Жыл үздігі — 2018
Жыл соңында ауданымызда өтіп жатқан мерекелік іс-шаралар саны да арта түсті. Ауданымыздағы мекемелерде, мектептерде жаңажылдық шырша мерекесі өтті. Ерекшелігімен, жаңашылдығымен жиналған жұртты таңғалдырған, қуанышқа бөлеген іс-шаралардың бірі «Жыл үздігі-2018» атты жылдың қорытынды жиыны болды.
Аудандық Ә.Сарыбаев атындағы мәдениет үйінде өткен жиынға қатысушылар саны да көп. Олар ауданымыздың әр ауылдық округтарынан келген үздіктер, жыл бойы қатарынан оза шапқандар.
2018 жыл ауданымыз үшін жақсы, жетістіктерге толы жыл болды. Ауылшаруашылық өнімдерін, сондай-ақ астығымызды дер кезінде жинап алдық. Спортшыларымыз да ауданымыздың даңқын шығарып, шет мемлекеттерде еліміздің туын көкке көтеріп, Гимнін шарықтатты.
Осындай жақсы істердің нәтижесін шығару мақсатында ауданымызда аудан әкімі Бигелдиев Махаббат Сәдуақасұлының бастамасымен алғаш рет әр сала бойынша кәсіби шеберліктерін көрсеткен үздіктер анықталған «Жыл үздігі-2018» мәдени іс-шара болып өтті.
— Биылғы 2018 жыл Кербұлақ ауданы үшін жақсы, игі жетістіктерге толы жыл болды. Аудан әкімі Махаббат Сәдуақасұлы Бигелдиевтің бастамасымен жаңа жыл қарсаңында алғаш рет әр сала қызметкерлері арасында ұйымдастырылып отырған «Жыл үздігі- 2018» мәдени іс-шарасына хош келдіңіздер!- деп мерекелік іс -шараны ашқан жүргізушілер:
— Жер бар ма Күреңбелдей Жетісуда,
Бау- бақша, гүлге оранған қалың нуға.
Төсің ырыс, суыңнан күміс ағып,
Дәуірлеп сен келесің шыңнан шыңға.
Күреңбел, Жетісуда атың бөлек.
Ардақтап ерлеріңді жырға бөлеп,
Келемін, Сен де маған шабыт бердің,
Мәртебең мені әркез жүрді жебеп,-деп өлеңнен шашу шашты.
Мерекелік құттықтау сөз сөйлеп, жеңімпаздарды марапаттау үшін сахна төріне шыққан аудан әкімі Бигелдиев Махаббат Сәдуақасұлы:
— Құрметті аудан тұрғындары! Құрметті әріптестер! Ауданымыз бойынша 2018 жылдың 11 айында ауданның әлеуметтік-экономикалық дамуының маңызды көрсеткіштері, белгіленген жоспарға сәйкес, толығымен орындалды.
Экономиканың барлық салаларында өсім қарқыны тұрақты және табысты аяқталды.
Аудан экономикасының негізгі бағыты бойы осы салада атқарылған жұмыстардың нәтижесінде жалпы өнімнің көлемі 32 млрд. 439 млн. теңгеге жетсе, өнеркәсіп өнімдерінің көлемі үстіміздегі жылы 1 млрд. 684млн. теңгені құрады. Бүгінгі танда инвестиция тарту бағытында ауданда ең ірі инвестициялық жобалардың бірі — «Алацем» цемент зауытының құрылыс жұмыстары қарқынды жүргізілуде.
Аудан бюджетіне 1 млрд. 553 млн. теңге салықтар мен басқа да міндетті төлемдер түсті. Бюджеттің шығыс бөлігі 7 млрд. 210 млн теңгені құрады.
Шағын және орта бизнес субъектілерінің 2018 жылы жалпы өндірген өнімі мен көрсеткен қызметтері 9 млрд. 971 млн. теңгені құрады. Соның нәтижесінде аудандық бюджетке 335 млн. 438 мың теңге салықтар мен міндетті төлемдер түсті.
