Түлектер туған ауылына ту тікті

2018 жылдың 8 мамырында мектеп бітіргендеріне 5,10,15,20,25,30,35 жыл  толған Ж.Жапаров атындағы орта мектептің  түлектерінің демеушілігімен Қызылжар ауылдық округінде шағын футболдан жарыс болып өтті.Бұл іс-шара «Қызылжар ауылдық округінің 55 жылдығына» және Серік Қожахметовты еске алуға арналды. Жарысқа 1958 жылдан 2000 жылы туылғандардың ішінен 24 команда қатысты. Оның  ішінде кім жоқ дейсің.Мұғалім де, банкир де, тіптен прокурор да осылардың арасында жүр. Иә, бұлардың барлығы осы мектептің түлектері, кешегі шәкірттер.Алдымен командалар жас ерекшеліктеріне қарай бір қатарға тұрғызылды.Іс-шараны ауылдық округтің әкімі А.Қаспанов құттықтау сөз сөйлеп ашты.Ауылдың ақсақалдар Кеңесінің төрағасы Б.Сырлыбеков,осы ауылдың түлегі, бүгінде аудандық әкім аппаратының бас маман-заңгері Е.Асанов сөз сөйлеп жарысқа қатысушыларға жеңістер тіледі. Іс -шара барысында Отан қорғаушылар  күніне орай ауған соғысы ардагерлер ұйымының «Отан потриоты» медалімен Насанбеков Әнуар Бегаліұлы, Асанов Ермек Өмірханұлы , «Тәуелсіздіктің 25-жылдығы» медалімен Қашағанов Қайрат Нұрсапаұлы марапатталды. Қызылжар ауылының спортына өз үлестерін қосып жүрген  Қашағанов Қайрат Нұрсапаұлына, Насанбеков Әнуар Бегаліұлына, Асанов Ермек Өмірханұлына шапан жабылып, Сартаев Бейісбай Әбдіханұлы, Қорғасбеков Нұрмұханбет Қасенұлы, Қасенханов Әділ Шаріпханұлына мектеп ұжымының атынан бағалы сыйлықтар табыс етілді. Сонымен қатар Қызылжардың 55 жылдығына орай ұйымдасырушылардың атынан Құсайынов Сембек Тәукешұлы, Сырлыбеков Баян Сырлыбекұлы, Күлшембаев Ержан Әшімұлы, Нүсіпов Айдар Нұрғожаұлы, Садеков Мақсат Қайратұлы, Баубеков Бауыржан Тәкенұлы, Сартаев Бейісбай Әбдіханұлы, Усманов Даурен Құрманжанұлына естелік сыйлықтар табыс етілді.

Жарыс қорытындысы бойынша  І- орынды – 1970 жылғылар  ,ІІ-орынды – 1989 жылғылар,ІІІ- орынды -1991 жылы туылғандар жеңіп алып, кубок, ақшалай сыйлықтармен марапатталды. Осы жарыста жастарға үлгі болсын деген ниетпен  1958 жылғы туылған ардагерлер ойынға араласып, әліде сапта екендерін көрсете білді.Ұйымдастырушылар тарапынан ардагерлерге шапан жабылып, бағалы сыйлықтар табыс етілді.

Еліміздің Президенті Н.Назарбаевтың «Болашаққа бағдар:Рухани жаңғыру» бағдарламалық мақаласынан туындаған алты басымдықтың бірі-«Туған жерге тағзым». Осы мақалаға орай қазір елімізде, жер-жерлерде елжанды азаматтар  бастамалар  көтеріп жатыр.Соның бір айқын көрінісі  Қызылжар ауылында бой көрсетті.Сарыөзектен Жаркентке кететін үлкен жолдан ауылға бұрылған бетте аудан бойынша алғашқылардың бірі болып ауыл атауы  латын тілінде жазылған, үлкен арка орнатылды. Ол ол ма дәл сол маңнан қабырғасына Алматы облысының картасы ілінген аялдама жасалынды. Қазекем қашанда құдаларын құдайындай сыйлаған халық қой.Ата-баба салтын  сақтаған Қызылжарлықтар  ауылға бастар жолдағы аялдама жанынан   «Құда мың жылдық»деген сөзін жазып,ауылға алғаш келген құдаларды қарсы алу мақсатында құда күтетін орын  жасады.

