Ауылдармен танысты

 Аудан әкімі Махаббат Бигелдиев аудандағы іс-сапарын Шанханай ауылдық округінде жалғастырды.

Қоянкөз, Майтөбе елді-мекендерін аралап көрген ол, Шоқан Уәлиханов кесенесіне барып құран бағыштады. Шоқан Уәлиханов атындағы мемориалдық музейді, ауылдық округ әкімдігінің ғимаратын аралап, мәдениет үйінде ауылдың белсенділерімен кездесті. Кездесуді ауылдық округтің әкімі Қонысбек Толыбаев ашып, жүргізіп отырды. Аудан әкімі Махаббат Бигелдиев өзінің өмір жолынан қысқаша деректер айтып өтіп:

— Осы аудан мен басқарған алтыншы аудан екен. Басқа аудандарға қарағанда біраз кенжелеп қалған екенбіз. Әрине барлық жұмыстарды бір күнде атқара саламыз демеймін, әйтсе де әр ауылды өз көзіммен көрмек ниетпен ауылдарды аралап жүрмін. Ауылдарыңызды аралап көрдім. Сіздердің алып-қосарларыңыз бар болса айтыңыздар. Жазып алып кетіп, жұмыс жоспарымды жасап, сол бойынша жұмыс жүргіземіз — деді.

Сөз алған Майтөбе негізгі мектебінің директоры Бақытжан Мақұлбеков бүгінгі таңда медицина қызметкерлерінің ескі, талапқа сай емес ғимаратта отырғандарын, Ақбастаудағы су қоймасының қоршалмай, жөндеу көрмей тұрғандығын, жаңа су құбырларын салмай-ақ, барын жөндеп, реттеп ұстауға болатындығын айтып, өзі басқарып отырған мектеп ғимаратының жай-күйіне тоқталып, интернет желісінің баяу екендігін айта отырып, аудан әкімінің ауылдық округті өзі аралап, халықпен кездесіп, түйткілді мәселелерді өздеріңіз айтыңыздар деп ұсыныс – тілектерін тыңдап, жазып алып жүргендігіне ризашылығын білдірді.

Ауылдық а қ с а қ а л д а р а л қ а с ы н ы ң т ө р а ғ а с ы Қ о з ы б е к Бақбергенов, Шоқан ӨК т ө р а ғ а с ы А з а м а т Дәуренбеков, а у д а н д ы қ м ә с л и х а т д е п у т а т ы Қ о ж а б е к Т о л ы б а е в сөз алып, ауылдастары атынан жаңа басшының жұмысына табыстар тіледі.

Көксу ауылдық округінің елді-мекендерін аралаған аудан әкімі Махаббат Бигелдиев Көксу орта мектебінің оқушыларының 1 маусым балаларды қорғау күніне орай дайындаған «Балалық шақ» мерекелік іс-шарасына қатысып, өзінің ізгі тілегін жеткізді.

— Адам өміріндегі ең үлкен бақыт-ұрпақ өсіру, бала тәрбиелеу. Бүгінгі бала елдің ертеңі, болашағы, ұлттың жалғасы. Өскелең ұрпақ, мына сіздер, ұшы-қиырына көз жетпейтін қазақ даласының, егеменді еліміздің ертеңгі тізгінін ұстар болашағысыздар. Біздер, үлкендер, қолдан келген бар мүмкіндіктерді пайдаланып, Сіздердің бақытты, жан-жақты тәрбиелі, саналы болып ержетулеріңіз үшін жұмыс жасаймыз.

Құрметті ата-аналар, ұстаздар,оқушылар! Бүкіл әлемде 1950 жылдан бастап мерекеленіп келе жатқан, жайма шуақ, жаздың бірінші күніне дәл келетін, балаларды қорғау күні- халықаралық мерекесі құтты болсын! Еткен еңбегіміз жемісті болып, Елбасымыз аман, еліміз тыныш, балаларымыздың болашағы жарқын болсын!

