Шеберлік ойында шыңдалады

Елбасымыз Н.Ә.Назарбаевтың «Рухани жаңғыру» мақаласы аясында
әрі жасөспірімдердің денсаулығын нығайтып, спорттық шеберлігін шыңдау
мақсатында таяуда Қарашоқы орта мектебінде 2002-2003 жылы дүниеге
келген жасөспірім ұлдар арасында волейболдан аудандық турнир өтті.
Турнирге аудан мектептерінен оншақты команда қатысып, өздерінің
шеберлік деңгейлерін байқап, мықтыны анықтады.
Аса тартысты өткен ойындар барысында бабы мен бағы қатар
шапқан Аралтөбе мектебінің (Кербұлақ) волейболшылары жүлделі
1-орынды жеңіп алды. Тағы бір ерекше атап өтерлігі, бұл команда
мүшелері ойын барысында боймен емес, оймен, еппен, ұжымдасып ойнау
үлгісін көрсетті. Екінші орынды Ш.Уәлиханов атындағы орта мектебінің
түлектері, ал үшінші орынды Самат Батымбетов пен Қалымбет Нұржан
баптаған Қарашоқы орта мектебінің командасы жеңіп алды. «Жүзден —
жүйрік, мыңнан — тұлпар», «Алуан-алуан жүйрік бар, әліне қарай шабады»
демекші, турнир барысында Мұқаш Нұрсұлтан, Омаров Ақжол, Әбдібек
Мағжан, Тоқтар Алмат, Қабден Әли, Өмірғалиұлы Елжан, Байтұрсын
Аслан, Алпысбай Әлинұр сынды спортшылар волейбол спортының қыр
— сырына қаныққан, кәнігі спортшылар екенін көрсете білді. Жеңімпаз
командалар мен шеберлігімен көзге түскен ойыншыларға «Мадақтама»
қағаздары мен арнайы кубоктар табыс етілді. Аса жоғары ұжымдық
деңгейде өткізілген бұл шараның жас спортшылар шеберлігін шыңдауда
үлкен іс-тәжірибе болғандығы даусыз.
Самат ТУГУМБАЕВ,
Қарашоқы орта мектебі директорының тәрбие ісі жөніндегі
орынбасары