-Сыныптастарымызбен  ақылдаса келе осы аты аталған  нысандарды салуды ойластырдық. Ауылымызға ескерткіш болсын, әрі пайдамыз тисін деген ниеттен туған дүниелер ғой.«Көп түкірсе-көл »деген. Алғашында қолдан келер ме екен деген күдіктің де болғаны рас.Міне,бүгін нәтижесін өзіңіз көріп тұрсыз,- дейді Сағындық Қоңыров.

Бұл нысандарды   1971 жылы туған ауыл балалары жасапты.

-Ауылымыз бірлігі кетпеген ауылдардың бірі.Бүгінгі мына жарысты да ұйымдастырып жүрген ауылымыздың балалары. Бір биыл емес жылда ұйымдастыруға ұйытқы болып жүрген  Қорғасбеков Нұрмұханбет Қасенұлы,Сартаев Бейісбай Әбдіханұлы, Қасенханов Әділ Шаріпханұлы, Қашағанов Қайрат Нұрсапаұлы, Насанбеков Әнуар Бегаліұлдарына алғыстан басқа айтарымыз жоқ. Жалпы жыл сайын түлектеріміз ауылға бір көмектерін жасап жатады. Сол түлектердің бірі Б.Сүттіқожановтың қаржылық көмегінің арқасында мешіттің ішіне жөндеу жұмыстары жүргізілді.1970 жылғы ауыл балалары  қатымхана салды.Оның ішіне қажетті барлық-ыдыс аяқты С.Құсайынов деген баламыз, столдарын, отыратын орындықтарын 1970 жылы туған балаларымыз алып берді. Ауыл тұрғындары да өз тараптарынан көмектерін көрсетті. 1989 жылғылар ауыл ішіне аялдама орнатса,1961 жылғылар мектеп алдына туя ағашын егіп, 1968 жылғылар ауылдың ішіндегі 5 көшеге қиыршық тас төседі. Кафе ішіне Е.Әшімов күрделі жөндеу жұмыстарын жасатып, бүгінде халық игілігін көруде.Мұндай кафе тек қалаларда ғана деп ойлаймын. Міне, мұның барлығы осы ауылымыздың әр жылдарда мектеп бітірген түлектерінің арқасында жүзеге асырылып жатқан дүниелер. Жастарымыздың ісіне қуанамыз.Әрине, ауыл қариялары да қарап отырған жоқпыз.Береке-бірлік бар жерде болатынын жастарға айтудан шаршаған емеспіз. ,-дейді ауылдың ақсақалдар кеңесінің төрағасы Б.Сырлыбеков.

«Адам көркі-шүберек» деп жатамыз. Ал ауылдың көркі осындай әдемі арка, аялдама,әктелген үйлер,боялып-сырланған қоршаулар екені сөзсіз.Міне, сондай көрікті жасау үшін «қаражат жоқ»- деп өзгеге қол жайып отырған қызылжарлықтар емес.Осы ауылдан шыққан қарадомалақтар жарыса ауылдарының гүлденуіне үлестерін қосып жатыр.Осы жерде қазақтың мақтанышына айналған ұлдарының бірі,   Олимпиада чемпионы Жақсылық Үшкемпіровтың «Қазақстанда 5 мың ауылдан 5 мың жігіт шықса сол ауылдар гүлденер еді» деген сөзі  еске түседі. Қызылжарлықтар болса сол ағаларының  сөзін іліп алып,қоштап  кеткен сияқты.Істеріне сәттілік тіледік! Және өзге ауылдардың ұл-қыздарына үлгі болсын деген ниетпен оқырмандарымызға ұсындық.

Ләйлә Оңалбаева.

.