Ғибратты ғұмыр иесі

Алматы облысының және Кербұлақ ауданының Құрметті азаматы, Қазақстан Республикасының құрметті ардагері, аудандық ардагерлер кеңесінің төрағасы, аудандық қоғамдық кеңестің төрағасы Төленді Оспанбайұлы Сарыбаев үстіміздегі жылдың 15-мамырында сексеннің сеңгіріне шыққалы отыр. Осы орайда, Елбасымыздың «Болашаққа бағдар: рухани жаңғыру» мақаласының «Тарихи тұлғалар» жобасы аясында қадірлі қариямызбен Д.Қонаев атындағы орта мектепте кездесу кеші өтті.

«Алматы облысының мемлекеттік архиві» КММ Кербұлақ филиалы қызметкерлерінің ұйымдастыруымен өткен бұл жиынға аталмыш мектептің директоры, аудандық мәслихат депутаты Еркебұлан Амантайұлы Самылтыров, ҚР білім беру ісінің үздігі, ауданның Құрметті азаматы Айнабеков Марат Нұрмұханұлы, сондай-ақ, мектеп кітапханашылары мен жоғары сынып оқушылары қатысты. Жүргізуші, аудандық кітапхананың кітапханашысы Мақпал Жүнісова кездесудің маңызы мен мәнін түсіндіріп, сөз кезегін «Алматы облысының мемлекеттік архиві» КММ Кербұлақ филиалының директоры Мамиева Гүлбану Түркістанқызына берді. Ол «Өнегелі қарт жоқ жерде – өнегелі бала да жоқ» дей келе, туған елі мен жері үшін тер төгуді парыз санап, қызмет жолында жүрген тұғыры биік ел ағаларының – Тұрғанбаев Ғалым Тұрғанбайұлы мен Сарыбаев Төленді Оспанбайұлының жеке тектік қор иелері атанғанын тілге тиек етті.

Сөз кезегін алған Төленді Оспанбайұлы:

— Зейнеткерлікке 1997 жылы шықтым, содан бері ауданның қоғамдық жұмыстарын атқарып келемін. Аудандық қоғамдық кеңестің төрағасы, аудандық ардагерлер кеңесінің төрағасы сынды қоғамдық жұмыстарды көп жылдан бері еңбекақысыз атқарып келемін. «Шақырғанға бармасаң, шақырусыз қаларсың» дегендей, шақырған әртүрлі іс-шаралардан қалмай, халықтың ортасында жүргенге не жетсін? Елім үшін атқарған осындай еңбектерім бағаланып, жақында Қазақстан Республикасының Құрметті ардагері атағын иелендім. Менің портреттерім де, медальдарым да, ордендерім де, Мақтау қағаздарым да, Алғыс хаттарым да, өмірбаяным да Шоқанның мемориалдық музейінде, Талдықорғандағы және аудан орталығындағы архивтерде тұр. Өзімнің мамандығым – агроном, оқымысты-зоотехник. Шұбар ауылшаруашылық техникумының агрономия бөлімінде, одан кейін Алматыдағы зооветеринариялық институтта оқыдым. Көптеген жылдар бойы аудандық кәсіподақ ұйымын басқардым. Аудандық партия комитетінде әртүрлі қызметтер, сондай-ақ, «НұрОтан» партиясында он жыл істеп, қоғамдық жұмыстарға да белсене қатысып келемін. Содан да болар, көптеген марапатты иеленіп жатқаным. Адал еңбек етсең, еңбегің де әділ бағаланады. Еңбекті сүйсең, бағалы боласың. «Нағыз патриот болам» десеңдер, еліңе, жеріңе маңдай теріңді төгіп, еңбек сіңіріп, қоғамдық жұмыстарға белсене араласу керек,-деп өз өмірінен сыр шертті.

Д.Қонаев атындағы орта мектептің директоры Еркебұлан Самылтыров және Төленді Оспанбайұлымен көп жылдар бойы бірге қызмет еткен әріптесі Марат Айнабеков «Қарты бар үйдің қазынасы бар» дей келе, абыз қария жөнінде мәнді әңгіме айтып, ол кісінің сегіз қырлы, бір сырлы екенін, баламен баладай, үлкенмен үлкендей, орнымен әзілдесе алатын әзілқой жан екенін, сондай-ақ, «Әнді сүйсең, менше сүй» дегендей, әнді тамылжыта орындайтынын тілге тиек етіп, өмір жолдарынан қызықты мысалдар келтірді.

«Бәйгеге шаба алмаған аттан белі шыққан тай артық, әңгіме айта алмаған қарттан тілі шыққан бала артық» демей ме, дана халқымыз? Жастайынан қазақ тілін сүйіп өскен, қарттардың әңгімесін құлағының құрышын қандыра тыңдаған Төленді қария оқушылардың түрлі сұрақтарына тұщымды жауап берді. Жеткіншектердің өтініші бойынша «Нурикамал», «Ой, ты рожь» әндерін өзі айтатын әндердің қатарына қалай енгізгені жөнінде әңгімелеп, сол әндерді тамылжыта шырқап берді.

Бұдан соң мектептің кітапханашысы, драма үйірмесінің жетекшісі Саязхан Нұрлыбекова:

— Ғибратты ғұмырда жарысып аламанмен,

Сексенге де жеттіңіз желмаямен.

Жүзге дейін талмастан, қажымастан,

Жүзе беріңіз, ұлы өмір – дариямен.

Қайраттанып, ешқашан ауырмаңыз,

Арай таңмен шаттанып, нұрланыңыз.

Жас ұрпаққа өнеге, үлгі болып,

Өмірде қуаттанып, адымдаңыз,-деген өлең жолдарын арнап, ұлағатты қарияға ауырмай-сырқамай, арамызда жайраңдап жүре беруіне тілектестігін білдірді.

Бұдан соң архив қызметкері Ақжамал Тұяқбаева «Аталар жолымен, ағалар ізімен» атты Төленді Оспанбайұлының өмірі мен қызметіне арналған көрмемен таныстырды. Гүлбану Түркістанқызы Төленді Оспанбайұлын Алматы облысының мемлекеттік архивінің бас директорының Алғыс хатымен марапаттап, «Ауылым – алтын бесігім» атты құжаттар мен материалдар жинағын ұсынды.

«Ауылыңда қартың болса, жазып қойған хаттай болар,

есік алдыңда төбең болса, ерттеп қойған аттай болар» дегендей, мерейтой иесі Төленді Оспанбайұлы осылайша жас жеткіншектерге өнегелі ғұмырынан сыр шертіп, ақыл-кеңесін айтты. Қазыналы қартпен әңгімелескен оқушылар кездесуден зор әсер алып, өмірге деген құлшыныстарын арттырды.

Айнаш МӘМІЛЕНҚЫЗЫ.