Дөңгелек үстелде

Жуырда  «Нұр Отан» партиясының желілік кестесіне сәйкес, Кербұлақ аудандық мәслихат депутаттары  аудан жастарымен кездесті. Жалпы дөңгелек үстелге аудандық мәслихат  депутаттары — аудандық аурухана директорының орынбасары Жұмажанов Жұмабек Қайырлинұлы, «Кербұлақ су құбыры» мемлекеттік коммуналдық кәсіпорнының директоры Садықова Жұмакүл Сейдахметқызы, Д.Қонаев орта мектебінің директоры Самылтыров Еркебұлан Амантайұлы, Сарыөзек ауылдық округінің әкімі, «Сарыөзек» БПҰ төрағасы Тұрсынбаев Батырхан Ешметұлы, сондай-ақ, №49 орта мектебі, Д.Қонаев атындағы орта мектеп, Күреңбел қазақ орта мектебі, Сарыөзек орта мектебінің мұғалімдері және басқа да мекеме қызметкерлері қатысты.

Жас мамандар өздерін толғандырып жүрген сұрақтар қойды. Еркебұлан Амантайұлы сөз алып: «Қазіргі заман білім мен еңбекте. Оқу оқып, білім алып, талмай еңбектенсеңіздер, абыройлы боласыздар, жемісін жейсіздер. Болашақ жастар үшін барлық жағдай жасалынған, тек жалқаулықты қойып, берілген тапсырманы тиянақты аяқтап, алдыға ұмтылуларыңыз тиіс» деді.

Сарыөзек ауылдық округінің жастар ісі жөніндегі нұсқаушысы Омарова Әсемгүл Кенжеханқызы сөз кезегінде:

— 2015 жылы осы жұмысқа орналастым. Екі жыл ішінде «Ай-сана» балабақшасы, «Күреңбел» қазақ орта мектебі, спорт комплексі ашылып, ауданымызда талай жастарымыз жұмыспен қамтылып, барлық жағдай қарастырылған. Небәрі екі жыл ішінде ауданымыз көркейіп, басқа аудандардың алды болып келеді. Аз уақыт ішінде көшелерге күрделі жөндеу жүргізіліп, жарықтар орнатылды. Мәслихат депутаттары, мекеме қызметшілері, мектеп ұстаздарымен біз тікелей жұмыс жасаудамыз.  Жастарға бағыт-бағдар көрсетіп, білгендеріңізді үйреткендеріңіз үшін сіздерге мың алғыс айтамыз,-деді.

Д.Қонаев атындағы орта мектебінің тарих пәні мұғалімі Күнсұлу Тасмағанбетова: «Қазіргі кезде үш тілді білу — заман талабы. Осы ретте Президентіміз Н.Ә.Назарбаев «Қазір біздің балаларымыз қазақ тілімен қатар, орыс және ағылшын тілдерін меңгеру үшін жағдайлар жасалып жатыр. Үштілділік мемлекеттік деңгейде ынталандырылуы керек» деген болатын өз Жолдауында. Сондықтан, Сарыөзек аулында ағылшын тілін оқытатын курс, үйірме ашылса дұрыс болар еді» деген ұсынысын жеткізді.

Күреңбел қазақ орта мектебінің психологі Гүлнар Қосбаева: «Бізді ерінбей еңбек етіп, тек сол кезде ғана табысқа жетуге болатынын айтып, өз өмірлік тәжірибелеріңізбен бөліскендеріңізге көп рахмет. Бүгінгі кездесуден біздер, жастар, керемет әсер, күш-жігер алдық. Жұмыстарыңыз жемісті, отбастарыңызда береке-бірлік, амандық тілеймін» деп, алдыңғы толқын ағаларға алғысын білдірді.

Дидар ДИХАНБАЕВ.