Палуандар күш сынасты

Қазақ күресі — қазақтардың ең көне спорт түрлерінің бірі. Күрестің ұлттық түрі «қазақ күресінің» даму тарихы қазақ халқының тамыры тереңнен тартылатын тарихымен тұтасып жатыр. Түрлі бас қосулар мен мереке тойлар спорттың осы түрінің сайысынсыз өткен емес. Күші басым түсіп, жеңіске жеткен палуандар халықтың төбесіне тұтар құрметті адамына айналған. Қазақтың ұлы батыры Қажымұқан есімі қазақ халқының тарихына ғана еніп қойған жоқ, сонымен бірге спортшылардың әлемдік элитасының қатарына кірді. «Қазақша күрес» бойынша бірінші ірі жарыс 1938 жылы ауыл шаруашылығы аймақтары арасындағы спартакиада аясында өткен. Таяуда Сарыөзек ауылында БЖСМ спорт сарайында «Болашаққа бағдар: рухани жаңғыру» мақаласының аясында қазақ күресінен ерлер арасында «7 мамыр — Отан қорғаушылар күні» мен «9 мамыр — Жеңіс күніне» орай, аудандық турнир өткізілді. Турнирді аудан әкімі Б.Алиев құттықтау сөзбен ашты.
— Қазақ күресінің тарихы ұлтымыздың өмір тарихымен тығыз байланысты. Палуандарымыздың күш сынасуы ат жарысы, ақындар айтысы сияқты қазақ халқының ажырамас бір бөлігі болып саналады. Қазекем қашанда күш иесін «алып», «толағай», «палуан» деп танып, ерекше күш иесі деп құрметтеген. Күрес ұлттық мәдениетіміздің маңызды бір саласы. Бүгінгі осы турнирге демеушілік көрсеткен азаматтарға алғыс білдіре отырып, палуандарымызға жеңістер тілейміз,-деп ізгі тілегін білдірді.
Ауданымызда көп жылдар құқық саласында қызмет еткен, бүгінде зейнеткер А.Оңалбаев спортшыларымызға аталық тілегін айтып, сәттіліктер тіледі.
Палуандар мықты біздің ойында,
Алып ұрар салып ала қойынға.
Күрескенде дес бермеген бабамның
Қаны қалған тасып тұла бойында.
Күрес десе, қызар қазақ, шаршы алаң,
Жігерленер қайрат алып барша алаң.
Жауырыны жер тимесін қазақтың,
Тамсансыншы тек өзіңе барша жан,- демекші, көп күттірмей спортшыларымыз шаршы алаңға шықты.
Турнир ережесіне сәйкес 70 кг дейін және 70 кг жоғары екі салмақ дәрежесінде өткізілді. «Күш атасын танымас» дегендей, жарыс нәтижесі бойынша 70 кг дейінгі салмақта І орынды сарыөзектік Айтбаев Тимур, ІІ орынды алтынемелдік Нұрбеков Мадияр, ІІІ орынды шанханайлық Қуатай Санжар алса, 70 кг жоғары салмақта І орынды қаспандық Қойшыман Мұхит, ІІ орынды қаспандық Дүйсенбаев Жәнібек, ІІІ орынды Нұрсұлтан Жігер иеленді. Жеңімпаздарға Мақтау қағаздарымен бірге кубок және І орынға 100 000 теңге, ІІ орынға 80 000 теңге, ІІІ орынға 60 000 теңге көлемінде қаржылай сыйлық берілді.
Өз тілшіміз.