Ерлікке тағзым

Жуырда аудан орталығындағы жауынгер-интернационалистер паркінде Кеңес әскерінің Ауған жерінен шығарылғанына 29 жыл толуына орай «Жастығын жалын шарпығандар» атты іс-шара өтті. Бұл іс-шараға аудан әкімінің орынбасары Айпеисов Күмісбек Әбілашұлы, Сарыөзек әскери гарнизонының бастығы, подполковник  Дарбишев Мырзағали Вахапұлы, Ауған соғысы ардагерлерінің төрағасы Амантай Ербосынов және ауған соғысының ардагерлері қатысты. Алғашқы сөз тізгінін аудан әкімінің орынбасары Айпеисов Күмісбек Әбілашұлы алып:

— Ауған соғысының ардагерлерін құрметтеу жылдан-жылға жалғасын тауып келеді. Осындай ауыр аманат арқалап, өмір мен өлім белдескен қанды шайқасқа қатысып, батылдық пен ерліктің ерен үлгісін көрсеткен қаһарман жерлестерімізге арналып еліміздің әр түкпірінде ескерткіштер бой көтеруде. Сол кездегі  қатерге бел буып, батырлық пен қайсарлықтың үлгісін көрсетіп, қаһармандық танытқан, өздерінің Отан алдындағы парызына адал болған Ауған соғысының ардергелеріне мың алғыс айтамыз. Жыл сайын ақпан айының ортасында,  Ауған соғысында қаза тапқан жауынгерлерді еске алып, олардың рухтарына бас иеміз. Өйткені, бұл соғыста 18-19 жастағы өрімдей  жүздеген жас жат елінде интернационалдық борышын өтеу жолында жан тапсырып, мыңдаған қандастарымыз оқ пен оттың ортасынан жарақатпен оралды. Баласын, бауырын, ағасы мен інісін майданға шығарып салған отандастарымыз да, қанды қырғынның ортасынан оралған сарбаздардың да жүрегінде Ауғанстан қасіреті мәңгілік қара дақ болып қалғаны анық. Он жылға созылған сұрапыл соғысқа «Бірінші міндет — Отанды қорғау» деп түсінетін азаматтарымыз аттанған болатын.Сондықтан өскелең ұрпақ осы ағаларына қарап, бой түзеп өсіп, батыл болуға, ержүрек болулары тиіс,- деп сөзін аяқтады.

Сарыөзек гарнизонының бастығы подполковник Дарбишев Мырзағали Вахапұлы:

— Міне, биыл Ауған соғысының аяқталғанына 29 жыл толды. Қаншама жылдар өтсе де бұл — ұмытылмас жайт. Ардагерлеріміздің көрген соғысын кейінгі ұрпақ көрмесін дейміз, дұшпанымызға  да тілемейтініміз анық. Бұл күнді атап өту — өскелең ұрпаққа патриоттық тәрбие беріп, қоғамдық белсенділігі мен азаматтық ұстанымын нығайтудағы бірден-бір үлгі болып табылады. Әр жыл сайын ғана емес әр жұма күндері  соғыста қаза болған жерлес бауырларымызға құран бағыштап, ерен ерліктерін әрдайым еске алып жүрсек, нұр үстіне нұр болар еді,- деді.

Ауған соғысы ардагерлер ұйымының төрағасы Амантай Ербосынов:

— Бұл сұрапыл соғыс мәңгі жадымызда. Сондықтан соғыс кезінде шейіт болған бауырларымыздың бәрін қаһарман деп айтуымызға толықтай негіз бар. Майдан шебінде шейіт болған қаруластарымның есімі мәңгі ұмытылмайды. Ауған жеріндегі 10 жылға созылған майданда қасық қаны қалғанша күрескен қандастарымыздың ерліктері, қару алып, жауға аттанғаны, снарядтардың даусы мен бейнелері әлі көз алдымда. Ол күндер енді қайтып келмесін, еліміз аман, жұртымыз тыныш болсын.

Іс-шараға қатысушылар Ауған соғысында ерлікпен қаза болған азаматтардың ескерткішіне гүл шоқтарын қойып, естелікке суретке түсті.

Аталмыш іс-шара Д.Қонаев атындағы орта мектебінде және Күреңбел қазақ орта мектебінде «Ауған соғысы ардагерлері — жоғарғы рухтың айқын көрінісі» атты патриоттық рухта өткен ерлік сабақтарымен жалғасын тапты.

Д.Қонаев атындағы орта мектептің директоры Самылтыров Еркебұлан Амантайұлы:

— Құрметті оқушылар және бүгінгі біздің кешіміздің қонақтары. Кеңес әскерлерінің ауған жерінен шығарылғанына 29 жыл толуына байланысты өтіп жатқан «Тория Сергей Ивановичті еске алу және Ауған соғысы ардагерлерімен кездесу» кешіне хош келдіңіздер. Бүгінгі кешіміздің мақсаты — Ауған соғысы жайлы тереңірек  біліп-тану, мәлімет алу. Ер жүрек ағаларымыздың ерліктерін жас ұрпаққа, көпке үлгі ету. Сіздердің отбасыларыңызға береке-бірлік тілейміз. Денсаулықтарыңыз мықты болып, ортамызда аман-есен жүрулеріңізге тілектеспін,-деп ыстық ықыласын білдірді.

Аудандық білім саласы қызметкерлері кәсіподақ ұйымының төрайымы Ләззат Момбаева ақ тілегін айтып, Ауған соғысы ардагерлеріне сыйлықтар табыс етті.

Іс-шара соңы ардагерлердің жас сарбаздарға куәлік тапсыруымен жалғасын тауып, мектеп оқушыларының дайындаған шағын концерттік бағдарламасына ұласты.

                                                                           Дидар ДИХАНБАЕВ.