Алматы облысында «Тәуелсіздік ұрпақтары» грантына құжат қабылдау басталды
Жемісті ғылыми, шығармашылық, кәсіби және қоғамдық қызметі үшін танылған 14-35 жас аралығындағы жастарға ҚР-ның Тәуелсіздік күніне орай Алматы облысы әкімінің «Заңғар-2023» жастар сыйлығын өткізу жоспарлануда.
Қатысу шарттары мен ережелерін баспасөз мәслихаты барысында жастар ресурстық орталығы директорының м.а Досалы Балжан баяндады.
Жастар сыйлығы 15 номинация бойынша өткізіледі және құжаттар белгіленген ережелерге сәйкес 5 желтоқсанға дейін қабылданады.
Сондай-ақ спикер 3 миллион теңге көлеміндегі «Тәуелсіздік ұрпақтары» грантын алудың шарттарына тоқталды. Грант конкурсы ғылым, мәдениет, ақпараттық технологиялар, бизнес және БАҚ 5 бағыт бойынша өтеді. Грант берудің мақсаты белсенді шығармашыл жастарды және олардың жаңа бастамаларына мемлекеттік қолдау білдіру.Өтінімдер мемлекеттік және орыс тілінде 2023 жылдың 1 желтоқсанынан 20 желтоқсанына дейін қабылданады.
«Соңғы уақытта өңір жастарына көңіл бөлу, оларды барынша жан-жақты қолдау ісі ерекше қарқын алды. Үміткер сыйлыққа ұсынылу үшін белсенді, білімді, креативті ойлайтын облыс тұрғыны болуы қажет деді,»-Балжан Досалы
Айта кету керек, өтінім құжаттары баспа түрінде ұсынылуы тиіс. «Заңғар-2023» сыйлығы мен «Тәуелсіздік ұрпақтары» гранты туралы толық ақпаратты облыстық жастар ресурстық орталығының әлеуметтік желідегі парақшаларынан білуге болады.