Бөлшек тауар айналымы 5 млрд. 811млн. теңгеге жетіп, аудан тұрғындарын негізгі тұтынатын әлеуметтік маңызы бар азық-түлік және күнделікті сұранысқа ие тауарлармен толық қамтамасыз етті.
Негізгі капиталға тартылған инвестиция көлемі 8 млрд. 49 млн теңгеге жетті.
Құрылыс жұмыстарының көлемі 5 млрд. 780 млн теңгені құрап, 6 мың 184 шаршы метр тұрғын үй пайдалануға берілді.
Тұрғын үй-коммуналдық шаруашылығы саласында 654 млн. теңге Архарлы, Тастыбастау, Майтөбе, Қаспан, Шанханай, Жаңалық ауылдарының су жүйесі жаңалауға бөлініп, толығымен игерілді,-деген аудан басшысы білім, медицина, құқық, мәдениет саласы бойынша атқарылған жұмыстарға жеке-жеке тоқталып өтті.
Құрметті қауым!
Халқымызда «Өткен жылға өкпе жоқ, келер жылдан үміт көп» деген даналық сөз бар.
Біздің де келер жылы ірі-ірі жобалар мен биік межелерді бағындыруға арналған тың жоспарларымыз бар. Оларды іске асыруда біздің қажырлы еңбегіміз бен ынтымағымыз қажет.
Құрметті мереке қонақтары!
Осы Тәуелсіз жылдарында жеткен жетістіктеріміз баршаларыңыздың халық игілігі үшін жасаған еңбектеріңіздің нәтижесі деп есептеймін.
Жаңа жыл өткен жылдың қорытындысын жасап, атқарылған игі істі саралайтын кезең екендігі белгілі.
Біз қашанда өткенге салауат айтып, болашақтан жақсылық пен үміт күтетін халықпыз. Біздің міндетіміз — аудан халқының әл-ауқаты мен тұрмысын жақсарта отырып, ел экономикасын арттыруда өз үлесімізді қосу.
Алдағы уақытта да еліміздің өсіп-өркендеуіне бағытталған мемлекеттік тапсырмаларды орындауда белсенділік көрсетіп, табысты еңбегімен биік белестерден көріне береді деген сенім білдіремін.
Келе жатқан Жаңа жылдарыңыз құтты болсын! Жаңа жыл жаңа табыс, жақсылық әкелсін!-деп жиналған қауымды мерекелерімен құттықтады.
Кезек марапаттау рәсіміне беріліп, жылдың қорытындысы бойынша «Ауылшаруашылық қызметкері» номинациясымен «Жыл үздігі — 2018» жүлдесі ауылшаруашылық өнімдерін өндірудегі еңбектері және кәсіптік шеберлігі мен ауылшаруашылық саласына қосқан ерен еңбегі үшін «Шоқан» шаруа қожалығы өндірістік кооперативінің басшысы Дәуренбеков Азамат Оразбайұлы, «Спорт саласы» номинациясы бойынша «Жыл үздігі — 2018» жүлдесі Самбодан бес дүркін Азия чемпионы, Индонезия астанасы Джакарта қаласында өткен 18- Азия ойындарының чемпионы, ауданның спорт саласының дамуына қосқан ерен еңбегі үшін Құрышбаева Ділдәш Нариханқызы, «Мемлекеттік қызметтегі үздік әкім» номинациясы бойынша «Жыл үздігі-2018» жүлдесі ауданның әлеуметтік-экономикалық дамуына қосқан үлесі үшін Ақбасова Дина Ерасылқызы, «2018 жылғы ең үздік өнеркәсіптік өнім өндіру кәсіпорыны» номинациясы бойынша «ALACEM», цемент зауытының бас директоры Щербаков Станислав Александрович, «Денсаулық сақтау саласының қызметкері» номинациясы бойынша «Жыл үздігі-2018» жүлдесі Денсаулық сақтау саласының ардагері, ауыл халқының денсаулық сақтау саласына қосқан қажырлы еңбегі үшін Алтынемел ауылдық ауруханасының жалпы тәжірибедегі дәрігері Нұрсапанова Мәншүк Мұқанқызы, «Мәдениет саласы» номинациясы бойынша «Жыл үздігі-2018» жүлдесі ауданда