Жазғы демалысты ұтымды ұйыдастыру

Жазғы демалыс- балалар үшін күш жинау, шығармашылық мүмкіндіктерін шыңдау.
Сондықтан да балалардың демалысына аса зор көңіл бөлініп оны ұйымдастыру әрбір азаматтың,ата-ананың, ұйымдардың міндеті. Еліміздің ертеңі, келешек ұрпақтың, болашағы жарқын болсын десек-жас буынға тәлім-тәрбиемен қатар дұрыс ұйымдастырылған демалыс қажет.
Жаз айлары-балалар үшін ерекше көңілмен, ықыласпен күтілетін уақыт. Балалар да, үлкендер де жаз айларының жылы күндерін аңсап күтеді Тоқсан сайын берілетін демалыс күндері балаларға жазғы демалыстай бола алмайды, өйткені жаз айы өзінің ерекшелігімен сипатталады.Күннің ұзақтығы,көкорай шалғындық, түрлі гүлдер, көкпенбек көлдің жағасы және де еркіндік. Жаз айлары балалар үшін ең тамаша кез емес пе? Ал оны сағына күтпейтін бала бола ма? Балалар жақсылап тыныққысы келеді, ал ата-аналар алдында ұзақ оқудан, қиын емтиханнан шаршаған баласының демалысын қалай ұйымдастыру керек деген дәстүрлі сұрақ көлденеңдейді.
Бұл уақыт табиғатпен ерекше үндестік тауып, дүниетаным аясы кеңитін, көзқарас қалыптасып, үйренуге ықыласы артатын жылдың тамаша мезгілі. Міне осындай тамаша кез балаларға келіп жетті. Ауданымыздағы көпбалалы аналардың, аз қамтылған отбасы балаларының жазғы демалысы аудандық кәсіподақ ұйымының ұйымдастыруымен Панфилов ауданындағы «Көктал – Арасан» сауықтыру кешенінде өткізілді. . Аудандық кәсіподақ ұйымынан 500 мың тенге бөлініп, 20 балаға тегін жолдама берілді. Жаркент тауының бөктерінде орналасқан демалыс лагері жасөспірімдердің ақыл –ойын тынықтыруға, күш-қуатын арттыруға, күнге күйіп, шынығуына мүмкіндік берді.
Демалып келген балалардың айтуы бойынша демалыста түрлі қимылды ойындар, сонымен қатар рөлдік, спорттық танымдық ойындар, көптеген іс-шаралар өткізілді .Туған өлкені тану мақсатында тарихи жерлерге «Киелі ағашқа», «Жаркент» қаласына саяхат жасалды.
Емін-еркін демалған балалар жаңа достар тапты. Жазғы демалыста жинаған күшін, барлық жігерін оқушылар жаңа оқу жылында білім алуына пайдаланады деп ойлаймыз.
Ж.ДУАНАЕВ,
Аудандық білім қызметкерлері кәсіподақ комитетінің төрағасы.