Үйірме жұмыстары есеп берді

Елбасымыз Нұрсұлтан Әбішұлы Назарбаев «Ұлтты қалыпқа келтіргің келсе, ұлттық мәдениетті қолдау керек» деген еді.
Осы орайда Кербұлақ ауданы Әбікен Сарыбаев атындағы Мәдениет үйі қызметкерлерінің ауыз толтырып айтар жетістіктері мен жеңістері баршылық. Облыстық, республикалық, тіпті халықаралық өнер сайыстарында бәйгенің алдын бермей жүрген мәдениет қызметкерлері мақтауға да, мақтануға да әбден лайық.
Өнерге қызмет етіп жүрген олардың әрқаайсысы үйірмелер ашып, шәкірттер тәрбиелеп, аудан мәдениетінің дамуына үлкен үлестерін қосуда.
Жақында аудандық мәдениет үйінің 2017-2018 жылғы үйірме жұмыстарының есеп беру концерті болып өтті. Концертке аудандық мәдениет және тілдерді дамыту бөлімінің басшысы Әділжан Әділхан, аудандық Мәдениет үйінің директоры Гүлмира Ақанқызы аудан тұрғындары, мектеп оқушылары, аудандық БАҚ өкілдері қатысты. Сахна шымылдығын әнші, сазгер, Жанғазы Жексенбаев басқаратын домбыра үйірмесі «Би күйімен» ашылды. Осы үйірменің кіші тобының мүшелері халық әні «Еркем-ай», орта топ мүшелері Түстікбаева Әйгерім, Анарбай Мерей, Әбдімомын Желдібаевтың «Ерке сылқым», Әділхан Ұлжан, Бегалы Ералыұлы «Адай», «Әлқисса» күйлерін орындап көрермендердің көңілінен шықты. Сазгер, «Нұр» студиясының жетекшісі Тілеужан Есерханұлының шәкірттері Ақбота Базарбаева халық термесі «Желкілдекті», Жұлдыз Нүрпейісова «Ауылым», Мұқатай Айсу «Мен қазақтың қызымын», Қайыркеш Аяулым «Шәмші әндерінен попурри» орындап, жиналғандарды өнерлерімен тәнті етті. Облыстық, республикалық, халықаралық байқаулардың жеңімпазы Сәуле Қожаханованың жетекшілігімен құрылған «Әжелер» ансамблі халық әндері «Ахау керім» және «Мейман» әндерін нақышына келтіре орындады. Сонымен қатар, күміс көмей әншілердің бірі — Азамат Үмбетовтың шәкірттері Құрманбаева Анель мен Құрманбай Әйгерім халық әні «Еркем-ай», Абайдың «Желсіз түнде жарық ай», «Көзімнің қарасы» әндерін жоғары дәрежеде орындаса, ауданымыздың мәдениетін көтеруге үлкен үлес қосып жүрген, ерекше дауыс, ерекше дарын иесі Мәулеш Әбжапаровтың шәкірті Аяулым Қайыркеш «Rolling the dee» әнін көпшілік назарына ұсынса, тіл жанашыры, өмірін өнерден бөле-жара қарамайтын жастардың сүйікті әншісі Оралбек Тұрысбековтың шәкірттері Саят Болатхан, Шаяхмет Жәнібек көркем сөз оқудың асқан шеберлігін көрсетті. Күйші, өнер жанашыры Арай Бектемісованың жетекшілігіндегі Анар Жұмабаева мен Айдана Жұмабекова орындаған «Мереке» күйін көпшілік жылы қабылдады. Ән айтумен қатар, би өнерін меңгеріп жүрген өнерге бай қыздардың бірі, республикалық байқаудың жүлдегері Айдана Мұсағұлованың жетекшілігіндегі «Әдемі-ай» бишілер тобы «Үнді» биін ерекше орындап, алдағы уақытта өтетін талай байқауларда топты жарып, бәйгенің алдын бермейтіндерін көрсетті.
Жалпы концерттік бағдарлама өнерсүйер қауымның көңілінен шықты. Концертті аудандық мәдениет және тілдерді дамыту бөлімінің басшысы Әділжан Әділхан қорытындылап, шығарма үйірмелерінің жұмысына оң баға беріп, үлкен ізденістің бар екенін тілге тиек етіп, Мәдениет үйі қызметкерлерінің көптеген өнерпаздарды тәрбиелеп жүргенін мақтанышпен айтып, үйірме жетекшілеріне алғыс білдіріп, шығармашылық табыс тіледі.

Дина Аманқызы