атқарылған мәдени іс-шаралардың көркемдік деңгейінің жоғары дәрежеде атқарылуына қосқан үлесі үшін аудандық мәдениет және тілдерді дамыту бөлімінің басшысы Әділхан Әділжан Әділханұлы, «Білім саласы» номинациясы бойынша «Жыл үздігі -2018» жүлдесі білім саласында көптеген дарынды шәкірттерді тәрбиелеп, аудандық, облыстық, республикалық олимпиадаларға оқушыларды дайындап, оқытудағы орасан зор еңбегі үшін, Қоғалы орта мектебінің қазақ тілі мен әдебиеті пәнінің мұғалімі Өтегенова Бағдагүл Әубәкірқызы, «Үздік мекеме басшысы» номинациясы бойынша «Жыл үздігі-2018» жүлдесі көп жылдар бойы бір салада тынбай еңбек етіп, ауданды электр жарығымен қамтып, ауданның әлеуметтік-экономикалық дамуына қосқан үлесі үшін Сарыөзек аудандық электр жүйелерінің басшысы Ахметов Самат Сағатұлы, «Жастар жылы» қарсаңында,«Жас мамандар» номинациясы бойынша «Жыл үздігі — 2018» жүлдесі аудан көлемінде өткізілген спорттық жарыстар мен жастар саясатын жүзеге асыруда және қоғамдық жұмыстарға белсене атсалысқаны үшін спорт және дене шынықтыру бөлімінің басшысы Дуанаев Еркебұлан Жақанұлы, «Мүмкіндігі шектеулі балалармен жұмыс жасау қызметкері» номинациясы бойынша «Жыл үздігі — 2018» жүлдесі аудандағы мүмкіндігі шектеулі балаларды оқыту және тәрбиелеу, оңалту жұмыстарына сіңірген еңбегі үшін, №9 психологиялық-педогогикалық коррекциялық кабинетінің басшысы Нұрышева Күлшара Ақылбайқызы, «Кәсіпкерлік саласын дамыту» номинациясы бойынша «Жыл үздігі — 2018» жүлдесі ауданда ұйымдыстырылған ауқымды істің басында жүрген жомарт жүрек, жас, жеке кәсіпкер қайырымдылық іс-шараларға белсене араласқаны үшін, «Нұрдуман» жауапкершілігі шектеулі серіктестігінің директоры Айтбай Шаттық, «Қоғамдық ұйым» номинациясы бойынша «Жыл үздігі-2018» жүлдесі ауданның қоғамдық ұйымдарымен елді мекендерде, ұжымдарда мектептерде, бастауыш партия ұйымдарында белсене атқарған көп жылдық ерен еңбегі үшін, аудандық ардагерлер кеңесінің төрағасы Сарыбаев Төленді Оспанбайұлы марапатталып, «Жыл үздігі» болып табылды. Сондай-ақ, еліміздің егемендігінің белгісі — Қазақстан Республикасының Мемлекеттік рәміздерін насихаттау мен қолдануда, тұрғындар арасында патриоттық тәрбие мен отансүйгіштікті қалыптастыруда Кербұлақ ауданы республика көлемінде үздік деп танылып, осы атқарылған істерге қосқан үлесі үшін Алматы облысы әкімінің Алғыс хатымен аудан әкімінің орынбасары Болысбай Тоғысбайұлы Момбаев марапатталды. Дәл сол күні «Мемлекеттік қызметтегі үздік басшы» номинациясы бойынша мемлекеттік қызметте, бір салада тынбай еңбек етіп, ауданымыздың әлеуметтік-экономикалық дамуына қосқан зор үлесі үшін, аудандық экономика және бюджетті жоспарлау бөлімінің басшысы Төлегенов Шалқыбай Молдахметұлына «Жыл үздігі -2018» жүлдесі тапсырылып, зейнеткерлік жасқа жетуіне байланысты иығына шапан жабылды. Осындай құрмет пошта байланыс саласында бірнеше жыл басшылық қызмет атқарып, зейнеткерлік жасқа жетіп отырған Кербұлақ аудандық «Пошта байланыс торабының» бастығы Борманбеков Қуаныш Жарманбекұлына көрсетіліп, иығына шапан жабылды.
