Халықаралық аналар мерекесі

Жуырда аудандық Ә.Сарыбаев атындағы Мәдениет үйінде 8-наурыз Халықаралық әйелдер күніне арналған «Ана деген — тіршіліктің тірегі» атты мерекелік іс- шара өтті. Бұл жиынға аудан әкімі Алиев Бағдат Байшалұлы, мекеме басшылары мен жергілікті тұрғындар қатысты. Алғаш құттықтау сөзді және марапаттау рәсімі аудан әкімі Бағдат Байшалұлы алып:
— Көк желекті көктеммен бірге көңілге қуаныш сыйлай келетін ақ жаулықты әжелеріміздің, аяулы аналарымыздың, әпкелеріміз бен қарындастарымыздың төл мерекесі – 8 наурыз Халықаралық әйелдер күні құтты болсын! Тәуелсіз еліміздің бүгінгі күнге нығайып, әлем таныған абыроймен жетулеріне асыл аналарымыз, ардақты жеңгелеріміз бен әпке-қарындастарымыздың өлшеусіз үлес қосқандығын айтпасақ та белгілі. «Алып анадан туады» демекші, білімді басшы да, мықты спортшы да, ақын, әншілер де анадан туады. Сондықтан өмірдегі әйел жаққан шаңырақ сөнбесін, әр отбасыға береке-бірлік, татулық тілеймін. әйелдер қауымын әдемі әсерге бөлей келетін көктемнің жарқын да шуақты мерекелерімен құттықтаймын,-деп ауданымыздың бірқатар азаматшаларын марапаттады. Атап айтсақ, «Алуай» шаруа қожалығының мүшесі Күмісхан Есдәулетқызын, аудандық қаржы бөлімінің сектор меңгерушісі Ақмарал Әшімханқызын, «Кербұлақ су құбыры» мемлеккеттік коммуналдық кәсіпорынның бақылаушысы Наталья Яковлевнаны, Қарашоқы ауыл округі әкімі аппаратының бас маман-салық инспекторы Сағира Сағатбекқызын, Басши ауылдық округі әкімі аппаратының шаруашылық қызметкері Зина Садуақасқызын, Қоянкөз ауылының байланыс бөлімшесінің меңгерушісі Жанар Қуатқызын, Жайнақ батыр ауылдық округі әкімі аппаратының іс жүргізу жөніндегі бас маманы Ғазиза Шынасылқызын, «Кербұлақ су құбыры» мемлекеттік коммуналдық кәсіпорынның Қоғалы ауылы бойынша бақылаушысы Ғалия Мырзақасымқызын, Кербұлақ желілік техникалық цехының сату учаскесінің басшысы Назгүл Ертайқызын, Алтынемел ауылдық округінің Мәдениет үйінің меңгерушісі Мәдина Ахметқызын, аудан әкімінің Құрмет грамотасымен марапаттап, сыйлықтар табыстаса, ҚР «Өрлеу білім, ғылым технологиялық порталының білім беру ісінің үздігі төс белгісімен Қасенова Мейрамгүл Жұмаханқызын марапаттап, арнайы сыйлық табыс етті.
Келесі мерекелік құттықтау сөз тізгіні аудандық экономика және бюджеттік жоспарлау бөлімінің басшысы Төлегенов Шалқыбай Молдахметұлына берілді.
— Құрметті ақ жаулықты аналар, әпке, қарындастар көңілдеріңіз көктемдей көрікті болсын! Әркез сіздермен бірге жеке сүйіспеншілік, көктемнің шырайлы шуағы бола берсін. Әр күн сіздерге көктемгі сезімнің жылуын, қуанышын, бақыты мен махаббатын сыйласын. Шаңырақтарыңызда тек қана қуаныш болсын,- деген тілегін жеткізді.
Сондай-ақ, аудандық депутаттар корпусы атынан, аудандық орталық аурухана директорының орынбасары Жұмабек Қайырлинұлы, аудандық статистика бөлімінің басшысы Алпыс Ишанұлы, Д.Қонаев атындағы орта мектебінің қазақ тілі және әдебиет пәнінің мұғалімі Олжас Бауыржанұлы жалпы әйелдер қауымына ақ тілектері мен ыстық лебіздерін жеткізді. Іс- шара соңы аудандық Ә.Сарыбаев атындағы Мәдениет үйінің әншілерімен бірге, аудан әкімі Бағдат Байшалұлының арнайы шақырыуымен келген жерлесіміз, Тастыөзек ауылының тумасы, Сүйінбай атындағы Алматы облыстық филармониясының жеке дауыстағы әншісі, Халықаралық және республикалық байқаулардың лауреаты, 2017 жылы өткен 3000 адам қатысқан Халықаралық «Мен қазақпын» мега- жобасының Бас жүлдегері Бейбіт Мұсаевтың шағын концерттік бағдарламасына ұласты.
Дидар ДИХАНБАЕВ.