Қыс өрнектері — 2018

Жақында Жайнақ батыр ауылының бас жағындағы алаңда аудан әкімі Алиев Бағдат Байшалұлының бастамасымен «Қыс өрнектері-2018» мәдени-тынығу, спорттық іс-шарасы өтті. Алаңда мерекеге арналған сахна, қазақ үй, хан шатыры орнатылып іс-шараның  атына сай безендірілген. Кіре берістен сахнаға дейін он екі айдың мұзбен өрнектелген бейнелері арнайы қардан жасалған қондырғыларға орнатылған. Шатырлардың алдына ілінген түрлі-түсті жалаушылар, қардан соғылған аққалалар мерекеге жиналғандардың көңіліне ерекше күй сыйлағандай.

Қысты шығарып салу мерекесіне аудан әкімі Бағдат Алиев, аудан әкімінің бірінші орынбасары Күмісбек Айпеисов, аудан әкімінің орынбасары Болысбай Момбаев, аудандық мәслихаттың хатшысы Бөкен Рысбеков және аудан тұрғындары қатысты.

Мерекені екі тілде жүргізген аудандық Мәдениет үйінің қызметкерлері Мәулеш Әбжаппаров пен Айдана Мұсағұлова осы шараның өтуіне ұйытқы болған аудан әкімі Алиев Бағдат Байшалұлын құрметпен сахна төріне шақырып, алғашқы сөз кезегін берді.

— Қадірменді ағайын, құрметті қонақтар! Бүгінгі Жайнақ батыр ауылдық округінде өтіп отырған мерекеге қош келдіңіздер! Елбасымыздың «Болашаққа бағдар: Рухани жаңғыру» атты мақаласының аясында ауданымызда көптеген іс-шаралар өтуде. Орыс халқының «Масленница» мерекесі қарсаңында өтіп отырған бұл мереке ауданымызда тұратын түрлі ұлттардың салт-дәстүрін, мәдениетін көрсете отырып, көпұлтты халықтың ауызбірлігін, ынтымағын, достығы мен татулығын паш ету. Біздің ата-бабаларымыздан тараған ұрпақтың, қазақтың киелі жерінде тұратын әртүрлі ұлт өкілдерінің тағдыры қазақтың мәдениетімен тығыз байланысты. Сондықтан да бәріңізді «Қыс өрнектері» мерекесімен құттықтап, дендеріңізге саулық, отбасыларыңызға береке тілеймін,-деп ізгі тілегін жеткізді.

Бұдан соң жиналған халық Көксу, Шұбар, Талдыбұлақ, Қоғалы, Жайнақ, Алтынемел, Қаспан ауыл округтері дайындаған ұлттар достығын паш ететін, думанды-атты шаналар шеруін тамашалады. Алғашқы шаналар шеруін Қоғалы ауылдық округінің казактары «Қазақстан — көп ұлтты ел» тақырыбында үш аттылы шанамен бастап өтті. Бұдан соң Жайнақ батыр ауылдық округінің корей, татар, қазақ ұлтының, Көксу ауылдық округінің шаналар шеруі әсем ұлттық киімдерімен, барлық сән-салтанатымен жүріп өтсе, шеруді «Қазақстан — достықтың киелі бесігі» тақырыбымен Алтынемел ауылдық округінің «Шешен мәдени орталығы», ал Шұбар ауылдық округінің қатысушылары қар шанасымен шеруді аяқтады.

«Тәуелсіздік — тұғырым» атты бір аттылы шаналар, көкпаршылар шеруі де қазақтың тектілігінің, ұлтаралық татулығының үлгісін көрсеткендей болды.

Спорт қалашығында өткен спорттық ойындарға да ауданымыздың тұрғындары белсене атсалысты.

Жиналғандарға керемет көңіл-күй сыйлаған әдемі мереке аудандық Мәдениет үйі бөлімінің, ауылдық Мәдениет үйлері қызметкерлері дайындаған концерттік бағдарламаға ұласты.

«Берекені көктен сұрама, бірлігі бар көптен сұра» деген ғой дана халқымыз. «Қыс өрнегі-2018» мерекесі жиналған қауымға ерекше әсер қалдырды. Ауданнын үлкен-кішісі келіп, қыс мерекесін қызықтап, көңілдері марқайып қайтты.

Осы орайда жақсы бастама көтеріп, халықтың саламатты өмір салтын ұстануына ықпал ететін осындай шараның өтуіне ұйытқы болған аудан әкімі Бағдат Байшалұлына, мерекені өте жоғары деңгейде ұйымдастырған Жайнақ батыр ауыл округінің әкімі Асқар Оңғарұлына, күннің ызғарына қарамай, әсем әндерімен шашу шашқан әншілер қауымына халық атынан алғыс айтамыз.                                                                                                      

Дина АМАНҚЫЗЫ.