Аудандық мектеп лигасы – 2018

Спорт – әлем жаршысы, денсаулық кепілі. Елбасымыз Нұрсұлтан Әбішұлы Назарбаев қазақ халқының саны ғана емес, санасының өсуіне үлкен көңіл бөліп отырғаны осының айғағы. Еліміздің болашағы саналатын жас ұрпақтың салауатты өмір салтын қалыптастыру мақсатында «Саламатты өмір салты» бағдарламасы дүниеге келген болатын.
Осы орайда, жақында аудандық білім бөлімінің ұйымдастыруымен Д.Қонаев атындағы орта мектебінің спорт залында «Аудандық мектеп лигасы – 2018» спорттық іс-шарасы өтті.
Іс-шараға аудандық мәслихат хатшысы Рысбеков Бөкен Қабиұлы, ардагер спортшы, аудандық балалар мен жасөспірімдер мектебінің қызметкері Нұрмуханбетов Сапар Жұмабайұлы, Алматы облысы білім басқармасының дене тәрбиесі, спорт, алғашқы әскери даярлық өңірлі оқу практикалық және қосымша ғылыми білім беру орталығының әдіскері Маукеев Мәлік Күмісбекұлы, Қарасай аудандық білім бөлімінің бас маманы Дәурен Болатұлы, Кербұлақ аудандық білім бөлімінің әдіскері Сыздықов Талғат Абылахұлы, Д.Қонаев атындағы орта мектебінің директоры, аудандық маслихаттың депутаты Самылтыров Еркебұлан Амантайұлы, Сарыөзек орта мектебінің директоры Тазабекова Толқын Әнуарқызы, 49 орта мектебінің директоры Қожабергенова Айман Мелісқызы, Күреңбел орта мектебінің директоры Қыстаубаева Кәмшат Болатханқызы, ауданымыздың белді спортшы қыздарының бірі, самбо күресінен әлем чемпионатының әйелдер арасында күміс жүлдегері, 4 дүркін қола жүлдегері, Азия чемпионатының 5 дүркін жеңімпазы Құрышпаева Ділдаш Назарханқызы, ауданның спорт сүйер жастары және аудандық БАҚ өкілдері қатысты.
Қазақстанның Гимні ойналып, алғашқы сөз кезегін аудандық мәслихаттың хатшысы Бөкен Қабиұлы алды.
— Құрметті қонақтар, спортшылар және оқушылар! Бүгінгі салауатты өмір салтын насихаттау мақсатында өтіп отырған «аудандық мектеп лигасы – 2018» атты спорттық жарыстың ашылу салтанатына қош келдіңіздер.
Елбасымыз Нұрсұлтан Әбішұлы Назарбаев, «Спорт — елдің мерейін асырып абыройын тасытатын сала» деп бекер айтқан жоқ. Бүгінгі таңда Қазақстанның туын биікке көтеріп, спорт арқылы төрткүл дүниеге елімізді танытып отырған спортшыларымыз қаншама! Солардың бірі, бүгін ортамызда отырған ауданымыздың мақтанышы, Кербұлақ ауданының Құрметті азаматы — Ділдаш Құрышбаева.
Бұл спорт лигасы біздің ауданымыздан бастау алып отыр. Біз үшін бұл — үлкен мақтаныш. Бәріңізді осындай спорт мерекесімен құттықтап, дендеріңізге саулық, еңбектеріңізге табыс, спортта жеңіс тілеймін, — деп аяқтады сөзін мәслихат хатшысы.
Келесі кезекте сөз алған ардагер спортшы, аудандық балалар мен жасөспірімдер мектебінің қызметкері Сапар Жұмабайұлы, Алматы облысы білім басқармасының дене тәрбиесі, спорт, алғашқы әскери даярлық өңірлі оқу практикалық және қосымша ғылыми білім беру орталығының әдіскері Маукеев Мәлік Күмісбекұлы, Қарасай аудандық білім бөлімінің бас маманы Дәурен Болатұлы, Кербұлақ аудандық білім бөлімінің әдіскері Талғат Абылахұлы, Д.Қонаев атындағы орта мектебінің директоры, аудандық маслихаттың депутаты Еркебұлан Самылтыров, Елбасымыздың сарабдал саясатының нәтижесінде өтіп жатқан осындай спорттық іс- шаралардың өскелең ұрпақ үшін маңызы өте зор екенін тілге тиек етіп, барлық қатысушыларға сәттілік тіледі.
Ал өз кезегінде сөз тіз тізгінін алған Ділдаш Құрышпаева өзінің спортқа арнаған өмірінің қызықты сәттерінен бір үзік сыр шертіп, алған әсерлерімен бөлісті.
Салтанатты жиынның ашылу салтанатында Д.Қонаев атындағы орта мектебі оқушыларының және аудандық Мәдениет үйі әншілерінің дайындаған концерттік бағдарламасы назарға ұсынылды.
Келесі кезекте іс-шараның салтанатты ашылуы өз мәресіне жетіп, ауданымыздың мектептері арасында өтетін баскетбол жарысына ұласты.
«Дені сау ұлт – ел бәсекелестігінің факторы» деген еді Елбасымыз Нұрсұлтан Әбішұлы Назарбаев. Ендеше, мұндай іс-шаралардың маңызы да, мәні де зор. Осы орайда, біз өз тарапымыздан іс- шараны ұйымдастырған аудандық білім бөлімінің әдіскері Сыздықов Талғат Абылахұлына, шараның өтуіне үлкен үлес қосқан Д. Қонаев атындағы орта мектебінің ұжымына алғысымызды білдіреміз.
Дина АМАНҚЫЗЫ