Қалдырған ізің мәңгілік…

Елбасымыз Нұрсұлтан Әбішұлы Назарбаевтың «Болашаққа бағдар: Рухани жаңғыру» атты мақаласында «Туған жерге туынды тік» деген бөлім бар. Өскен өңірлерінің атын шығарып жүрген азаматтардың еңбегі елеусіз қалмасын деген ниеттен туған жолдардың маңызы өте зор.
Осы орайда жақында Қарашоқы ауылында «Қалдырған ізің мәңгілік» атты іс-шара боп өтті.
Ұрпақты тәрбиелейтін ұстаз. Қай кезеңде де ұстаз аты ардақталады, ұстаз мәртебесі әрқашан биік және жауапты. Өйткені ұрпақ тәрбиесі бұл бүкіл ұлт тәрбиесі болып саналады.
Қарашоқы орта мектебін 1977-1987 жылы бітірген түлектердің ұйымдастыруымен өткен бұл жылы кездесуде орта мектептің қолданысқа берілген күнінен бастап, сол білім ошағынан алғаш еңбек жолы бастаған мектеп директорларымен ұстаздары бас қосты. Мектеп қабырғасынан қол үзгендеріне талай жылдың жүзі болса датуған жер, ұшқан ұяларына деген риясыз көңілдері, сартап сағыныштары басылмаған түлектердің жан тебіренісін көру қиын емес еді. Осы күнді асыға күткендері, толқыныстары жүздерінен байқалып тұрды. «Ұстаз деген жүректің ұлылығы» десек, олардың алдында шәкірттерінің алғыс пен тағзым етуі бір ғанибет екен.
Өйткені, ұстаз бақыты – шәкіртінің құрметі.
Кездесудің шымылдығы Дүйсенғазы Болатбаевтың орындауында сазгер Әбілахат Еспаетың «Ұстазым» әнімен ашылып, алғашқы сөз кезегін аталмыш мектептің түлегі, бүгінгі күні ауыл әкімі қызметін абыроймен атқарып жүрген Ақбасова Дина Ерасылқызы ашты:
— Қадірлі ұстаздар! Сіздерді осы төл мерекелеріңізбен шын жүректен құттықтаймын. Еліміздің түкпір-түкпірінде жүрген, алайда туған жер, өскен өңірге деген сезімдері өшпеген түлектер! Аяулы ағалар, қадірлі апайлар! Бастарыңыз аман, еліміз тыныш боп, тәуелсіздігіміздің туы желбіреп тұрған сәтте бас қосып отырғандарыңыз үлкен бақыт уақыт жүйрік, заман аумалы-төкпелі. Алайда осы отырған бәріңізде елге еңбек етіп, ұлағатты ұрпақ тәрбиелеп, заман ағымына қарай өмір сүріңіздер. Әрқайсысыңыз бір тұлғасыздар. Сіздердің шәкірттеріңізде сіздер сияқты ұлағатты, саналы, білімді боп өсті. Бұл сіздердің жетістіктеріңіз, жеңістеріңіз. Аман болыңыздар. Бүгінгі жүздесу сіздерге қажымас қайрат пен жасымас жігер, көл- көсір қуаныш сыйласын дей келе бірқатар мұғалімдерді, атап айтқанда Думбергенова Гүлсім Қасымханқызын, Чельменбетова Айгүл Қатымтайқызын, Мырзаханова Жанар Әбубәкірқызын, Алдегенова Гүлбақыт Нұғұмарқызын аудан әкімі Бигелдиев Махаббат Садуақаұлының Алғыс хатымен, Ақбаева Жанна Асқарқызын, Күдербаева Мира Әбдіғалиқызын, Айтбаев Жомарт Бағдаулетұлын ауыл әкімінің «Алғыс хатымен» марапатталды. Осы шарадағы айтулы жақсы жаңалық аяулы ұстаз Салимбаева Күлтай Елтайқызы Қазақстан Республикасы марапаттар мен атақтар кеңесінің «Білім беру саласының үздігі» төс белгісі өңіріне тағып, жерлестерін қуантты.
Сөз тізгінін алған Қарашоқы орта мектебінде әр жылдарда директорлық қызметтерін абыроймен атқарған ауданымыздың Құрметті азаматы «Білім саласының үздігі» Жүсіпов Аманқос Айқуатұлы, Асантаева Фарида Қожамсейітқызы, қазіргі мектеп директоры Бұқабаева Гүлшат Сейдоллақызы қуаныштарын жасыра алмай, ақжарма тілектерін атқарды.
Өз кезегінде сөз алған мектептің бастауыш сынып ұстаздары мен ардагер ұстаздар Шоранбаева Зейпіш Жүнісқызы, Софья Нұржаубайқызы, Ғалия Әубакірқызы шәкірттерге білім мен қоса тәрбие беріп, еліне елеулі, халқына қалаулы азаматтар тәрбиелегендерін мақтанышпен айтып, ұстаздар қауымына өмірдің бар жақсылығын тілеп, осындай кеш ұйымдастырушыларына адами алғыстарын жеткізді.
Жиналғандар осы салтанатты мерекені көру қуанышы бұйырмай, дүниеден озған ұстаздарды 1 минут үнсіздікпен еске алды. Бейнеслайд арқылы марқұм болған жолдастарын көрген қонақтар бір сәт өткен өмір белестері туралы сыр шертіп, сағынышпен еске алып, балалық шақ пен жастық шаққа сапар шеккендей әсерде болды.
Мектептің ата-аналар комитеті атынан ауылдың абыз қариясы, көп жылдар бойы ауылдық мешітте имам болған Омаров Қыдырбек қажы жиналғандарға бата беріп, ұстаздарға арнаған өлеңін оқыды.
Мерекелік шараға арнайы дайындаған концерттік бағдарлама тамашаланып, жиналғандар ауыл әншілерінің өнеріне тәнті болды. Осы ауылдың түлегі танымал сазгер, өнер қайраткері Самат Мәлімбаевтың «Туған жер» атты әнін қонақтар түгел шырқап, шәкірттерінің жетістігіне қуанысып жатты.
Шара соңы ауылдағы «Іңкәр» дәмханасында жалғасып, қонақтар дастархан басында емен-жарқын әңгімелесіп, ақ тілектерін жалғастырды.
Дина АМАНҚЫЗЫ,
«Нұр Отан» партиясының мүшесі