Жаңа жыл – жаңа бақыт, жаңа нұр

Жаңа жылдың барлығымызға жаңа үміт, ерекше қуаныш сыйлайтыны мәлім. Балалармен бірге үлкендердің де ерекше күтетін мейрамы екені даусыз. Жаңа жыл қарсаңында «Ескі жыл есіркеп, Жаңа жыл жарылқасын!» деп тілеген ауыл тұрғындары мен қонақтар Жастар алаңына көптеп жиылды.
Аудандық Ә.Сарыбаев атындағы Мәдениет үйінің жүргізушілері – Айдана Мұсағұлова мен Диас Нұрлыбаев:
— Кең болсын қазағымның керегесі,
Кетпесін туыс-туған берекесі.
Баршамызға нұрын шашып келе жатқан,
Құтты болсын жаңа жыл мерекесі,-деп бастап, сөз кезегін аудан әкімі Махаббат Сәдуақасұлы Бигелдиевке берді.
Аудан әкімі:
— Құрметті аудан тұрғындары, қадірменді жерлестер! Бірер сағаттан кейін біздің армандаған Жаңа жылымыз келеді. 2018 жылды Кербұлақ ауданының еңбеккерлері жақсы нәтижелермен аяқтады. Барлық көздеген экономикалық жетістіктерге жеттік. Ауданның қаншалықты резерві бар, ауданның қаншалықты жағдайы барын көрсеттік. Ауданымыз облыс деңгейінде басқа аудандардың қатарында жақсы жетістіктерге жетті. Жоспарлаған, ойлаған барлық тірліктеріміз өз деңгейінде орындалды. Барлық салада, оның ішінде ауылшаруашылық саласында айтарлықтай жетістіктерге жеттік. Егін уақытында орылып, қамбаға құйылды. Өнеркәсіп бойынша инвестиция тартуда да жақсы нәтижелерге қол жеткіздік. Ауданымыз абыроймен 2018 жылды аяқтауда. Адамзат баласы келер жылды үлкен үмітпен күтеді. Алдымызда келе жатқан доңыз жылында арманымыз орындалсын. Елімізде тыныштық болсын! Болашағымыз үлкен жақсылықтарға қадам бассын! Сіздер мен біздер ауданымыздың жақсы көрсеткіштері үшін аянбай еңбек етіп, қызмет жасайық. Өзімнің атымнан, аудан әкімшілігі атынан, Кербұлақ ауданының барлық тұрғынының атынан Сіздерді келе жатқан Жаңа жылдарыңызбен құттықтаймын. Отбасыларыңызға береке-бірлік, бақыт пен шаттық тілеймін. Қуанышымызды осылай бірге бөлісіп, бірге тойлайық. Жаңа жыл құтты болсын!-деп құттықтаған соң марапаттау рәсімін жасады.
Жаңа жыл қарсаңында мерекелік көңіл-күйді қалыптастырып, аудан орталығының әсем безендірілуі негізінде, кәсіпкерлер мен мекеме басшыларын ынталандыру бойынша «Үздік жаңажылдық безендіру» байқауы ұйымдастырылған-ды. Аудан әкімі аталмыш байқау бойынша бірқатар мекеме басшыларын марапаттады. Атап айтсақ, Ынталандыру жүлдесімен Д.Қонаев атындағы орта мектебі, аудандық орталық аурухана, аудандық жұмыспен қамту және әлеуметтік бағдарламалар бөлімі, Сарыөзек орта мектебі, Ә.Сарыбаев атындағы аудандық Мәдениет үйі, сондай-ақ, түнгі жарықтандыру бойынша ІІІ орынды аудандық спорт кешені, ІІ орынды Сарыөзек ауылдық әкімі аппараты, І орынды №49 орта мектебі, Бас жүлдені Күреңбел қазақ орта мектебі иеленіп, бағалы сыйлықтарға ие болды.
Жаңа жыл – жаңа қадам, жаңа бағыт,
Болашақ сыйлайтындай жаңа бақыт.
Доңыз жылы кеп қалды ортамызға,
Жақсылықпен жалғассын жаңа уақыт,-деген жүргізушілер мерекені жалғастырды.
Аудан әкімі Махаббат Сәдуақасұлы Бигелдиевтің аудан тұрғындарына арнаған от шашуын тамашалаған көпшіліктің жаңажылдық көңіл-күйлері артып, ерекше күйге бөленді. Бұдан соң «Күреңбел» квартеті «Жаңа жыл» әнін орындады.
Ассалаумағалейкум, Жыр кешкен ел,
Нарына нарық заман мінгескен ел.
Дәуірдің дүрмегіне үндескен ел,
Тәңірдің тылсымымен бірлескен ел,-деп келген Аяз ата мен Ақшақар Күреңбел өңірі өрендерінің өнерін тамашалады.
Сарыөзек ауылындағы Күреңбел қазақ орта мектебі, Д.Қонаев атындағы орта мектебі, Сарыөзек орта мектебі және №49 орта мектебі, сондай-ақ, «Балдырған» балабақша ұжымы өз сценарийлерімен кезекпен ортаға шығып, сахналық көріністерін қойды.
Мереке жаңажылдық концерттік бағдарламаға ұласты. Онда аудандық Ә.Сарыбаев атындағы Мәдениет үйінің әншілері — «Ақ қар» әнін Жанғазы Жексенбаев пен Ләззат Құсайынова, «Жаңа жыл», «Новогодние игрушки» әндерін Сәуле Қожаханова, «Жаңа жылдық тілек» әнін Ләззат Құсайынова, «Жаңа жыл кеші» әнін Анар Жұмабаева, «Жыламашы жан гүлім» әнін Азамат Үмбетов, Мәулеш Әбжапаров, Оралбек Тұрысбековтер, «Хуторянка» әнін Құралай Ержігітова, «Жаңа жыл» әнін Тілеужан Есерханұлы, «Сен кірме менің түсіме» әнін Оралбек Тұрысбеков пен Айдана Мұсағұлова орындап, көпшіліктің ықыласына бөленді.
Кеш соңы биге ұласты. Жоғары көңіл-күйде болған тұрғындар Аяз ата, Ақшақармен, ертегі кейіпкерлерімен естелікке суретке түсіп, Жаңа жылды отбасында қарсы алмаққа үйді-үйлеріне асығып бара жатты.
Айнаш ҚАСЕНОВА