Жетісу облысында жас саясаткерлердің жаңа буыны даярланады

Жетісу облысында жастардың мемлекеттік басқару мен қоғамдық-саяси қызметке қатысуын арттыруға бағытталған «Жас саясаткер мектебі» атты ауқымды білім беру жобасы басталды.
Наурыз айынан маусымға дейін жалғасатын бұл бастама өңірдегі жас көшбасшылардың кадрлық резервін қалыптастыруды көздейді. Жоба аясында жастар мемлекеттік басқару жүйесі, заң шығару үдерісі, жергілікті өзін-өзі басқару және саяси жобалау бағыттары бойынша кәсіби білім алады.
Жобаның республикалық деңгейдегі ерекшелігі – қатысушылардың тек теориямен шектелмей, нақты практикалық дағдыларды меңгеруінде. Бағдарлама қорытындысы бойынша:
Үздік шыққан 10 қатысушыға 100 000 теңге көлемінде ақшалай сыйақы беріледі.
Оқу бағдарламасын сәтті аяқтаған 30 тыңдаушыға арнайы сертификаттар табысталады.
Облыстың аудандары мен қалаларында кемінде 4 көшпелі іс-шара ұйымдастырылып, өңірлік мәселелерді талқылау алаңдары құрылады.
Жобаға қатысушылар конкурстық негізде таңдап алынады. Іріктеу кезінде үміткердің қоғамдық жұмыстардағы тәжірибесі мен мотивациясы басты назарда болады. Тәжірибелі лекторлар мен сарапшылар таныстыратын білім беру бағдарламасы аясында ай сайын кемінде екі ірі оқу шарасы өткізілмек.
Жобаның аяқталу кезеңінде кемінде 200 адамның қатысуымен кең көлемді қорытынды сессия өтеді. Сонымен қатар, қатысушыларға жобаның арнайы символикасы бар имидждік өнімдер үлестірілмек.