Өнерлі өркениет

Қазіргі кезде республика көлемінде Елбасының «Болашаққа бағдар: Рухани жаңғыру» мақаласын жүзеге асыру мақсатында балалардың көркем шығармашылығының дамуына көмек көрсету және насихаттап жәрдем етуде атқарылып жатқан жұмыстар кеңінен өрістеп келеді. Соның бір айғағы – 21 наурызда Алматы қаласында өткен «Өнерлі өркениет» Республикалық балалар байқауы. Бұл байқауда өзінің «Алтынемел – ұлттық паркі» өлеңін мәнерлеп, нақышына келтіре оқудан Д.Қонаев атындағы орта мектептің
10-сынып оқушысы жас дарын Игібайқызы Назерке топ жарып, жүлделі І орынды иеленіп, «Диплом», Кубок, Медальон және «Өнерлі өркениет» деген төсбелгімен қоса
І дәрежелі Лауреат атанып, ауданымыздың мәртебесін биікке көтерді. Қоржынын толтырып оралған жеңімпазды мектеп директоры Е.Самылтыров шын ықыласымен құттықтап, болашақта да биік шыңдардан көрінетініне сенім артты. «Ұстазы жақсының – ұстанымы жақсы» деп халық бекер айтпаса керек. Қазақ тілі мен әдебиеті пәнінің мұғалімі Ж.Кегенбекова апайдың да өлең жазуда өзіндік орны бар екені белгілі. Шәкірттеріне мемлекеттік тілдің қолданылу аясын кеңейту, мемлекеттік тіл саясатын кеңінен насихаттау және талантты жастарды жан-жақты көтермелеу мақсатында үнемі байқауларға қатыстырып, оның нәтижесін көрсетіп келе жатқан ұлағатты ұстаздардың бірі. Өнерде де, білімде де таудай талабымен дараланып келе жатқан жеткіншек Игібайқызы Назеркенің әлі талай биікті бағындырары анық.

Г.Тілеужанқызы
Д.Қонаев атындағы орта мектеп директорының
оқу ісі жөніндегі орынбасары