Талдықорғандағы Дәнеш Рақышев атындағы облыстық филармонияда өткен әншілер байқауына Жетісудың аудан-қалаларынан 16-35 жас аралығындағы 29 әнші екі номинация, атап айтқанда, дәстүрлі ән және эстрадалық ән бойынша сайысқа түсті.
— Ақынның сан алуан тақырыптағы өлеңдеріне ән жазған композиторлар санында есеп жоқ. Сол әндер бүгінде ел игілігіне айналып, ұрпақтан-ұрпаққа жалғасып келеді. Байқауды өткізуде Мұқағали Мақатаевтың өлеңдеріне жазылған әндер мен жаңа орындаушыларды анықтап, жастар арасында өнерге деген құштарлықты арттыруды, ақын мұрасын кеңінен насихаттауды мақсат етіп отырмыз, — деді облыстық мәдениет, архивтер және құжаттама басқармасының басшысы Қуаныш Сүлейменов.
Бұл ретте байқаудың іріктеу кезеңіне өңірдегі руханият саласында қажырлы еңбек етіп жүрген азаматтар қазылық етті. Байқау бұдан әрі жүлдегерлерді марапаттау мен гала концертпен жалғасады.
Ақынның туған күніне орайластырылған мәдени шараның бірі – «Мұқағали» моноспектаклі. Қойылымның басты кейіпкерін қоюшы режиссері, актер, ҚР Еңбек сіңірген қайраткері Сафуан Рысбайұлы сомдады. Спектакль эксперименттік жоба ретінде Б. Римова атындағы академиялық драма театрының фойесінде қойылды.
Спектакль режиссерлерінің бірі Ұлан Ахметовтің айтуынша, моноспектакль ақынның жан айқайын, махаббат пен мұңға толы әлемін, өмір мен уақыт жайлы терең толғанысын поэзия тілімен өрнектейді. Қойлымның ұзақтығы — 45 минут, ол ақынның өмірі мен шығармашылығын танытатын бес кезеңге бөлінген.
Атап өтсек, қойылым режиссерлері – Ұлан Ахметов, Сафуан Рысбайұлы, композиторы – Тұрсынжан Шапай. Ақын рөлінде: Сафуан Рысбайұлы, сол сияқты рөлдерде Дархан Дүйсенов, Күнекей Мұхтархан, Ариза Асқарова, Қарақат Шындәулет, Әсем Мұратова ойнады.
Жетісу облысы әкімінің баспасөз қызметі