Партия қатарына қабылданды

Таяуда аудандық кітапханада «Нұр Отан» партиясының құрылған күніне орай, «Нұр Отан» партиясы Кербұлақ аудандық филиалының ұйымдастыруымен партия қатарына қабылдау рәсімі өтті.

«Нұр  Отан» партиясы Кербұлақ аудандық филиалы төрағасының бірінші орынбасары Жомарт Саханұлы Бозымбеков:

— Ауданымызда белсенді қыз-жігіттеріміз баршылық. Өз істеріне мығым, жауапкершілігі мол азаматтарымыздың бүгін басын қосып, партия билеттерін тапсырып, мерейлерін үстем ету мақсатында жиын ашып отырмыз.  Партиясыз ешқандай мемлекет жоқ. Кеңес үкіметі кезінде партия қатарына өту оңай болмаған. Ол кезде партияға бір жыл бұрын үміткер болып, еңбек ететінбіз. Жұмыс барысында үміткер бола жүріп, жауапсыздық танытқан болса, ол адам партия қатарына өтпейтін. Партияның ролі зор еді. Бүгінде елімізде партияның абыройы артып келеді. Оның араласпайтын саласы жоқ. Партияға шағымын айтып келген әрбір азаматтың арыз-өтініші қаралып, шешімі табылып жатады. Партия қатарына өткен белсенді жастардың қызмет бабымен өсуі әлдеқайда жеңіл. Білімді де білікті жастардың алдыңғы қатардан көрінуі — бүгінгі күннің талабы, — деп жастарға үлкен сенім артты.

Сөз кезегін алған аудандық мәслихаттың хатшысы Бөкен Қабиұлы Рысбеков және аудандық мәслихат депутаты Еркебұлан Самылтыров «Нұр Отан» партиясының құрылғанына он тоғыз жылдың жүзі болғанын, осы жылдар ішінде көптеген маңызды іс-шаралардың ұйытқысы болғанын, Қазақстанның дамуына партияның қосатын үлесінің зор екенін, жастардың еңбекке, қоғамдық жұмыстарға белсене қатысуы керектігін тілге тиек етіп, жиынға қатысушыларды аталмыш мерекемен құттықтап, партия қатарына өткен азаматтардың абыройлы еңбек етулеріне тілектестігін білдірді.

«Нұр  Отан» партиясы Кербұлақ аудандық филиалы төрағасының  бірінші орынбасары Жомарт Саханұлы Бозымбеков ауданымыздың әр салада еңбек етіп жүрген бірқатар жаңадан кірген партия мүшелеріне партия билеттерін табыстаса, аудандық мәслихаттың хатшысы Бөкен Қабиұлы Рысбеков Сарыөзек  ауылдық округі әкімінің орынбасары Төлегенова Ләйлә Жауымбайқызы мен аудандық жұмыспен қамту орталығының директоры Құрманбеков Мұхит Айтқұрманұлын «Нұр Отан» партиясы Алматы облысы төрағасының бірінші орынбасары Ғ.Сарыбаевтың Алғыс хатымен, сондай-ақ, аудандық мәслихат депутаты Еркебұлан Самылтыров Сарыөзек ауылының Д.Қонаев атындағы орта мектібінің құқық және тарих пәнің мұғалімі Атайбеков Серік  Болатұлын, Сарыбұлақ  ауылдық округінің бас маманы Қонқышев Еркін Мұхаметжанұлын, Басши ауылдық округінің жастар жөніндегі нұсқаушысы Асқамбаева Аида Нұртасқызын «Нұр Отан» партиясы аудандық филиалы төрағасының бірінші орынбасары Ж.Бозымбековтың Алғыс хатымен марапаттады.

Жомарт Саханұлы жиынға қатысушыларды аталмыш мерекемен құттықтап, еңбектеріне табыс тілеп, жиынды қорытындылады.

Айнаш ҚАСЕНОВА.