Қай халықтың болмасын, елдігін, салт- дәстүрін, әдет-ғұрпын болашаққа апаратын бүгінгі жас ұрпағы. Осы орайда, аудан әкімі Көксу ауылдық округінің әкімі Әлия Бақтиярованың бастамасымен, ауыл тұрғындарының күшімен ашылған «Ғажайыпстан» балалар ойын алаңының ашылу салтанатының куәсі болып, лентасын қиды. Ауылдық округтің әкімінің жұмыс кабинетінде ауыл активімен кездесті. Аудан әкімі өзі туралы қысқаша айтып өтіп, осы ауылға қарасты Көктал, Қосағаш, Беріктас елді-мекендерін және Қосағаш ауылын аралап көріп шыққандығын айта отырып, ауылдық округтің әкімінен өзекті мәселелер туралы айтуын сұрады. Ауыл әкімі Көктал ауылына су кіргізу, мектеп мәселесін, Қосағаш ауылының жолы, электр жарығы, балабақшасы, Беріктас ауылының жолы, мұнарасы, Көксу ауылының көшелерін жөндеу туралы, учаскелік полиция инспекторы мен дәрігердің болмай тұрғандығын, сондай-ақ мәдениет үйінің жоқтығын айтып, мүмкіндігіне қарай көмек беруді сұраса, ауылдық округтегі орта мектептің директоры Ерғали Сатымбаев интернет желісі туралы мәселе көтерді.

 Шұбар ауылдық округінің Онжас елді мекенінің ауыз су, кірме жолына, Аралтөбе елді мекеніндегі медициналық пункке көңіл бөлген аудан әкімі Шұбар ауылдық округі әкімінің жұмыс кабинетінде ауылдық округтің активімен кездесті. Өзін таныстырып өткен аудан әкімі «Бірден қатырып тастаймын демеймін, бірақ сіздер айтқан ұсыныс-тілектерді жазып алып кетіп, мүмкіндігіне қарай жүзеге асыру жұмыстарын жасаймын. Сол үшін ауылда қандай шешілмей жатқан күрделі мәселелер бар, айта отырыңыздар» деп актив мүшелерін тыңдады.Балалар бақшасының меңгерушісі Аққанат Несіпбаев, дәрігерлік амбулаторияның фельдшері Гүлнар Шоқпарова, Шұбар орта мектебінің директоры Асқар Идрисов өздері басқарып отырған мекемелерінің жай-күйін айтып, көмек сұраса, ауылдық ақсақалдар алқасының төрағасы Өнербай Рашев жаңа басшыға жұмысына табыстар тіледі.

Сенбі күні аудан әкімі Махаббат Бигельдиев Жоламан ауылдық округін аралап, жай -күйімен танысып, округ әкімінің жұмыс кабинетінде ауылдық округтің белсенділерімен кездесіп, әңгімелесті. Аудан әкімі жұмыстың қауырт болғанына байланысты өздерімен сенбі күні кездесіп отырғанына кешірім сұрап, олардан ойларымен бөлісіп, ұсыныс-тілектерін жеткізіп отыруды сұрады.

— Ауданға жаңадан келіп жатқаннан кейін ел-жұртты аралап, елмен танысып, өзімізді таныстыруымыз керек. Жұмыс жоспарын жасауымыз керек. Әр округтің түйткілді мәселесін елмен бірге менде көруім керек сондықтан арнайы өзім аралап келе жатқан жайым бар,- деп сөзін бастаған аудан әкімі жиналғандарға өзі туралы біраз мәлімет беріп өтті.

