«Патриоттық клуб» ұйымының мүшелері толығуда

Қаспан орта мектебінде өскелең жас ұрпақты отансүйгіштікке, Отанның нағыз патриотын тәрбиелеу мақсатында 5-сынып оқушыларынан құралған «Кадет» сыныбының салтанатты ант қабылдау рәсімі болып өтті. Салтанатты жиын Мемлекеттік Гимнмен басталды. Салтанатты жиынға: ауыл әкімі Досалбаев Ермек Сарқытбайұлы, Ауған соғысының ардагерлері, өзге де мектептердің АӘД пән мұғалімдері мен ата-аналар қауымы шақырылып, жиынның құрметті қонақтары болды. Кеш қонақтары мектепте кадет сыныбының ашылуымен құттықтап, оқушыларға ізгі тілектерін білдіріп, антқа берік болуға шақырды. Сөз соңында мектеп директоры Ешкенов Дастан Есіркесінұлы сөз сөйлеп, өз талабын білдірді.
— «Патриоттық клуб» ұйымына қабылдана отырып, сендер, Отанның нағыз патриоты, оқуда озат, тәртіптің үлгісін көрсетер жас ұрпақ, антқа берік бола білулерің тиіс,-деді.
Ант қабылдау барысында оқушылардың бойынан патриоттық сезім мен жауапкершілік сезіліп қана қоймай, оны өн бойларына сіңіргендігі, қонақтардың бойындағы патриоттық сезімді оята білуімен көрініс тапты. Саптық дайындық элементтерін көрсету барысында оқушылар еш мүдірмей, әскери тәртіптің үлгісін көрсете білді. Ант қабылдау рәсімі патриоттық рухта мерекелік кешпен жалғасын тапты.
Кеш соңында ата-аналар ұжымы өз балаларының «Кадет» сыныбына қабылданғанын қуанышпен жеткізіп, жиынның жоғары деңгейде өткенін тілге тиек етіп, мектеп әкімшілігіне алғыстарын айтты.
Оқушылар қауымы өздерінің кадет сыныбында оқитындарын мақтанышпен айтып, алдағы уақытта барлық ережелерге сай болатын тәртіпті, үлгілі, Отанның нағыз патриоты болатын өскелең ұрпақ болуға ұмтылатындарын мақтанышпен жеткізді.
Н.БАЙМҰҚАНОВА,
ағылшын тілі пәнінің мұғалімі;
Б.ЛАХАНОВА,
математика пәнінің мұғалімі,
Қаспан ОМ МДШО КММ.