Туған жер ыстық әрқашан

Жақында Сарыөзекке кіреберісте «Нұр Отан» партиясы аудандық филиалының қызметкерлері жерлесіміз, атақты спортшыларымыздың бірі – Азамат Мұқановты қарсы алды.
Аудандық Ә.Сарыбаев атындағы Мәдениет үйінің әншісі Азамат Үмбетов қазақтың қара домбырасымен әуелете ән шырқап, алыс-жақыннан ат арылтып келген спортшы қауымның көңілін бір көтеріп тастады. Бұдан соң қарағандылық айтыскер ақын Нұрмұхаммед Байсүгіровке кезек берілді. Ол:
-Халайық, қошеметті қош көрдіңдер,
Азекеңнің көңілін рас көрдіңдер.
Қасиетті ораза айттың қарсаңында
Көкпар шауып, күрестіріп, ас бердіңдер.
Арқа жақтан Алатауға келіп қалдық,
Бірліктің арқасында өскен гүлдер.
Сағыныштан сарғайып күтіп жатқан
Сарыөзектің жеріне хош келдіңдер.
Оразада ауызды ашып келдік,
Көңіліміз көлдей боп тасып келдік.
Жырыма ағаларым баға берсін,
Барыстарым бақтарың жана берсін.
Аллаға шүкір, бірлігіміз бекем болып,
Ақыл айтар ағалар дана болсын.
Азеке, көңіліңе көп рахмет,
Сенің қонақжайлылығыңа баға берсін.
Сөз соңында тілерім палуандарға —
Көкпарда салымдарын сала берсін,-деген пәтуалы жырын арнады.
Азамат Мұқановпен сұхбаттасқанымызда, ол:
— «Ерім дейтін ел болмаса, елім дейтін ер болмас» деген ғой. Кезінде ауданда, облыста жанашыр, қолдау көрсететін адамдар болмады. Сол себепті «қолдау көрсетеміз» деген ағайындардың шақыруымен 2006 жылы он тоғыз жасымда Батыс Қазақстан облысына кетуіме тура келді. Батыс Қазақстанның әкімі Бақтығожа Салахаддин және Нұрлан Ноғаев (бүгінде Атырау облысының әкімі) зор қолдау көрсетті. Мен спортпен жиырма жыл айналыстым. Осы аралықта он Әлем чемпионатына қатысып, оның төртеуін қола, екеуін алтын, бір күміс медальмен ҚР еңбек сіңірген спорт шебері атағын иелендім. Ұлттық құраманың капитаны болдым. Міне, бір жыл болды, өз туған жеріме қайтып оралдым. Спорт саласында өз жұмысымды бастағалы отырмын. Елбасының «Болашаққа бағдар: Рухани жаңғыру» мақаласы аясында, «Туған жер» бағдарламасы бойынша «Туған жерге туыңды тік» дегендей, өзім туып-өскен ауылым – Қоянкөзде, кейінгі ұрпаққа, спортшы жасөспірімдерге палуандар өз өнерлерін көрсетіп, тәжірибелерімен бөліспек. Ауылдың спортсүйер балалары осы азаматтарға қарап, бой түзеп, үлгі алса, еліміздің бетке ұстар азаматтары болса, туған жеріміздің абыройын асқақтатса деген мақсатпен ауылыма екінші рет келе жатырмын. Ауылдың, ауданның, облыстың белді азаматтары балаларға өздері қолдау көрсетсе деймін. Спортта биікті бағындырар азаматтар осы ауылдардан шығатыны белгілі. Балаларымыз өзге жақтан қолдау іздемей-ақ, өз жерімізден қолдау тауып, өсіп-өніп жатса, абыройы асқақтаса, көк байрағымызды желбіретсе екен деймін. Сонымен қатар, спорттық кездесуден соң республикалық көкпар өткізсек деген ниетпен келе жатқан жайымыз бар. Спортшыларымыз – Әлем чемпионатының жүлдегерлері, «Қазақстан барысы» — барлығы да сол ауылда бас қоспақшымыз,-деді Азамат Мұқанов.
2011 жылғы «Қазақстан барысы» — Ұлан Рысқұл: «Азамат бауырымыз үлкен іс-шара жасап, барлық палуандардың басын қосып, мәрттігін көрсетіп жатыр. Халыққа танымал, өздеріңіз білесіздер, 2013 жылы Бразилияда Әлем біріншілігінде күміс жүлдегер атанды. Елдос Сметов — Самбодан үш дүркін Әлем біріншілігінің жүлдегері, Олимпиаданың күміс жүлдегері, Әлем біріншілігінің жеңімпазы, Жансай Смағұлов — бірнеше Гран Прилерді ұтып, топ жарған палуан. Жас палуандар көп соңымыздан еріп келе жатқан, мәселен, Дидар Хамзаны айтсақ болады. Барлығы да осы Азамат бауырымыздың ұйымдастырған шарасына қатысуға келе жатыр» деп, өз ойын білдірді.
Айнаш МӘМІЛЕНҚЫЗЫ.