-Кербұлақ ауданы маған біраз таныс емес екен. Ауылдық округті аралап, өз көзіммен көріп, сіздермен танысып, ұсыныс-тілектеріңізді ауыздарыңыздан естиін деп келдім, кемшін тұстарды өз ауыздарыңыздан жазып алмақ ниеттемін. Жазып алған мәселелерді бірден бара салып шешемін деп айта алмаймын. Барлық жұмысты жүйелі түрде, жөніне, ыңғайына қарап, жүзеге асырамыз. Ал жұмыстың нәтижелі болмағы сіз бен біздің бірлесіп атқарған жұмысымызда болмақ — деген аудан әкімі Жоламан ауылдық округінің активімен кездесу барысында.

Ауылдық округтің белсенділері аудан басшысына ақ тілектерін білдірісіп жатты. Осы ауылдың тұрғыны Құдайберген Талғарбаев ауылдағы ауыз су мәселесінің қиындығын, тұқыммен айналысатын шаруашылық жоқтығын айтса, ауыл тұрғыны Алмас Нұрабаев салынып жатқан жолдың сапасыздығын айтып, мүмкіндік болса ықпал етуді сұрады.

Сарыбастау ауылдық округі

Аудан әкімі Махаббат Бигелдиев:

— Осы ауданға қызметпен келгеннен кейін, елге шығып, жұртпен танысып жатқан жайым бар. Әкімдеріңіз бірді-екілі проблемасын айтып келді. Өзімде көріп келдім. Менікі ел білген проблеманы менде біліп отырайын деген ой. Сонғы кезде мен істеген аудандарға қарағанда әлеуметтік жағдайы ең төмен аудан екен. Атқарылған жұмыс көп екен. Бірақ сіз бен біз істейтін жұмыстарда аз емес екен. Бәріміз ауылда өскен баламыз. Ауыл деген ыстық. Салыстырмалы түрде жұмыс жасаймын. Кішкене кенжелеп қалыппыз. Бір мал мен егіске қарап отыратын жай жоқ. Барлық ауылды аралап көремін. Қай жерде қандай проблемалар бар екенін өз көзіммен көрсем деп келіп отырмын. Мереке, жиналыста көбейіп кетіп,жұмыстан да шыға алмай жатырмыз. Жазып алғанының барлығын жасайды екен деген ой тумау керек. Бірақ күш-жігерім, білімім келгенше жасайтыным анық,-деген аудан әкімі ауданда істелінетін шаруаларға тоқталып өтті. Тоғыз жолдың торабы Сарыөзек.Көрші аудандар қызығатын ауыл-ақ. Алайда кемшілігіміз көп болып тұр. Үкіметке қол жайып отыратын заманнан кеттік. Ендігісі бірлесіп жұмыс жасауымыз керек. Жалғыз бюджетке қарап отырмауымыз керек. Қолы жомарт, ауылдан шыққан азаматтарымыз көмектесуі қажет. Көкейлеріңізде жүрген күрделі мәселелер болса айта отырыңыздар,- деді Сарыбастау ауылдық округінің белсенділеріне.

Ауыл тұрғыны , зейнеткер Ібен Машарбетов :

-Айтып жатқан сөздеріңіз орынды. Кенжелеп қалғанымыз да рас. Мектебіміз тозып кетті. Соған көмектессеңіз. Орталық жол бойында ауылдың аты жазылмай қалған. Соны жазуға ықпал етсеңіз,-.десе, өзінің «Сыбаға» бағдарламасы бойынша 47 ірі қара мал алып, бүгінде соның басы 130-ға жетті деген Стамбек Қалдаев терінің, астық бағасының арзан екендігін және астық өткізетін орынның жоқтығынан қызығын делдалдар көретінін айтып өтті.

Ауылдық дәрігерлік амбулаторияның дәрігері Сыдық Қарынтаев өзі басқарып отырған мекеменің жылу жүйесінің жоқтығына тоқталып, ауылға жас мамандардың тұрақтамайтынын атап өтті.

