ТЫНЫШТЫҚ САҚШЫЛАРЫ УАҚЫТ ҮДЕРІСІН ҚОЛДАЙДЫ

Жаңа Конституция жобасының басым жаңалығы – парламент құрылымын өзгерту және өкілдіктің таза пропорционалды моделіне, Құрылтай форматына көшуі. Бұл саяси партиялар арасындағы бәсекені күшейтіп, жекелеген тұлғалардың емес, нақты институттардың бәсекесіне жол ашады. Екіншісі – вице-президент институтын енгізу. Бұл президенттің позициясын едәуір нығайтып, басқару жүйесінің тиімділігін арттыруға мүмкіндік береді. Үшіншісі – некені мемлекет ресми түрде тіркейтін ер мен әйелдің одағы ретінде тану туралы норма. Бұл қағида елдің ұстанымын ұзақ мерзімге бекітіп, отбасы институтын негізгі құндылық ретінде сақтауға бағытталған. Дәл осындай әңгімені «Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының өкілдері ҚР Парламенті Сенатының депутатты Амангелді Есбай өңірлік коалиция өкілдері Серік Мұқанов, Нұрбек Құдайберген мен Асхат Бәзіловтер Кербұлақ ауданындағы №29108 әскери бөлімінде тыныштық сақшыларымен кездесуде сөз етті.
Жиында мінберге көтерілген Амангелді Есбай Жаңа Конституция жобасын саяси жаңғыру үдерісінің заңды жалғасы ретінде бағалап, онда мемлекеттік басқару жүйесін жетілдіру, өкілді органдардың рөлін арттыру және азаматтардың шешім қабылдау процестеріне қатысу мүмкіндігін кеңейту көзделгенін айтты.
– Жаңа Конституция жобасында адам құқықтары мен бостандықтарын мемлекеттің басты басымдығы ретінде айқындау – қоғам дамуы үшін аса маңызды қадам. Құжатта халықаралық құқықтық нормалар ескеріліп, азаматтардың жеке, әлеуметтік және саяси құқықтарын қорғау кепілдіктері айтарлықтай күшейтілген. Сонымен қатар, Конституция жобасы әділеттілік пен заң үстемдігі қағидаттарына негізделіп, отбасы құндылықтарын сақтау, әйелдер мен балалардың құқықтарын қорғауға бағытталған. Адам құқықтарына қатысты нормалардың айқынырақ белгіленуі – құқықтық мемлекеттің маңызды белгісі, — деді Амангелді Есбай.
Ал, Серік Мұқановтың айтуынша, Жаңа Конституция жобасы – мемлекеттің құқықтық және саяси жүйесін заман талабына сай жетілдіруге бағытталған ауқымды құжат. Ол билік тармақтарының өзара тепе-теңдігін нақтылауды, азаматтардың құқықтары мен бостандықтарын қорғау тетіктерін күшейтуді және мемлекеттік басқару құрылымын тиімді етуді көздейді.
– Конституциялық реформа – уақыт талабынан және қоғамның пісіп-жетілген сұранысынан туындаған қажеттілік. Соңғы жылдары азаматтық белсенділік айтарлықтай артты, халықтың құқықтық санасы жаңа деңгейге көтерілді, мемлекетке деген талап та күшейді,- деді спикер.
Әскери қызметкерлермен болған жүздесу өзара пікір алмасу форматында өтті. Қарсы тарап конституциялық өзгерістердің әлеуметтік салаға ықпалы, қоғамдық өмірдегі құқықтық негіздер жөнінде сұрақтар қойып, нақты жауаптар алды.