Егіншіліктегі мол өнім

Бүгінде Сарыбастау ауыл округінде барлығы қырық үш шаруа қожалығы егін шаруашылығымен айналысуда. Аудандық ауыл шаруашылық бөлімінің сектор меңгерушісі Қатжанов Жалғас Мәлікұлымен бірге «Алу-ай» шаруа қожалығына атбасын тіреп, басшысы Қойшыбай Бәзілбайұлымен биылғы түсім жайында әңгімелескен едік.
— Көп  жылдан бері егін шаруа қожалығымен айналысып келемін. Биыл жаз мезгілі  орақ үшін жақсы болды. Былтыр,  биыл жаңбыр мол болған, сондықтан арпа да, бидай да жақсы. 2016 жылы Шымкент «Наз элита» компаниясымен арпа, бидай өнімдерінің түсімін көбейтіп, бидай сұрыптарының сапасын жоғарылату мақсатында келісімшартқа отырдық. Біздің иелігімізде жалпы 56 гектар егістік бар. Биыл күздік бидай аумағы 36 гектар, бір гектардан 30-35 центнерден, ал жаздық 20 гектар арпадан гектарынан 25-30 центнерден өнім аламыз деген үміттеміз. Жалпы шаруашылықта бір комбайын,  трактор және  Газ-53 көлігіміз бар. Бұл шаруашылықпен айналысқалы бері ешқандай жұмысшы алып көрмеппін, өзіміз ағайын-туыс, бауырларым бірлесіп еңбек етудеміз. Еңбек етсе, маңдай терін төксе, шын ниетпен білек сыбана істесе, барлығы болады. Төгілген тер ақталады, — деп сөзін аяқтады.
Бүгінде еңбек етіп жатқан барлық шаруа қожалықтарына қамбаларыңыз астыққа толы болсын дейміз.
Дидар ДИХАНБАЕВ.