«Жетісу көктемі» жас әдебиетшілер форумы

Алматы облысының әкімдігі Елбасы
Н.Назарбаевтың «Болашаққа бағдар: рухани
жаңғыру» атты мақаласының «Рухани жаңғыру»
бағдарламасы аясында, таяуда «Жетісу көктемі» атты
жас әдебиетшілер форумын өткізді. Аталған шараға
республиканың әр облысынан бір өкілден қатысқан
топ біздің ауданымызға да атбасын бұрды. «Рухани
жаңғыру» бағдарламасы аясында пайдалануға берілген
Қарасай ауданындағы тарихи-мәдени өлкетану
нысандарымен, атап айтсақ: «Батыр бабалар»
мемориалы, «Атамекен» тарихи-мәдени орталығы,
«Аналарға құрмет» мұражайы, Қарасай ауданының
тарихи өлкетану мұражайымен танысып қайтқан топ
түстен кейін біздің ауданға да келіп жетті. «Ұлы даланың
ұлы даралары» атты мемориалды кешенде аудан әкімі
Бағдат Байшалұлы Алиев, аудан әкімінің орынбасары
Болысбай Тоғысбайұлы Момбаев, аудандық ішкі саясат
бөлімінің басшысы Гүлмира Бекбатырова, аудандық
мәдениет және тілдерді дамыту бөлімінің басшысы
Әділжан Әділхан қонақтарды жылы жүзбен қарсы алды.
Аудан әкімі Бағдат Байшалұлы Алиев:
— Біздің ауданға хош келіпсіздер. Қадамдарыңыз
құтты болсын. Мемориалдық кешендегі жиырма екі
әулие-әмбиеге арналған ескерткішке келіп, құран
бағыштасын деп, әдейі осы жерде қарсы алып тұрмыз.
Олардың әрқайсысының басына бара алмайсыңдар.
Барлығыңды өңірімізде жерленген қасиетті
бабаларымыздың аруағы қолдасын. Кербұлақ жеріне
кіре берісте, сол жағымызда Жоламан, Малайсары
батыр жатыр. Мұндай аруақты бабаларымыз көптеп
саналады. Үш жүздің бабалары жатыр десек, артық
айтпаймыз. Алыс-жақыннан келген ұрпақтары
осы жерге келіп, тәу етіп, құран бағыштасын деген
ниетпен осындай мемориалды кешенді тұрғыздық.
Сарыөзек — Алматы мен Талдықорғанның ортасындағы
ауылдардың бірі. Жылдан жылға көркейіп келеді.
«Жақсы сөз — жарым ырыс» дегендей, көгалдандыру
жағынан енді бірер жылда Талдықорған қаласына
да жетіп қалармыз. Бірлігі жарасқан, ауызбірлікті,
ынтымағы мығым, татулығы берік ел суын ішіп, ырзығын
теріп жүрген киелі мекен бұл. Қарасай батырдың, үлкен
атаның ауылынан келе жатыр екенсіңдер. Енді қазақтың
маңдайына біткен жарық жұлдызы — Шоқанның музейіне
барасыздар. Шоқан
колхозының бастығы
Игібай Базарбаев
Димаш Ахметұлы
Қонаевтың алдына
барып жүріп, оның
сүйегінің осы маңайда
жатқанын дәлелдеп,
музейді Шоқан
ауылында салдырған.
Жанында Көшен төре,
арғы жағында Тезек
төре жатыр. Киелі
мекенге хош келдіңдер.
Осы жерден қанаттанып, өсіп-өніңдер. Барлығыңа
да шығармашылық табыс тілеймін,-деп жас
әдебиетшілерге сәттілік тіледі.
Бұдан соң қонақтарды Шанханай ауылдық
округінің әкімі Қонысбек Толыбаев және
Ш.Уәлихановтың «Алтынемел» мемлекеттік
мемориалды музейінің меңгерушісі Сәуле Әбішева
ұжымдарымен қарсы алды. Жастар Шоқан
Уәлихановтың бейітіне барып, тағзым етті. Ауыл
имамы Нұртай қажы Айдынбаев аруаққа бағыштап
құран оқыды. Шыңғыстың жарық жұлдызы Шоқан
Уәлихановтың жүріп өткен өмір жолдарымен, түрлі
экспонаттармен музей меңгерушісі Сәуле Әбішева
таныстырып, қонақтардың зор ықыласына бөленді.
Жас әдебиетшілердің бірі – «Жетісу» облыстық
газетінің тілшісі, ақын, Қазақстан Жазушылар және
Журналистер Одағының мүшесі, ҚР Тұңғыш Президенті
қоры «Алтын тобылғы» әдеби байқауының бас
жүлдегері Мақпал Мыса:
— Елбасымыздың «Болашаққа бағдар: Рухани
жаңғыру» мақаласының «Рухани жаңғыру»
бағдарламасының аясында жас ақын-жазушылар
екікүндік форуммен сіздердің де аудандарыңызға
келіп қалдық. Киелі Кербұлақтың көрікті табиғатына
тамсандық, тарихи ескерткіштерін көріп, өткенге
көз жүгірттік. Шоқан бабамыздың музейіндегі
жәдігерлермен танысып, оның қола мүсінінің жанында
естелікке суретке түстік. Егеменді еліміздің кең байтақ
жерін аралап, ойымызды ұштап, бойымызға күш-
қуат жинап, қанаттанғандай болдық. Алған әсеріміз
керемет. Көңіл-күйіміз өте жоғары. Тәуелсіз еліміздің
рухани жаңғыруына зор үлесімізді қосамыз деген
сенім білдіреміз. Осы шараны ұйымдастырған Алматы
облысының әкімдігіне және тілдерді дамыту жөніндегі
басқарма қызметкерлеріне айтар алғысымыз шексіз,-
деп өз ойымен бөлісті.
«Әдебиет – әркімнің тісі бата бермейтін
дүние» екенін біреулер білсе, енді біреулердің
біле бермейтіні анық. Олай болса, біз де,
кербұлақтықтар, талантты жастарға: «Еліміздің
рухани байлығын арттырып, өздеріңіздің
жүректен шыққан әдемі өлең-жырларыңызбен,
қызықты прозалық шығармаларыңызбен көпті
тамсандырып, биіктерден көріне беріңіздер»
дегіміз келеді.
Айнаш МӘМІЛЕНҚЫЗЫ.