Әз-Наурыз құтты болсын!

Қаспан ауылының тұрғындары да
мейрамды ерекше атап өтті. Мектептің
ауласына жиналған «Ырыс», «Қызжібек»,
«Болашақ», «Достық», «Мереке» атты
Показать полностью…
көшелердің тұрғындары дастархан жайып,
наурыз көже әкелді. Аузын ашса, көмейі
көрінетін ауыл адамдары бір-бірімен
құшақтасып, көрісіп, бір-біріне амандық-
саулық тілеп жатты.
Зейнеткер-ұстаз Мейрамгүл Аңсабаева
жүргізушілік тізгінді қолына алып, қасиетті
наурыз мейрамын ұлықтап, сөз кезектерін
ауылдық округ әкімінің міндетін атқарушы
Жанар Райханбекқызы Умароваға, мектеп
директоры Дастан Есіркесінұлы Ешкеновке
және бес көшенің қарияларына берді.
«Жаңбырменен жер көгерер, батаменен ел
көгерер» дегендей, аталмыш көшелердің
қариялары ақ баталарын беріп, тұрғындардың
қошеметіне бөленді. Иманәлі Әлтайдың:
…Теңгеміз теңдігін сақтайтын болсын,
Сыбайлас жемқорлық тоқтайтын болсын.
Қазақстанда барлық азамат, азаматшалар
Қазақша сөйлеп, алға аттайтын болсын!
Ұлтараздық ешқашан болмай,
Дағдарыстар бізге соқпайтын болсын!
Балаларымыздың бағы жансын,
Таңдаған білімін алсын.
Туған елінің дәстүрін сақтап,
Он саусағынан өнер тамсын.
Мәдениетіміз мәңгі болсын,
Тұрмысымыз сәнді болсын.
Бәрін айт та бірін айт,
Дербестігіміз мәңгі болсын.
Жаңа жылдарыңыз құтты болсын,
Сиырларыңыз сүтті болсын.
Жаңа жылда жаңа табысқа жетіп,
Барлық келіндеріміз жүкті болсын!- деген
батасы көптің көңілінен шықты.
Ал, ауылдың ақылман қарияларының
бірі — Әділбек Кәден домбырамен ән айтып,
Наурыз мейрамына арнайы жырдан шашу
шашса, Сламбай Тоқабаев Ислам дінінде
аса құрметтелетін пайғамбарлардың бірі Нұх
пайғамбар жайында, Қазығұрттың басында
не себепті кеменің қалғанын, наурыз көженің
қасиетін әңгімелеп берді.
Бұдан соң көше тұрғындары ән-биге
кезек берді. Музыка пәнінің мұғалімі Болат
Жексенбаев музыкамен көркемдеп, әсем
әндерді көрермендерге ұсынды.
Дастарханды мол етіп жайған көше
тұрғындары ұлттық тағамдардан ауыз тигізіп,
наурыз көже құйып беріп жатты. Дәмді көжені
тостағандарға құйып, үлестірген «Ырыс»
көшесінің тұрғыны Анаргүл Нұрланқызы:
— Наурыз мейрамын ерекше асыға
күтеміз. Жеті түрлі тағамнан пісірілетін бұл
көженің берекеті бар. Көжені тойып ішкен
абзал. Жылдағы дәстүр бойынша аулымызда
осылайша аталып өтеді. Наурыз көжемізден
ауыз тиіңіз,-деп үлкен тостағанмен көже
құйып берді. Өте дәмді екен! Әр көшенің
көжесінің дәмділігі тіл үйіреді. Жоғарғы
дастарханда ауыл қариялары әңгіме-дүкен
құрып, қыстан қалған сүр ет, қазы-қарта, жал-
жаяны кертіп кесіп, балаларға да ауыз тидіріп
жатыр. Алтыбақан тебуге асыққан ұл-қыздар
ойын алаңында кезек күтіп тұр.
Бәріміз асыға күткен Наурыз мейрамы
Қаспан ауылында осылайша көрініс тапты.
х х х
Жыл басы болып саналған Ұлыстың ұлы
күнінде Меккеге, қажылыққа барып келген
Жұмабике апайымыз көрші-көлеңдерге
кіріп, хал-жағдайларын сұрамақ ниетпен
Қаспандағы қайынымның үйіне келді. Ауыр
халде жатқан енемнің халін сұрады. Ол: «Осы
ауылда көп жылдан бері бір көшеде тұрып
келеміз. Бидайды келіге түйіп, ақтап, көшенің
көжесін көбіне өзің жасаушы едің. Былтыр
да, биыл да Зейнегүл пісірді. Қолдарыңа
дерт бермесін. Алланың разылығы үшін
пісірген көжелеріңнен талай адам ауыз
тиді. Солардың тілеулері қабыл болсын.
«Батпандап кірген ауру мысқылдап шығады»
дейді емес пе? Ауырма, тез жазыл! Ұлыстың
ұлы күнінде мұсылман халқы ренжіткен
адамынан кешірім сұрауы тиіс екенін білесің.
Біліп істеген, білмей істеген қарекетіміз болса,
артық кеткен жеріміз болса, артық сөз айтқан
болсам, кешір!» деді сабырлы қалпында.
Енем: «Ол не дегенің, саған не деп
ренжимін? Әзіл-қалжыңымыз жарасқан
тату көрші болдық. Сен де мені кешір,
артық кеткен жеріміз болса. «Көрші ақысы
– тәңір ақысы» дейді, бір-біріне кірмей, хал
сұраспайтын көрші көрші болмайды. Рахмет
саған, Жұмабике. Ауырғалы бірнеше рет
келіп, халімді сұрап жатырсың. Көпшіліктен
айналайын, хал сұраушылар келіп жатыр
ғой. Науқастың халін сұраған да үлкен
сауаптардың бірі дейді. Барлықтарыңа
Алланың нұры жаусын!» деді ақырын ғана.
Хош айтысып шыққан Жұмабике апай үйдің
іргесінде тұратын көршіміз, көп жылдан бері
төсек тартып жатқан абысынымның үйіне бет
алды… Міне, бұл да Ұлыстың ұлы күнінде
атқарылар ұлы істердің бірі, ағайын.
Айнаш МӘМІЛЕНҚЫЗЫ.