюзивті спорт кешенінің құрылысы басталды

Салтанатты шараға облыс әкімі Бейбіт Исабаев, «Қазақстан халқына» қорының Басқарма төрайымы Ләззат Шыңғысбаева, ерекше қажеттілігі бар спортшылар қатысты.

Алдымен жиналған қауымды жаңа инклюзивті нысан құрылысының басталуымен облыс әкімі құттықтады.

— Мемлекет басшысы Қасым-Жомарт Кемелұлы  Тоқаев инклюзивті спорт орталықтарын ашу туралы тапсырма берген болатын. Соған сәйкес бүгін арнайы спорт кешенінің құрылысын бастап отырмыз. Болашақта бұл нысан 22 спорт түрінен кәсіби шеберлікті жетілдіруге мүмкіндік береді. Жалпы, біздің өңірде параспорт қарқынды дамыған. Облыс құрылғаннан бері параспортшыларымыз түрлі деңгейдегі жарыстарда жалпы саны 1300-ден астам медаль иеленді. Мен барлық параспортшыларға өмірдің түрлі қиындықтарына мойымай, спортпен айналысып, Қазақстанның атын шығарып, көк туымызды желбіретіп жүргені үшін үлкен алғысымды айтамын. Біз бұдан былай да параспортты ары қарай дамытуды жалғастырамыз, — деген Бейбіт Исабаев осы жобаға қаржылай қолдау көрсеткен «Қазақстан халқына» қоғамдық қорына шынайы ризашылығын білдірді.

Мұнан соң сөз алған Қордың Басқарма төрайымы Ләззат Шыңғысбаева бұл орталықты салу қолжетімді ортаны қалыптастыру жолындағы маңызды қадам екендігін атап өтті.

— Біз бұған дейін Астана және Қызылорда қалаларында осындай инклюзивті спорт орталықтарын салдық, бүгін үшінші болып Талдықорғанда құрылысы басталып отыр. Бұл жерде тек спортпен шұғылдану ғана емес, сонымен қатар оңалтуға арналған құрал-жабдықтар болады, медицина бөлімдері қарастырылады, өйткені ерекше қажеттілігі бар азаматтар үшін оның өз бекітілген стандарттары бар. Сол сияқты қордың қаржысына Үштөбеде спорт кешені салынады, — деді Л. Шыңғысбаева.

Бұдан әрі ішіне келешек ұрпаққа арналған аманат хаты бар Уақыт капсуласын салу рәсімі атқарылды.

Өз кезегінде парапауэрлифтингіден Қазақстан Республикасының еңбек сіңірген спорт шебері, Рио Паралимпиада ойындарының күміс жүлдегері, Әлем чемпионатының және Қазақстан Республикасының бірнеше дүркін чемпионы Раушан Қойшыбаева:

— Мұндай қолдау бізге, спортшыларға үлкен мотивация береді, күш-жігерімізді еселей түседі. Осыдан бірнеше жыл бұрын Астанадағы паралимпиада жаттығу орталығына кіргенде керемет қызыққан едім. Ондай залда спортшы барлық жағынан ыңғайлы болғандықтан рахаттанып тұрып жаттығу жасайды. Сол кезде бізде қашан салынады екен деп армандап едім. Бүгін, міне, сол арманымыз орындалатын күнге де жеттік. Біз алдағы уақытта да халықаралық ареналарда барымызды салып, елдің намысын абыроймен қорғай береміз, — деді ол.

Салтанатты шара соңында облыс әкімі мен Қор басшысы  спортшылармен тілдесіп, жаңа кешеннің мүмкіндіктері, бұдан бөлек қолға алынатын басқа да жобалар жайлы баяндап берді.

Жалпы ауданы 2 641 м² болатын инклюзивті спорт кешенінде әмбебап спорт залы, мамандандырылған жаттығу алаңдары, күрес және күштік дайындық залдары, оқ ату тирі, садақ ату алаңы, медициналық блок, сондай-ақ жаттығулар, жарыстар мен оңалту іс-шараларын өткізуге қажетті инфрақұрылым қарастырылған. Нысан кедергісіз орта қағидаттарын ескере отырып жобаланған және бір мезгілде 150-ге дейін келушіні қабылдай алады. Ғимарат халықтың жүріп-тұруы шектеулі топтарына бейімделген жолаушылар лифтісімен жабдықталады.

Жобаны іске асыру ерекше қажеттіліктері бар адамдардың спортпен тұрақты түрде айналысуға тартылуына, олардың физикалық және психологиялық денсаулығын нығайтуға, сондай-ақ әлеуметтік бейімделу мен қоғамдық өмірге қатысу мүмкіндіктерін кеңейтуге ықпал етеді.

Атап өтсек, қазіргі таңда облыстағы «Дене мүмкіндіктері шектеулі тұлғаларға арналған спорттық даярлау орталығы» КММ-інде спортшылар спорттың 24 түрімен шұғылданады. Соның ішінде паралимпиалық және паралимпиалық емес, сурдлимпиалық және сурдлимпиалық емес, арнайы олимпиада спорт түрлері бар. Қазіргі таңда орталықта 360 спортшы жүйелі түрде спортпен айналысады. Оның ішінде 287 спортшы — спорттық атақтар мен спорттық разрядтардың иегерлері. Сол қатарда ауыр атлетикадан Паралимпиада ойындарының күміс жүлдегері Раушан Қойшыбаева, грек-рим күресінен Сурдлимпиада ойындарының қола жүлдегері Рамазан Әбдрасіл, парапауерлифтингтен Әлем чемпионы Рахметжан Хамаев сияқты спорт жұлдыздары бар.