Туған жерім – тал бесігім

Ә.Сарыбаев атындағы Мәдениет үйінде жас ұрпақты Отанын, елін, жерін сүюге баулу, жаңа өнер иелерін тауып, халыққа кеңінен насихаттау мақсатында «Туған жерім – тал бесігім» атты патриоттық ән байқауы болып өтті.

Аталмыш байқауға ауданымыздың Қарашоқы, Шұбар, Басши, Шанханай, Талдыбұлақ, Сарыөзек, Қоянкөз, Алтынемел, Доланалы, Көксай, Жоламан, Көксу ауылдарынан 15 үміткер қатысты.

Байқаудың шарты бойынша үміткерлер туған жер туралы екі ән орындады. Қатысушы үміткерлердің жас ерекшелігіне шек қойылған жоқ. Жеңімпаздарды анықтау барысында қазылар алқасы үміткерлердің орындаушылық  шеберлігіне әннің байқау тақырыбына сәйкестігіне  дауыс ырғағына, сахна мәдениетін сақтауына баға берді және байқауға халықаралық, республикалық байқаулардың лауреаттары қатыстырылған жоқ.

Туған жердің, өскен өңірдің қадірін жеткізе білген «Қазақстаным менің», «Үш меркі», «Туған жер», «Отан ана», «Қазақстан – бақытым», «Атамекен», «Тек алға», «Біз Отанның ұланымыз», «Ризамын елім саған», «Батырлар ұланы» сынды елімізде кеңінен таралған әндер орындалды. Әр әншінің өзіндік репертуары, өзіндік орындау шеберлігі бар. Осыларды ескерген әділқазылар алқасының шешімімен жас болса да жалын атып тұрған қоңыр иесі, болашағынан көп үміт күттіретін Қоянкөз ауылының әншісі Нұрлан Сайлыбаев Бас жүлдені жеңіп алып жерлестерін қуантса жас әнші Жансая Серікболқызы жүлделі I-ші, алтынемелдік Зәкір Әсем II-ші орындарды иеленіп мерейлері тасыды. Ал III-ші орынды басшилік Метербай Мадияр мен талдыбұлақтық Бейбіт Мейірбек өзара бөлісті. Ал жоламандық Меруерт Тоқтарбаева, шұбарлық Ардақ Есенова, көксайлық Әлібек Арайлым ынталандыру сыйлығын місе тұтты.

Байқауды қорытындылаған аудандық мәдениет және тілдерді дамыту бөлімінің басшысы Әділхан Әділхан қатысушыларға алғысын білдіріп, жүлдегелерді Дипломмен, бағалы сыйлықтармен марапаттады.

«Мәдениет – парасаттың өлшемі» десек ауданымызда өнерпаздардың күннен-күнге көбейіп келе жатқаны көңіл қуантады. «Өнерін өрге шығарғанның өзі де төрге шығады» дегендей, осындай игілікті шараларға мұрындық боп жүрген мәдениет және тілдерді дамыту бөлімінің басшысы Әділжан Әділханға мәдениет үйінің директоры Гүлмира Өтегеноваға, мәдениет үйінің қызметкерлеріне өз тарапымыздан алғыс білдіреміз. Ел игілігі үшін атқарылатын жұмыстарыңыз жемісті болсын.

                                                                                            Дина АМАНҚЫЗЫ