Ардагерлер ардақталды
«Қарты бар үйдің — қазынасы бар» дегендей, биыл еліміздегі ең үлкен қоғамдық бірлестік, қазыналы қарияларды бір шаңырақ астына біріктіріп отырған ардагерлер ұйымының құрылғанына 30 жыл толды.
Осы орайда аудан орталығында өткен жиынға облыстық ардагерлер кеңесі төрағасының орынбасары Райхан Қапышқызы, облыстық ардагерлер кеңесінің алқа мүшесі Әбуғали Қойбасұлы Бектеміров, аудан әкімі Бағдат Байшалұлы Алиев және ауданымыздың ардагерлері, бөлім, мекеме басшылары қатысты. Аудандық ардагерлер кеңесінің төрағасы Төленді Оспанбайұлы Сарыбаев аудан ардагерлері ұйымының құрылғанына 30 жыл толуына орай, аудандық ардагерлер кеңесінің атқарған жұмыстары мен міндеттері туралы айтып өтті.
— Ауданымызда зейнеткерлер саны бес мың бес жүз тоқсан төрт, оның біреуі Ұлы Отан соғысының ардагері, мың бір жүз елу алтысы Батыр ана, оның ішінде бес жүз бесі — Алтын алқа иесі, бес жүз жетпіс тоғызы — Күміс алқа иесі. Сонымен бірге ауданымызда жеті жүз он жеті І және ІІ топтағы мүгедек жандар және асыраушысынан айрылған төрт жүз тоқсан тоғыз отбасы бар… Ақсақалды аталарымыз бен ақ жаулықты әжелеріміз артында қалар ұрпағына өзінің көрген-білгенін, оқып-тоқығанын, тәлім-тәрбиесін үйретіп, ата дәстүрімізді дәріптеп, әрдайым жоғары ұстап, жақсы тәрбие беріп, оны үйретуден еш уақытта жалықпаған» дей келе, аудан әкімдігі және аудандық ардагерлер кеңесі тарапынан өткен шараларға тоқталды. Облыстық байқауларға қатысып, жүлделі орындармен оралған шоқандық батагөй ақсақал Нұртай Айдынбаев, малайсарылық Тілеуқабыл Үдербаев және шанханайлық Қозыбек Бақбергеновтің есімін атады.
Облыстық ардагерлер кеңесі төрағасының орынбасары Райхан Қапышқызы: «Сонау 1987 жылы негізі қаланған үкіметтік емес ұйымның алғашқы қадамы, жергілікті басшылықтың, көпшіліктің қолдауын иеленді. Үстіміздегі жылдың сәуір айында ардагерлер ұйымының құрылғанына 30 жыл толды. Осы кезең ішінде қалыптасу жолын өткерген ұйым бүгінде зейнет жасындағы жандардың дербес бірлестігі ретінде іргесін нық бекітті. Облыстық және аудандық ардагерлер ұйымы еліміздің бірлігі мен ынтымағына, экономика мен әлеуметтік дамуына, жастардың адамгершілік және патриоттық рухта тәрбиелеу жолында сүбелі үлестерін қосып келеді. Жастарды патриоттық рухта тәрбиелеуге зор еңбек сіңірді. Бүгінгі мерекеде өздеріңізбен жүздескенімізге қуаныштымыз» дей келе, ақ тілегін айтты.
Аудан әкімі Бағдат Байшалұлы Алиев аудан ардагерлерiн айтулы мерекелерiмен құттықтап: «Өмірде аянбай еңбек етiп, ауданымыздың гүлденуiне сүбелi үлес қосқандарыңыз үшiн сiздерге алғыс айтамыз. Сiздердiң өнегелі істеріңіз бен өмiрлiк бай тәжiрибелерiңiз — өскелең ұрпаққа үлгi. Сiздерге денсаулық, ұзақ та мағыналы ғұмыр тiлеймiн» деген ақжарма тілегін айтып, марапаттау рәсімін жасады. Арнайы шақырылған аузы дуалы қариялардың барлығы да Алғыс хаттар мен бағалы сыйлықтарға ие болды.
Жиын соңы табиғат аясында орналасқан дәмханада жалғасын тапты. Өмірден көргені мен түйгені, тоқығаны мен білгені көп дана қариялар дастархан басында емен-жарқын әңгімелесіп, әзіл-қалжыңы жарасып отырды. «Бүгінгінің қартымыз, кешегінің артымыз» деген ардагерлер — облыстық ардагерлер кеңесі төрағасының орынбасары Р.Қапышқызы, облыстық ардагерлер кеңесінің алқа мүшесі Ә.Қойбасұлы, Сарыөзек ауыл округі ақсақалдар кеңесінің мүшесі К.Айманбайқызы, Басши ауыл округі ақсақалдар кеңесінің мүшесі Ғ.Тұрғанбайұлы, Қаспан ауыл округінің ақсақалдар кеңесінің төрағасы Қ.Нұрсапаұлы, Қоғалы ауыл округі ақсақалдар кеңесінің төрағасы Қ.Машанло, Сарыөзек ауыл округі ақсақалдар кеңесінің мүшесі С.Самархановтар бүгінгі мерекемен құттықтап, басынан өткен қызық жайттармен бөлісіп, аудан әкімі Бағдат Байшалұлы мен аудандық ардагерлер кеңесінің төрағасы Төленді Оспанбайұлына алғыстарын айтты. «Өнегелі қарт жоқ жерде, өнерлі бала да жоқ» дегендей, ауданның Құрметті азаматтары ақ тілектерімен бірге әсем әндерін жолдап, қошеметке ие болды.
Қадірлі қарттармызды құрметтеу барысында аудандық Ә.Сарыбаев атындағы Мәдениет үйінің өнерпаздары әсем ән мен тәтті күйге бөлеп, үлкендердің батасын алды.
Айнаш ҚАСЕНОВА.
