Жұмыла көтерген жүк жеңіл

Елбасының «Болашаққа бағдар: рухани жаңғыру» атты мақаласы елімізде кең қолдау тауып, жер-жерлерде игі шаралардың жүзеге асуына мұрындық болуда. Осы орайда, ауданымызда туған жерлеріне тағзым етіп, ауылдарына түрлі нысандар тұрғызып беріп жатқан азаматтарымыздың саны күннен-күнге өсіп келе жатқаны көңіл қуантады.Жеке кәсіпкер Хасан Абуевтың салған мешітін,мектебін, қатымханасын бүгінде

халық игілігіне пайдалануда. Осындай нысандарды, атап айтқанда арка,құда күтетін орын, аялдаманы Қызылжар ауылының бұрынғы түлектері ауылдастарына сыйға тартса, басшилік Гөзел Құлжабаева еккен «Нұрғали Нүсіпжанов атындағы бағы» мен «Аналар саябағы» ауылдың көркіне көрік қосып, көркейте түскен. Бұл ауылда «Алтынемел»мемлекеттік ұлттық табиғат паркінің бас директоры Халық Баяділов бұрынғы шаруашылықтан қалған ғимаратқа күрделі жөндеу жұмысын жүргізіп, жастарға спорт кешенін тарту етсе , Қызылжар ауылының азаматы Ержан Әшімұлы, Қарашоқылық Дина Ақбасова ескі кафені қалпына келтіріп, бүгінде халыққа қалтқысыз қызмет атқаратын орындарға айналдырды. Міне, осындай игі шаралардың тағы бірі бүгінде Басши ауылында жүзеге асты. Осыдан үш ай бұрын ауыл жастары жиналып, мешіт жанынан асхана салу туралы ұсыныстарын ортаға салған екен. Игілікті бастама жалпы тұрғындар жиынында мақұлданып, бірден қолдау тауыпты.

Бүгінде ауылдың үлкен-кішісінің ат салысуымен 300 орындық асхана бой көтеріп, ауылдың ажарын ашты, сәнін арттырды.
Ауыл тұрғындары 30 қыркүйек күні асхананың ашылу салтанатын жасады. Жаңа салынған асхана жанында жиналған жұрттың қарасы көп. Бір-біріне құтты болсын айтысқан жұрт қуаныштарын жасыра алатын емес. Ақ сақалды аталарымыз бен ақ жаулықты аналарымыз бірін-бірі толықтырып, қатарласа отырып, бір мезет ауданнан келген қонақтардың, ауыл белсенділерінің құттықтауларына құлақ түрді. Алғашқы сөзді алған аудандық мәслихат төрағасы Бөкен Қабиұлы Рысбеков жиналғандарды қуаныштарымен құттықтаса, аудан әкімінің құттықтауын жеткізген аудан әкімінің орынбасары Болысбай Тоғысбайұлы Момбаев:
— Құрметті ауыл тұрғындары! Ел мүддесін бәрінен биік қоятын, өзінен кейінгі ізінен ерген ұрпағына ұлылығын ұялатқан игі жақсылар осы ауылда көптеп саналады.Оны өздеріңізде білесіздер. Бұл ауыл ауыз-бірлігінен ажырамаған ауылдардың бірі екенін бүгінгі мына ашылып отырған асхана дәлелдей түспек. Осындай игілікті істің басы-қасында жүрген барлық азаматтарға алғыстан басқа айтарымыз жоқ,-деп ауылдың аузы дуалы, сөзі берекелі, ісі тыңғылықты, ақылы мен парасаты телегей -теңіз ауыл қарттарын алда келе жатқан қарттар күнімен құттықтады.Ауыл әкімі мен қоғамдастық тарапынан асхананы салысуға ат салысып, белсенділік танытқан азаматтар «Алғыс хаттармен» марапатталып,сый-сияпаттар табыс етілді. Ауданымыздың «Құрметті азаматы», ауылдың сыйлы қариясы Ғалым Тұрғамбайұлы бүгінгі игілікті шараның жүзеге асуына ат салысқан,ауылдың бірлігі мен ынтымақтастығының мызғымас беріктігін паш еткен азаматтарға шынайы алғысын білдірді. Ауыл қариясы, осы істің басы-қасында жүріп, аталық ақылын айтып, білгенімен бөліскен Жақыпбек Өмірбеков өз отбасы атынан осы асхананы салысуда белсенділік танытып, еңбек сіңірген ауыл азаматтары мен азаматшаларына, өз үлесін қосқан демеушілерге арнайы дайындап әкелген сыйлықтарын тапсырды. Кезек лента қию рәсіміне беріліп, аудандық мәслихат төрағасы Бөкен Қабиұлы, аудан әкімінің орынбасары Болысбай Тоғысбайұлы, ауылдың құрметті ақсақалы Ғалым Тұрғанбаев пен «Алтынемел» мемлекеттік ұлттық табиғат паркінің бас директоры Халық Баяділов жаңа асхананың лентасын қиды. Асхана ішінде сол күні ғимараттың ашылу салтанатына орай арнайы дастархан жайылды. Дастархан басында да жиналған жұрт бір-біріне деген алғыстарын айтып, ризашылықтарын білдірісіп жатты.Айта кету керек, асхана ішінде 300 кісіге арналып қойылған столдар мен отыратын орындықтарды ауыл тұрғындары өз қолдарымен жасапты. Аппақ етіп жайылған дастархан ,күнмен шағылыса тербеліп тұрған терезе перделер де жаңа салынған ғимарат ішіне әсемдік силағандай. Ал осы әдемілікке ауылдың барлық үлкен-кішісі ат салысыпты.
-Асхананы заманауи талапқа сай ыдыс-аяқ, керекті жиһаздармен жабдықтауға ауыл тұрғындарының барлығы ат салысты. Ешкім шет қалған жоқ,- дейді ауылдың ақсақалы Жақыпбек Өмірбеков ақсақал.
— «Алтынемел» мемлекеттік ұлттық табиғат паркінің бас директоры Халық Оңғарұлы Баяділов осы игілікті шараға қомақты үлесін қосып, бір жылқысын сойып беріп отыр. Және өз мекемесінің атынан асханаға көрімдік ретінде 100000 теңгесін берді. Басқа ауыл тұрғындары да қарап қалып жатқан жоқ, шамалары келгенше үлестерін қосып жатыр.Ауылдың ынтымағын осыдан-ақ көріңіз,-дейді Жақыпбек қария. Қарияның ұлы Сайлау осы асхананың салынуына 500 мың теңге көлемінде қаржылай көмек жасап, жомарттығын танытқанын да ауылдастары жарыса жеткізді.
Халықты ұйытып, елдің береке-бірлігін баянды ететін орынның бірі, аталмыш асхананы салуға ат салысқан азаматтарға Алланың нұры жаусын дей отырып,осы ғимараттың жақсылықтың темірқазығына айналуын тіледік. Біріміз бастаған игілікті істі екінші біріміз қолдап, жалғап кетіп отырсақ, алынбайтын қамалдың болмайтынын, яғни талай игілікті істердің жүзеге асары сөзсіз екенін небәрі үш айдың ішінде бой көтерген мына ғимарат дәлелдей түскендей. Ауызбірлігі кетпеген, ынтымағы жарасқан Басши ауылында тағы талай келелі істердің атқарылатынына шүбәміз болмай, ауылдан сеніммен аттандық.
Ләйлә ЕСКЕНДІРҚЫЗЫ.