Конституцияға енгізілген ең маңызды өзгерістердің бірі – суперпрезиденттік басқару моделінен бас тарту. Мемлекет басшысының өкілеттіктері қайта қаралып, Парламенттің рөлі мен жауапкершілігі арттырылды. Бұл – халықтың үнін естуге, қоғамдық пікірмен санасуға және биліктің барлық тармақтары арасындағы тепе-теңдікті сақтауға мүмкіндік беретін маңызды қадам.
Сондай-ақ, Ата Заңда адам құқықтары мен бостандықтарының қорғалуына ерекше назар аударылды. Адам құқықтары жөніндегі уәкілдің мәртебесінің конституциялық деңгейге көтерілуі, өлім жазасының мүлдем жойылуы және Конституциялық соттың құрылуы – еліміздің халықаралық құқықтық стандарттарға бейілдігін көрсетеді. Бұл институттар азаматтардың бұзылған құқықтарын қалпына келтіруде және әділдікті орнатуда тікелей қызмет атқарады.
Жаңа Конституция – тек құжат емес, бұл қоғамның жаңа келісімі. Әрбір азамат өз тағдырына және мемлекеттің дамуына жауапты екенін сезінуі тиіс. «Жаңа Қазақстан» ұғымы әлеуметтік әділдік, заң үстемдігі және ашықтық қағидаларына негізделеді. Реформалардың түпкі мақсаты – азаматтардың әл-ауқатын арттырып, мемлекеттік басқарудың тиімді әрі айқын жүйесін қалыптастыру.
Ата Заңымызға енгізілген өзгерістер еліміздің орнықты дамуына жол ашып, әрбір қазақстандықтың болашаққа деген сенімін нығайтады. Құқықтық мемлекет құру – бұл үзілмейтін процесс, ал жаңа Конституция осы үдерістің берік іргетасы болып қала береді.
Аяулым Жалбенова