Жаса, мәңгі тәуелсіз ел !

 Жуырда Д.Қонаев орта мектебінде Тәуелсіздік мерекесіне арналған «Елімнің бақытын тербеткен Тәуелсіздік» тақырыбында салтанатты жиын өтті. Алғашқы құттықтау сөзін Д.Қонаев атындағы орта мектептің директоры Еркебұлан Самылтыров алып:

— Міне Тәуелсіздіктің туы желбірегеннен бергі кезеңдерде төрт құбыламыз түгенделді. Аз уақыттың ішінде талай белестерді бағындырдық. Осы жылдар арасында еліміз өзінің дүниежүзілік қоғамдастықтың бөлшегі ретінде бүкіл әлемге танылып үлгерді. Бұл тәуелсіздік оңай жолмен келген жоқ. Сондықтан сіздерді Қазақстанның жаңа тарихындағы аса маңызды мерекелерінің бірі ең негізгісі — Тәуелсіздік күнімен шын жүректен құттықтаймын,-деді. Сондай-ақ, желтоқсан оқиғасының куәгерлері, мектептің байырғы ұстаздары — Роза Қадырқызы, Айнаш Баймұханбетова, Жұматай Шалбайұлы ақ тілектерін айтты.

Салтанатты жиында Д.Қонав атындағы орта мектептің белсенді, еңбекқор, нағыз патриот оқушы ұл-қыздары «Жас Ұлан» және «Жас Қыран» жасөспірімдер ұйымы қатарына қабылданып, қабылданушы шәкірттерге төс белгі тағу құрметі мектеп директоры Еркебұлан Самылтыровқа және желтоқсан оқиғасының куәгерлері, директордың тәрбие ісі жөніндегі орынбасарлары мен мектеп ұстаздарына берілді. «Жас Ұлан» мен «Жас Қыран» жасөспірімдер бірлестігі ұйымына қабылданған оқушыларды құттықтау үшін сөз өзін-өзі басқару тобының және мектеп Президенті Назерке Игібайқызына берілді.

-«Жас Ұлан» мен «Жас Қыран» жасөспірімдер бірлестігі ұйымына қабылданғандарыңыз құтты болсын! Мемлекетіміздің болашағы — сіздерсіздер. Құрметті ата-аналар, тәуелсіздігіміз баянды болсын, еліміз аман, заманымыз тыныш болсын,- деді. Құттықтау сөз тізгінін алған директордың тәрбие ісі жөніндегі орынбасары Гүлмира Нұрсапақызы бүгін қазақ елі үшін айтулы мерекелерінің бірі екенін, тәуелсіздігіміздің ең басты құндылық екенін, тәуелсіздіктің арқасында алып мемлекеттермен тереземіз тең екенін жеткізді.

Тәуелсіздік мерекесіне тұспа-тұс келген үйірме апталығында үйірме жетекшісі Динара Уразалиева, технология пәнінің мұғалімі, үйірме жетекшісінің көмекшісі Гүлжамал Туғанбаеваның ұйымдастырған «Алтын қол» коллекциясында өздерінің туындыларын көрсетті. Атап айтар болсақ, «Тәуелсіздік көйлегі», киізден жасалған заманауи киімдер, фетр матасынан тігілген қазақи көйлектер, оқушыларға арналған әдемі сөмкелер қонақтардың назарына ұсынылды. Сонымен қатар, технология пәнінің мұғалімдері — Бекен Анапиянов, Абзал Байбулатовтың шәкірттерінің жасаған бұйымдары, бейнелеу өнері пәнінің мұғалімі Бердімұрат Домайдың шәкірттерінің салған әсем суреттері көздің жауын алды. Салтаннатты жиын соңы мерекелік концертке жалғасты.

Дидар АСҚАРҰЛЫ