Ұстаздар күніне орай аудандық партия филиалының төрағасы Г. Камамбаева білім беру саласында саналы ғұмырын арнап, талай жыл бойы жас ұрпаққа білім мен тәрбие беріп, зейнеткерлікке шыққан ардақты ұстаз Үсімбекова Жібек апамыздың шаңырағына арнайы барып, мерекесімен құттықтады.
Кездесу барысында Г. Камамбаева ұстаз еңбегінің қоғамдағы маңызына тоқталып, Жібек апамыздың білім саласына қосқан үлесі мен шәкірт тәрбиесіндегі еңбегін ерекше атап өтті.
«Ұстаздық – жай ғана мамандық емес, бұл үлкен жүректі, зор жауапкершілікті қажет ететін қасиетті жол. Сіз секілді бар ғұмырын ұрпақ тәрбиесіне арнаған ұстаздардың еңбегі әрдайым құрметке лайық. Сіздің берген біліміңіз бен тәліміңіз талай шәкірттің өмір жолына бағыт-бағдар болды. Еңбегіңіз үшін шынайы алғысымызды білдіреміз. Сізге мықты денсаулық, отбасыңызға амандық, ұзақ ғұмыр тілейміз!» – деді Г. Камамбаева.
Ардагер ұстаз Жібек апамыз жылы лебізге ризашылығын білдіріп, ізгі тілектерін жеткізді.
Ұстазға көрсетілген құрмет – білім мен тәрбиенің қадірін бағалау, ұрпақ алдындағы еңбекті ұлықтау.