Цифрландыру – үшінші жаңғырумыздың өзегі

Елбасы Нұрсұлтан Назарбаев өзінің былтырғы
Жолдауында, ендігі кезек цифрландыруда екенін айтқан
болатын. Президенттің сөзінше, 70 жыл «пана» болған
одақ тарап, 90 жылдары адамдар жұмыссыз қалып,
кәсіпорындар тоқырап қалған қиындықтан шығуымыз –
бірінші жаңғыруымыз. Одан кейін 2030 жылға дейінгі даму
стратегиямызды әзірлеу – екінші жаңғырғанымыздың айғағы.
Ел болып қалыптасып, төрт аяғымызды тең басқан кезде
біз табиғи ресурстарға сүйеніп отыра беруге болмайтынын
түсіндік. Экономикамызды модернизациялауға белсене
атсалысып, дамудың жаңа мүмкіндіктерін қарастыруға
кіріскенбіз, сөйттік те қоғам өмірін жаңа заманауи
технологияларға бейімдей бастадық. Елбасының атап
көрсетуінше, цифрландыру – үшінші жаңғыруымыздың өзегі
болмақ. Міне, содан бері бұл процесс ерекше қарқынмен
қолға алынып, жүзеге аса бастады. Рас, экономиканы
жаппай цифрландыру – өнеркәсіп пен адамдардың бәсекеге
қабілеттілігін арттырады, білім-білігін шыңдайды. Тек соны
рет-ретімен үйлестіре білу өте өзекті болып тұр. Жақында
ғана Алматы төрінде өткен «Жаһандану дәуіріндегі цифрлы
күн тәртібі» атты форумда Үкімет басшысы Бақытжан
Сағынтаев мемлекет қоғамның цифрландыруға деген
сұранысын әлі де жеткілікті деңгейде қамтамасыз ете алмай
отырғанын айтты. Премьер-министрдің жоспарлауынша,
алдағы уақытта мемлекеттік қызмет көрсетулер жүйесі 80
пайызға электрондық форматқа көшірілмек. Сонымен қатар,
Б.Сағынтаев алдағы 3 жыл ішінде ауыл-аймақты түгелдей
интернетпен қамту қажеттігін де жеткізді.
Тұңғыш Президент – Елбасы Қоры жанындағы Әлемдік
экономика және саясат институтының сарапшысы Айжан
Мұқышбаеваның айтуынша, цифрландыру – ақпараттық
мол ағынға тап болған мемлекеттік органдар мен жеке
сектордың біршама түйткілін тарқатады. – «Сауатты
құрылым мен басқару – үлкен деректердің бағалы
ақпаратқа жол ашуын қамтамасыз етіп, өнімнің өзіндік
құнын төмендетеді. Өндіріс көлемін арттырады. Цифрлық
реформаның тағы бір қозғаушы күші ретінде – халықтың
урбанизациялануын айтуға болады. Қала халқының күн
санап артуы шаһар инфрақұрылымына салмақ түсіруде.
Сөзсіз, бізге қала шығынын оптимизациялау керек. Бұл ретте
«Смарт сити» тұжырымдамасының мәні зор. Цифрландыру
саясаты Қазақстанның үлкен пайдаға кенелуіне әсер етіп,
бизнес үрдістерін оңтайландырады» дейді сарапшы.
Қазіргі таңда «Цифрлы Қазақстан» бағдарламасын
лайықты іске асыру үшін 169 млрд теңге жұмсалу көзделген.
Жоспар бойынша 2025 жылға қарай Жалпы ішкі өнімнің
30 пайызы – цифрландыру жобаларынан құралуы тиіс.
Сәйкесінше, сол жылы осы бағдарламаға қазір салынған
қаражат бірнеше есеге көбейіп, өзімізге инвестиция
есебінде қайтып оралуы тиіс. Жалпы, еліміз цифрландыру
жүйесіне ертерек ыңғайланды, мемлекеттік қызмет жүйесін
де біршама бейімдеп үлгерді. ТМД елдерінің ішінен тұңғыш
болып электронды цифрлы қолтаңбаны қолданысқа
енгізуіміз, Электрондық үкімет порталында электрондық
қызметтерді ұсынуымыз, цифрлы трансформация бойынша
кешенді бағдарламалар құра бастауымыз – сөзіміздің
дәлелі.
Аудан көлемінде айтатын болсақ, цифрландыру
жүйесіне жататын кәсіпорынға Сарыөзек ауылында 2017
жылдың 4 тоқсанында «Риза Май» ЖШС май шығару
зауыты іске қосылды. Қуаттылығы күніне 25 тонна өсімдік
майы шығаратын кәсіпорынның жалпы жобалық құны
350 млн.теңге. Жергілікті тұрғындардан 30 адам тұрақты
жұмыспен қамтылған.
Ә.РЫСБЕКОВ,
аудандық кәсіпкерлік бөлімі.