Қазпошта жаңартылды

     Таяуда Қазақстан Республикасының Президенті Н.Ә.Назарбаевтың 2018 жылдың 10 қаңтардағы «Төртінші өнеркәсіптік революция жағдайындағы дамудың жаңа мүмкіндіктері» атты Қазақстан халқына Жолдауындағы сегізінші міндет цифрлық технологияларды жүзеге асыру бойынша ауданда күрделі жөндеуден өткен Кербұлақ аудандық пошта байланыс торабының орталық операциялық учаскесінде заманауи  «Сәлемдемелер» супермаркетінің ашылу рәсімі өтті.

Бұл іс-шараға аудан әкімінің орынбасары Момбаев Болысбай Тоғысбайұлы, Алматы облыстық Қазпошта акционерлік қоғамының директоры Мұхит Үмбетәліұлы Кәрібаев, аудандық Қазпошта басшысы Борманбеков Қуаныш Жарманбекұлы және тұрғындар қатысты.

Алғашқы сөз тізгінін аудан әкімінің орынбасары Болысбай Тоғысбайұлы алып:

    — Міне, ауданымызда тағы бір жақсы істің басы ашылғалы тұр. Бұл -ауылымыздың күннен-күнге дамып келе жатқанының тағы бір дәлелі.  Қазпошта заманға сай соңғы технологиялармен жабдықталған. Қарапайым халыққа қолайлы. Барлығы электронды түрде, талон алып, кез-келген сұрақтарыңызды тез арада шеше аласыз. Қазпошта есігі әрдайым халыққа ашық, — деді.

Келесі сөз кезегін, Алматы облыстық Қазпошта акционерлік қоғамының директоры Мұхит Кәрібаев:

     — Сіздердің поштаның ғимараты биыл толықтай күрделі жөндеуден өтті. Барлығы цифрлық технологияға сай жасалған. Елбасымыздың даму жолындағы айқын Жолдауының арқасында елімізде, аудандарымызда, ауылдарымызда ғимараттар бой көтеріп, көптеген нысандар толықтай күрделі жөндеуден өтуде. «Цифрлы Қазақстан» мемлекеттік бағдарламасын іске асыру жоспарларына сәйкес атқарылып жатқан игілікті істердің елімізде, аудандарымызда жалғасын таба беруіне тілектеспін, — деп ізгі тілегін жеткізді.

      Аудан әкімінің орынбасары Болысбай Тоғысбайұлы және Алматы облыстық Қазпошта акционерлік қоғамының директоры Мұхит Үмбетәліұлы «Сәлемдемелер» супермаркетінің лентасын қиды.

                                                                                              Дидар ДИХАНБАЕВ. Кербұлақ ауданы.