Ай дидарлы Астана

Астана –Алаштың алтын алқасы.Аялы алақаны.Айбары.Ары мен айбаты.Сайын сахарада бой түзеген жас Елорда – бүгінгі Қазақстанның келбеті.Астана сәт сайын көркейіп,сыланған сұлу қыздай таралып келеді.Қазақстан да қарыштап даму үстінде.Әр қазақтың аяулысына айналған Астананың биыл жиырма жылдық торқалы тойы таяп қалды.
Әр кезеңде талай ғұламалар дүниеге келтірген ойшылдардан кенде болмаған халқымыздың,атамекеніміздің тағдырдың жазуымен шапқыншылар мен басқыншылардың езгісінде болған бодандықтың қамытын киген кездер ел есінен шығар ма?. Байлығы таланды,бақыты тоналды.Тіпті қазақ деген ғажайып халық жер бетінен жойылып кетуге шақ қалған тұста,бостандық жолында қан кешкен бабалар арманы жүзеге асып еркіндік, бостандық,тәуелсіздікке ие болу бүгінгі ұрпақтың маңдайына жазылды.Азаттықтың ақ таңы арайлап атты.Қазақ елі жоғалтқан бақытын тапты.Етек- жеңін қымтап,есін жиған егемен елдің бірегей ұлдары мемлекет тізгінін қолына алғаннан бастап күндіз –түні шартарапқа шарқ ұрып,қазақ елінің қамы үшін,ұрпақтарының жарқын болашағы үшін ақыл парасатын,күш – жігерін елі үшін жұмсаған Елбасымыздың еселі еңбегі деп қуана айта аламыз.
Қазіргі кезде Тәуелсіздіктің дәмі — таңдайда,бақыты – маңдайда тұрған алтын елге айналдық. Арқа төсінде айбынды Астанамыз жарық жұлдыздай жарқырады.Айта берсек, жанымызды гүлге бөлеп,жанарымызды нұрға толтырған табыстарымызды санап тауысу мүмкін еместей сезіледі.Гүлденген Астанамыз,түрленген жас қаламыз Еуразияны тұтастырып жатқан алтын көпір секілді.Біз әлем назарындағы елге айналдық. Астананың қазіргі күн санап биіктей түскен еңсесінен тәуелсіздігіміздің тегеурінін, еліміздің елдік қасиетін, жасампаздықтың жаңғырығын айқын байқаймыз. Ерке Есілдің жағасында жаңаша сәулеттік нақышпен бой түзеп жатқан әсем қаланың сұлу бейнесі алыстан көз тартып, көңіл баурайды. Астана — жаңа қала. Қалада қазіргі заманғы көптеген сәулет-қала құрылыс жобалары жүзеге асырылуда. Сондықтан, барша қазақстандықтар үлкен үмітпен қарап, бүкіл әлем қызыға көз тігуде.
Астанамыздың 20 жылдық мерейлі тойына орай аудандық және ауылдық кітапханаларымызда «Астана – Отанымыздың жүрегі, Тәуелсіздігіміздің тірегі», атты кітап көрмелері, «Жаса, жайна ару қалам — Астана» айдарымен информ – марафон, «Ай дидарлы, ару қала Астана» атты дивертисмент кеші, слайдтар, флэшмоб ұйымдастырылуда. Елбасымыздың: «Біз жаңа Астананың негізін салдық.Арман қала ақыр – соңына дейін біздің ұрпақтарымызбен,жас қазақстандықтармен жүзеге асырылады.Астана парктері мен өзен жағалауында серуендеп,оның фонтандарын қызықтап және болашақ туралы армандап жүрген кімдер болса да,бұл солардың қаласы.Бұл бостандық туралы ежелден далалық арман мекен еткен қала.Бұл – біздің тарихи жолымызды бастап әкелген және бүгінде осы жол енді ғана басталатын қала.Бұл – біздің жол,Қазақстанның жолы…» деген сөздері – біздің адастырмас бағытымыз бен бағдарымыз.Жайнай бер,Астанам,жаһұттай жас қалам,сен мәңгі асқақ ән.
Г.СОЛТАНҚҰЛОВА,
Аудандық кітапхананың әдістеме бөлімінің менгерушісі.