«Күреңбел» фольклорлық этнографиялық ән-би ансамблінің құрылу жолындағы қосқан үлесі үшін және ансамбль репертуарына қосқан жаңа әндері үшін белгілі сазгер Бауыржан Аралбекұлы Есебаев пен «Күреңбел» фольклорлық этнографиялық ән-би ансамблінің құрылуына қосқан үлесі үшін және ансамбль репертуарына қосылған жаңа әндердің ерекше өңделгені үшін музыка әрлеуші, сазгер Қуаныш Молдахметұлы Құрманбаевқа аудан әкімінің Алғыс хаты тапсырылып, иықтарына шапан жабылды.
Алматы облысының Құрметті азаматы, Кербұлақ ауданының Құрметті азаматы, аудандық ардагерлер кеңесінің төрағасы Төленді Оспанбайұлы Сарыбаев жиналған қауымды алда келе жатқан мерекелерімен құттықтай отырып, көпшіліке бүгінгідей мерекелік көңіл күй-сыйлаған, аудан әкімі Бигелдиев Махаббат Сәдуақасұлына деген шынайы алғысын жеткізді.
Жаңажылдық мереке Аяз ата мен Ақшақарсыз болмайтыны белгілі. Енді бір сәтте сахна төріне Жаңа жылдың ең сүйікті кейіпкерлері — Аяз ата мен Ақшақар шығып, жиылғандарға мерекелік тілектерін білдірді.
Ауданымызда Тәуелсіздік күні мерекесі қарсаңында ҚР Президенті Н.Ә Назарбаевтың «Болашаққа бағдар; рухани жаңғыру» мақаласы аясында «Күреңбел» фольклорлық-этнографиялық ән-би ансамблінің алғаш тұсауы кесілген болатын. Бүгінгі мерекелік іс-шара барысында «Күреңбел» фольклорлық этнографиялық ән-би ансамблі жиналған қауымға өз өнерлерін көрсетіп, конерттік бағдарламаны Мырзаның «Мереке» күйімен ашқан ансамбль ,жеке аспапта орындаған Нұржан Махановпен қосыла Нұрғиса Тілендиевтің «Әлқисса» күйін орындады. Халықаралық «Бейбітшілік әлемі» өнер фестивалінің Бас жүлдегері Сәуле Қожаханова Нұрсұлтан Әлімқұловтың сөзіне жазылған Садық Кәрімбаевтың «Жетісу» әнін, Абай Сәдуақасұлының сөзіне жазылған Бауыржан Есебаевтың «Ана» әнін, «Күреңбел» квартеті Махаббат Бигелдиевтің сөзіне жазылған Бауыржан Есебаевтың «Біз сізбен біргеміз, Нұр аға!» әнін, «Жырлайды жүрек» байқауының жүлдегері Азамат Үмбетов Махаббат Бигелдиевтің сөзіне жазылған Бауыржан Есебаевтың «Періштеге алтын не керек?» әнін, Оралбек Тұрысбеков пен Айдана Мұсағұлова Бауыржан Есебаевтың әні «Сен кірме менің түсіме»,«Бәріне айтам» әндерін, Азамат Үмбетов пен Мәулеш Әбжапаров Бауыржан Есебаевтың «Жетісуым» әнін, Оралбек Тұрысбеков пен Ақбота Базарбаева Бауыржан Есебаевтың «Кербұлақтың кеші» әнін орындап, көрермендердің ыстық ықыласына бөленсе, ансамбль бишілері Бақтыбайдың әуеніне қойылған би мен орыс биін, «Өзбек биін» билеп, көрермендерін тамсантты.
Ләйлә ЕСКЕНДІРҚЫЗЫ.
