Жобаға атсалысайық, ағайын!

Біз жесірін қаңғытпаған, жетімін жылатпаған халықпыз. Бірақ, кейінгі уақытта қоғамды дүр сілкіндірген оқиғалар жиілеп кетті. Нәтижесінде қарттар мен жетімдер үйі көбейді. Ата-ана махаббатынан шеттетілген жәудір көздерге мемлекет тарапынан барлық жағдай жасалып жатқанымен, маңдайынан сүйіп, еркелетіп, айналып- толғанатын аяулы жанның алақаны жетіспейді… Ресми деректерге сүйенер болсақ, елімізде 30000-нан астам жетім бала бар. Оның  80 пайызы ата-анасының қамқорлығынсыз қалған балалар. Осындай қоғамдағы келеңсіз жайттарды болдырмау мақсатында, Қазақстан Республикасындағы Бала құқықтары жөніндегі уәкілі, Алматы облысының прокуратурасы және әкімдігімен 2017 жылы «Балалар үйінсіз — Жетісу» атты  жобасына қол қойылып, бүгінгі күнде облыс көлемінде жобаны жүзеге асыру жұмыстары жүргізілуде.

Аталған жобаның мақсаты: 2020 жылға қарай жетім балалар мен ата-анасының қамқорлығынсыз қалған балаларға арналған мекеме тәрбиеленушілерінің 50% астамын отбасыларының тәрбиесіне беріп, соның нәтижесінде аталған мекемелерді, яғни балалар үйін азайтып, ондағы балаларды отбасы мен балалықты қолдау орталықтарына қайта беру.

Кербұлақ аудандық білім бөлімінде жобаны жүзеге асыру жоспары бекітіліп, жоспарға сәйкес жетім балалар мен ата-ананың  қамқорлығынсыз қалған балаларды орналастырудың отбасылық түрлерін дамыту жөнінде ақпараттық-насихаттау, асырап алушы отбасыларын құру, патронаттық тәрбиешілер, қамқоршылар мен қорғаншылар, отбасы үлгісіндегі балалар үйлерін ашқан азаматтардың оң тәжірибесін тарату және т.б. жұмыстарды жүргізу қолға алынды.

Жоба аясында облыс бойынша  2017 жылы жетім балалар мен ата-анасының қамқорлығынсыз қалған балаларға арналған мекемелердің 175 тәрбиеленушісі отбасылық тәрбиеге орналастырылды. Жамбыл, Қаратал, Қарасай аудандарында отбасы үлгісіндегі балалар үйлері ашылса, Еңбекшіқазақ ауданында баланы қабылдаушы отбасы ашылды, сонымен патронаттық тәрбие түрі дамуда. Кербұлақ ауданында аталған жұмыстар кешеуілдеп отыр. Отбасы үлгісіндегі балалар үйін ашу, патронаттық тәрбиеге бала алу мәселелері көтерілгенімен, үміткерлер жоқтың қасы болып отыр.

Жоғарыда айтылғандарды ескере отырып, құрметті аудан тұрғындары, Сіздерді, 2018 жылы «Балалар үйінсіз — Жетісу» жобасын іске асыру мақсатында, әрі ізгілікті істі бастауға, аталған бағытта жұмыс жүргізуге және балалар үйіндегі тәрбиеленушілерді асырап алуға шақырамыз!

Бала асырап алуға, отбасы үлгісіндегі балалар үйін ашуға, патронаттық тәрбиеге бала алуға ниет білдірген аудан тұрғындары Кербұлақ ауданы, Сарыөзек ауылы, Б.Момышұлы көшесі, №12 үй, №12 кабинетке келіп немесе 8(72840)31-4-34, 32-8-68 телефондары  арқылы кеңес алуға болады.

Аудандық білім бөлімінің

қорғаншылық органы.