Мектеп директоры Фаризат Жанысбекова мектептің бүгінгі жетістіктерін айта отырып, мектеп ғимаратының оқушылар санының аз болуы себепті күрделі жөндеуден өтпей тұрғандығына тоқталса, әйелдер кеңесінің төрайымы Күләш Шаймолданова егін егетін, мал бағатын жердің жоқтығын айтты.

Аудан әкімі Махаббат Бигелдиев өзінің көрген, естігендерінің барлығын жазып алғандығын, ал осы жазып алғандарын мүмкіндігіне қарай жүзеге асыру міндеті екендігін айтып, жиналған қауымға алғысын білдірді.

Қарашоқы ауылдық округі. Аудан әкімі Махаббат Сәдуақасұлы ауылдың ішін аралап көріп, ауылдық округ әкімінің жұмыс кабинетінде ауылдың активімен кездесті. Ауылдың әкімі Дина Ақбасова аудан әкіміне актив мүшелерін таныстырды.

Аудан әкімі ауданның өзі үшін ой-шұқыры көп, таныс емес екендігін айта отырып, өзінің жоспарлы жұмыс жасауы үшін ауылдарды аралап шығып, өз көзімен көріп, кем-кетіктерін халықтың өз аузынан естуі үшін келіп отырғандығын жеткізді. Жұмыс жасаймын деген адамға жұмыс көп екендігін айтып, ауыл белсенділерін бірлесіп жұмыс жасауға шақырды.

— Әрине қаржыны да жөнімен сұрау керек қой.Мысалы 500-600 оқушы оқитын мектепте 120 бала оқып жатса оған қаржы бере қоя ма? Өсім жоқ деп айтады емес пе? Мәдениет үйлерінің жай-күйі де мәз емес. Жан ауыратындай жайда екен. Жаңа осы ауылға қарасты Рудник — Архарлыда болып жағдайды көрдім. Енді өздеріңізбен жүздесіп отырмын. Ой-тілектеріңізді айта отырыңыздар,-деді ол.

«Қарашоқы» ӨК төрағасы Мұхамедқан Нүрелов ауылдағы ең өзекті мәселе ауыз су екендігін жеткізді.

-Мәдениет, өнер мектебі туралы жаңа өзіңіз айтып кеттіңіз. Совхоздың кезіндегі жағдай ауылда әлі де бар. Малда сол кездегідей. Балабақшамыз, мектебіміз күрделі жөндеуден өткен. Ең күрделі шаруамыз сол ауыз су мен мәдениет үйі. Ауылымыздан шығып жатқан спортшыларымыз бар. Алайда солардың дайындалатын орны жоқ. Одан кейінгі бір мәселе мешітіміз ескі болатын. Биылғы жылы ауыл тұрғындарының күшімен жаңа мешіт салсақ деп отырмыз.

Денешынықтыру-сауықтыру орны болған. Бүгінде ол жеке меншікке өтіп кетіп отыр. Өнер мектебі мен мәдениет үйі ауданның балансында, деген кооператив төрағасы аудан әкімінен мүмкіндігіне қарай көмектесуін сұрады.

Мектеп директоры Гүлшар Бұқабаева мектептің жанынан шағын стадион салу мәселесін қозғаса, дәрігерлік амбулаторияның дәрігері Алма Қоқысбекова ауылдық аурухананың екінші қабаты бос тұрғандығын айтып, жөндеу жұмыстары жүргізілсе қолдануға болатынын айтып, жөндеу жұмыстарын жүргізсе деген ұсынысын жеткізді.

Шаруа қожалығының басшысы Сәбит Сүлейменов жолдың жағдайы туралы сөз қозғады. Ауылдың қариясы, қажы Қыдырбек Омаров аудан әкімінің жұмысына табыстар тіледі.

Аудан әкімі ауылдың жағдайының өзге ауылдарға қарағанда дұрыс екендігін айта отырып, ауыл тұрғындарына жақсылықтар тіледі.

Ләйлә ЕСКЕНДІРҚЫЗЫ