Алғыс айту — парызымыз

Көктемнің алғашқы күнінде аудандық Ә.Сарыбаев атындағы Мәдениет үйінде Алғыс айту күні және «Нұр Отан» партиясының құрылған күніне арналған салтанатты жиын өтті. Аталмыш шараға ауданымыздың тұрғындары қатысты.

Мерекелік құттықтау cөз аудан әкімі Бағдат Алиевке берілді.

— Құрметті аудан тұрғындары! Алғыс айту күнімен баршаңызды құттықтаймын! Көктемнің алғашқы күні — Елбасының отыз озық елдің қатарына енеміз деген мақсатын алға жетелейтін «Нұр Отан» партиясының құрылған күні және Алғыс айту күні. Осы залда отырған бәріміз — осы партияның мүшесіміз. Бұл партия 1999 жылы бірінші наурыз күні құрылды. Елбасының сарабдал саясатын қолдап, партияның алғашқы насихаттаушысы, қолдаушысы болып, Төленді Оспанбайұлы Сарыбаев екеуміз екі ауданда жұмысымызды бастаған едік. «Нұр Отан» партиясының құрылған күніне тұспа-тұс келіп отырған Алғыс айту күні 2016 жылдың 14 қаңтардағы №173 Жарлығымен қабылданған болатын. Бұл күн — Алладан ағайынның ауызбірлігін, татулығын тілейтін уақыт. Бәле-жаладан аулақ болайық. Қазақстан халқының тыныштығын, Елбасымыздың амандығын, еліміздің ынтымағын тілейміз. Бірімізді біріміз құрметтеп, қастерлеп, ағалық ақылымыз бен аналық тілегімізді қатар алып жүрейік. Алғыс айту күні — жаңа мерекелердің бірі. Әр жерде әрқалай өтіп жатыр. Бұл мерекеден соң Аналар мерекесі, одан соң Наурыз мейрамы тойланбақ. Ұлық мерекелеріміз жалғасын таба берсін. Таңертең тұрғанымызда Алладан еліміздің амандығын, тыныштығын сұраймыз. «Ағайын тату болса, ат көп, абысын тату болса, ас көп» деген, ағайын ынтымақты, абысындар тату болсын. Көршілерімізбен тату болайық. Қара қазан, сары баланың нәсібі таусылмасын. Бәле-жала біздің елден аулақ болсын,-деп ақжарма тілегін айтып, ауданымыздың бірқатар азаматтарын марапаттады. Атап айтар болсақ: «Кербұлақ ауданының Құрметті азаматы» атағы Шешен этно-мәдени орталығының жетекшісі, «Ислам» ШҚ төрағасы Халим Ашахановқа, «Чернобыль атом электр станциясында болған апатқа қатысқаны үшін» төсбелгісі Болатхан Сембаев және Жұмаділ Рахимовқа тапсырылды. Сондай-ақ, «Курень» казак тобы, Шешен, Украин этно-мәдени топтары және «Калинка» этно-мәдени тобы марапатталды.

«Көрші ақысы – тәңір ақысы» дегендей, көршілер атынан Бейбітгүл Шабденова сөйлеп, көршілеріне алғысын айтып, сый-сияпаттар жасаса, Күлсара Рахимова «Туған жер» жобасы аясында үй алғаны үшін Елбасына, аудан басшысына алғыс айтты, сондай-ақ, жеке кәсіпкер Зәгүл Бәзілжанова аудандық аурухана басшысына және оның ұжымына зор алғысын білдірді.

Мерекелік концертте Мәдениет үйінің әншілері – Айдана Жұмабекова, Анар Жұмабаева, Сәуле Қожаханова және оқушы  Кирилл Лубенской әуелете ән шырқап, көптің көңілінен шықты. Концерт жергілікті композитор Бауыржан Шақаровтың «Туған жерім — Күреңбел» әнімен аяқталды.

                                                                                                   Айнаш МӘМІЛЕНҚЫЗЫ