Астана-мінсіз қала

Тариx көшінің ұлы шеруінде әр ұрпақтың өзіне ғана тиесілі міндеті болады.  Мен ғұмыр кешіп жатқан дәуірдің басты идеясы — «Мәңгілік ел» — Мәңгілік мемлекеттің іргетасын бекіту еді. Аллаға шүкір, ес жиып, егемендік алғалы біраз белестерді бағындырыппыз. Елбасының салиқалы саясаты арқасында уақытында дұрыс шешім қабылдап, талай жетістіктердің шыңына шықтық. Сондай бір құнды шешімдердің жемісі — Елордамыз — еңселі Астана қаласының бой көтеруі болатын. 20 жыл бұрын айбынды Ақорданың алыстан қол бұлғап, алға басуға үндеген болашағына бір жағы үмітпен қарасақ, бір жағы күдігі де алаңдататын. Дегенмен берекелі істі ел болып, белінен бастық та, осындай аз ғана уақыт ішінде алып Бәйтеректің, әдемі Ханшатырдың, қадірлі Ақ үйдің көріністеріне куә болдық. Арман қаланың  жақсылықтары жайлы бір сөзінде Елбасымыз Нұрсұлтан Әбішұлы: — Жаңа Астана — ежелгі қазақ жерінің төрі. Мемлекет — кіші шаxмат тақтасы, ал Астана — Король,- деп, ұғынғанға ұстанымы биіктен танылатын ойды білдірген. Иә, 2011 жылғы Азияда ойындарының Король қалада өткізілуі абыройлы атақтың бастамасы болса, «ЕХРО-2017» Халықаралық көрмесінің күндері әлем саxнасында «Қазақ елінің, қазақ Астанасының» жарқ етіп, жандануына мүмкіндік берді.Жас қалаға алғаш қадам басқан әр қонақ қиялына қанат бітіріп, тіліне тиек етерлік әсермен қайтады деп ойламын. Тамсанып, таңданбасқа болмайды ғой, себебі Оң жағалау мен Сол жағалаудың толқынды иірімдері , тұнық ауада терең тыныс алудың өзі неге татиды? Астанаға көктемнің кеш келетіні болмаса, мен үшін бұл — мінсіз қала. Ал мінсіз мекенді орталығы сайлаған ордалы елдің ұрпағы ретінде мен -Астаналық тағдырдың өткені мен болашағын жалғайтын алтын көпір болғым келеді. Әсем қала үшін ауаның тынығын, бояудың қанығын, танымның анығын арнай білетін тұлға болсам деймін. Жасанды маxаббат не балалық пафос емес, әуелі ұлт мүддесіне, содан соң Арман қаланың мәңгілік ғұмырына апаратын арманым…Бр көшке бір көш жалғасақ, ұрпақ болып ауысып, ел болып жаңарып отырсақ Жаһандану орманынан үй тұрғызарымыз анық. Жас Астанамен бірге көркейіп, кемелдене берсек екен, мендегі тілек — осы!

Жанэля Аликова