Балалар жазы көңілді

Жаз айлары — мектеп оқушылары үшін ерекше ықыласпен күтілетін уақыт. Жыл бойы сабақ барысындағы, тоқсан арасындағы берілетін  күндер демалыс болып есептелгенімен, жаз кезіндегідей демалыстың мол мүмкіндігін бере алмайды. Бұл уақыт балалардың негізгі сабақтан босап, қызығушылығымен айналысуға мүмкіндік береді. Сондықтан ұстаз — тәрбиешіге оқушының бос уақытын  дұрыс пайдалана  білуді, үйретудің мәні зор.
Жуырда Күреңбел қазақ орта мектебі жанында «Балапан» жазғы сауықтыру лагерінің екінші кезеңі 2 «А», 2 «Ә», 2 «Б», 4 «Ә» сынып оқушыларының қатысуымен жұмыс жасады. Лагерьдің іс — шара жоспары құрылып бекітілді. Алғашқы күннен бастап оқушыларды қарсы алып, лагерьдің күн тәртібімен, қауіпсіздік ережелерімен таныстырдық.
«Балапан» жазғы сауықтыру лагерінің екінші кезеңі директордың тәрбие ісі жөніндегі орынбасарлары М.Қасенова мен Н.Қалыбековтың  басқаруымен әрі ұстаз — тәрбиешілер Г.Құнанбаева, Г.Көмекова, Г.Молдабекова, К.Чинарбаева, ағылшын тілі пәнінің мұғалімі  О.Бондарцева, жаттықтырушы Е.Қабиев, музыкалық көркемдеуші Ж.Еркінбек, медбике А.Көптілеуованың белсенді атсалысуымен қызықты әрі мазмұнды ұйымдасқан түрде өтті. Жұмыс жоспарына сай  ертеңгілік жаттығу, түрлі спорттық, ұлттық танымдық және жергілікті ойындар ұйымдастырып,  алғырлық, тілдік сайыстар, жаттығу сабақтар өткізіп, табиғат аясына серуендеу, сурет салу, өнер байқаулары, концерттік бағдарлама, би кештері  ұйымдастырылды.
Демалуға келген балалардың жас ерекшеліктерін ескере отырып, «Мемлекеттік рәміздер — елдігімнің белгісі», «Ұрпаққа Ұран болған  ұлы ерлік», «ЭКСПО — халықаралық көрме» атты сабақтарда оқушыларға мол мағлұмат берілді. Кербұлақ өңіріндегі аты аңызға айналған батыр бабаларымыздың  өмірі мен ерлік істерін таныту мақсатында оқушылармен «Батыр бабаларым» тақырыбында саяхат сабақ өткізілді. Оқушылар жер атауларына есімдері берілген Дос, Малайсары, Сәмен, Жоламан батырларының өмірбаяндарымен танысып, көп мағлұмат алды.
Г.Көмекова оқушыларға «Сыбайлас — жемқорлық» деген ұғымды, оның пайда болу жағдайларын түсіндіру, өз көзқарастарын білдіріп, дүниетанымдарын кеңейту, адал жолмен жүруге тәрбиелеу мақсатында «Адал ұрпақ — ұлт болашағы»   тақырыбында  мәжіліс залында тәрбие сағатын өткізді.
Дене шынықтыру пәнінің мұғалімі Е.Қабиев оқушылармен «Тоғызқұмалақ» ойынын ұйымдастырып, қазақ халқының дәстүрлі асық ойыны арқылы оқушыларды мергендікке, ептілікке баулып, оның түрлерімен таныстырды.
Оқушыларға  темір жол, теміржолшылар туралы, өз ауылдарында орналасқан ескерткіш туралы мағлұмат беру, таным қабілеттерін арттыру, патриоттық сезімдерін ояту мақсатында — вокзал маңында орнатылған, аты аңызға айналған «Л» сериялы паровоз ескерткішіне саяхат жасадық. Саяхат барысында тәрбиешілер ескерткіштің шығу тарихын айтып, бұл Түрксіб құрылысшыларына, осы өңірдің теміржолшыларына деген құрмет екенін еске салды. Содан кейін оқушылар ескерткіш жанында естелік суретке түсті.
Ата — аналардың демеушілігімен  оқушылар Сарыөзек ауылында орналасқан  «Балапан» ойын алаңына барып, паровоз, құлыншақ, тікұшақ, әткеншектермен ойнап, батутта секіріп, алаңсыз көңіл көтеріп қайтты.
Қазақ халқының ұғымында туған жерден қасиетті ешнәрсе жоқ. Осындай тақырыпқа сурет салу барысында  Қабыл Бекжан, Ақылбек Аяжан, Шыңғыс Камила, Мәмид Әлішер,  Өмірғали Анира ерекше өнер көрсетті.  Еркін тақырыпта шығарма  жазу барысында Құрман Азаттың «Туған жер», Еркін Назеркенің «Жаз жайнатып, күн күлдіріп» тақырыбында жазған шығармалары, ал Тұралы Заринаның «Жаз», Еркін Айдананың «Отан», Дүйсенғали Аружанның «Жазда», Оразбай Аружанның «Отан» туралы   шығарған өлеңдері ерекшеленіп, үздік деп танылды.
Лагерь барысында оқушылар көгалдандыру жұмыстарына да тартылды.
Жазғы сауықтыру лагері бала бойына ұйымшылдық, адамгершілікті сіңіріп, қоршаған ортаны танитын, тәрбиелі азамат болып өсуіне  өз ықпалын тигізетіні сөзсіз. Олай болса, алдағы уақытта  да баланың психологиялық, физиологиялық жағынан жақсы қалыптасуына мүмкіндік мол.
Г.МОЛДАБЕКОВА,
Күреңбел қазақ орта мектебі
«Балапан»  мектеп жанындағы жазғы демалыс лагерінің екінші кезеңіне жауапты тәрбиеші.