Тың өзгерістер күтілуде

Міне, жылдағы дәстүр бойынша Қазақстан Республикасының Президенті Қасым-Жомарт Кемелұлы Тоқаев «Жасанды интеллект дәуіріндегі Қазақстан: өзекті мәселелер және оны цифрлық трансформация арқылы шешу» атты Жолдауын халыққа жолдады.

Бұл Жолдаудағы негізгі бағыттар мен бастамаларға тоқталсақ.

Цифрландыру мен жасанды интеллект: Елді үш жыл ішінде толық цифрлық мемлекетке айналдыру — басты стратегиялық міндет. Жолдауда цифрлық даму мен жасанды интеллектіні енгізу экономикалық әрі әлеуметтік жүйелерді жаңғыртудың негізі ретінде ұсынылды.

Аграрлық секторды жаңғырту: Ауыл шаруашылығында цифрлық технологияларды қолдану — өнімділікті арттыру тәсілі. Оңтайлы жер ресурстарын бөлу мен агрохабтарды дамыту қажеттілігі айтылды.

Цифрлық экожүйе және жаңа министрлік: Жолдауда «Цифрлық активтер экожүйесін» қалыптастыру, сонымен қатар Жасанды интеллект және цифрлық даму министрлігін құру туралы тапсырма берілді.

Парламент реформасы — бір палаталы жүйеге көшу: Бұл — заң қабылдауды жеделдетіп, тиімділікті арттыруға бағытталған саяси реформа. Референдум өткізу 2027 жылға жоспарланған.

Логистика мен экспортқа назар: «Смарт-карго» цифрлық жүйесін іске қосып, көлік рәсімдерін жеңілдету — экспорттық мүмкіндіктерді дамытуға бағытталған. Вьетнамнан кейін Ауғанстан мен Пәкістан нарықтарына шығу жоспарлануда.

Индустриялық даму: Алдағы үш жылда кемінде үш жоғары технологиялық кәсіпорынды іске қосу, өңдеу өнеркәсібі мен тау-кен металлургиясын дамыту жоспарында.

Энергетикаға — жаңа серпін: Екінші және үшінші атом электр станциясын (АЭС) жоспарлау басталған. Сонымен бірге, геологиялық барлау мен көмір энергетикасын дамытуда цифрлық әдістерді қолдану міндеттелді.

Биылғы Жолдау — Қазақстанның институционалдық және цифрлық трансформацияға бет бұруға деген нақты бағыты. Оның мәні елдің цифрлық экономикаға, жасанды интеллектке, олардың ауыл шаруашылыктан бастап өнеркәсіпке дейінгі әр салада интеграциялануына, саяси жүйені жаңғырту — бір палаталы Парламент, референдум арқылы қабылданатын реформаларға, экспорт пен логистиканы дамыту, өнеркәсіп пен энергетикадағы жаңа жобаларға, Қазақстанды болашаққа бағыттайтын кең ауқымды, ауқымды әрі жүйелі өзгерістер жиыны.

Асқар Қалиақбаров.

Сарыөзек ауылы.