Спорт — менің өмірім

«Асыл – тастан, өнер — жастан» демекші, еркін күрестің қыры мен сырын, әдісі мен тәсілдерін меңгеріп, спорт әлемінде қалықтаған намысшыл, еліміздің патриот ұлдарының бірі — Жұмағазиев Дәурен Нұрдәулетұлы десек болады. Тәуелсіздік жылдарында додалы жарыстарға қатысып, талайларды шаң қаптырып, жүлделі орындарды иеленген спортшымыз «Жүз жаңа есім» жобасына еніп отыр.

Ол Шоқан ауылында  1989 жылы шілде айында дүниеге келді. Әкесі – Нұрдәулет Мұхамеджанов жеке кәсіпкер, анасы Анархан Үмбеталинова ұстаз. Бүгінде олар Алматы қаласының тұрғындары.

7-сыныпқа дейін Шоқан ауылында оқыған Дәурен Нұрдәулетұлының алғашқы жаттықтырушысы Ғалымбек Жорабеков болды. Одан соң Алматы қаласында Кәркен Ахметов атындағы спорттағы дарынды балаларға арналған мектеп-интернатта 11-сыныпты аяқтады. Онда Руслан Өмірәлиев атты азамат жаттықтырды. Шәкірт тәрбиелеудің жауапты да қайырымды іс екені баршамызға аян. «Ұстаны соққан пышағынан таниды» дегендей, оның ұстаздары спорт десе, ішкен астарын жерге қоятын жандар еді. Міне, осындай ұстаздардан тәлім-тәрбие алған Дәурен ініміздің бағындырар биік шыңдары мен асар асулары көптеп саналды. Мектеп қабырғасында жүргенде-ақ, жаттықтырушыларының үкілі үмітін ақтап, көптеген жеңістерге қол жеткізген ол есейген шағында да талай жеңістердің жалауын желбіретті. Өзіне сенімді, күш-жігері мол, ақылы мен қайраты ұштасқан Дәурен еркін күрестен 2010 жылы Азия чемпионатында ІІІ орын, 2011 жылы Әлем чемпионатында қола жүлде иегері, 2011 жылы Азия чемпионатында алтын медаль иегері, 2013 жылы Тахти кубогінің қола жүлде иегері, 2014 жылы Қазақстан Республикасының чемпионатында алтын медаль иегері, 2015 және 2016 жылдары Қазақстан Республикасының чемпионатында ІІІ орын иегері атанды.

Дәурен Нұрдәулетұлы он бір жылдықты аяқтаған соң республикалық спорт колледжін тәмамдады. Арманы биік спортшы бұл оқуын місе тұтпай, жоғары білім алуға ұмтылды. «Талпынған жетер мұратқа» дегендей, ол көп кешікпей, Қазақ спорт және туризм академиясының туризм бакалавры мен магистратурасын да ойдағыдай аяқтады. Отан алдындағы адалдығы бойынша 2011-12 жылдар аралығында Алматы ішкі әскери бөлімшесінде әскери борышын өтеді.

Бүгінде ол Талдықорған қаласында, Жастар спорт сарайында жаттықтырушы болып еңбек етіп келеді.

— Әр күрестің өз ерекшеліктері бар. Әйтсе де, еркін күрес – ең қиын күрес дер едім. Себебі, еркін күресте барлық денеден ұстап күреседі. Бүкіл дене қарсыласқа дайын болуы керек. Сол себепті көп дайындықты қажет етеді. Жеңіске жету оңай емес, әрине. «Еңбек бәрін жеңбек» дегендей, талмай еңбек етудің арқасында ғана нәтиже болады. «Армансыз адам – қанатсыз құспен тең» демекші, әркімнің өз арманы, мақсаты болады ғой. Менің арманым – жетпеген жетістіктерге қол жеткізу, шәкірттерімнің арасынан әлем, олимпиада чемпиондарын шығару. «Еңбек ер атандырады» деп жатамыз, мақсатым – уақытты тиімді пайдаланып, сапалы еңбек етіп, дүбірлі жарыстарда жеңімпаз атанып, егеменді еліміздің атағын асқақтатып, көк туын желбірету,-дейді сәті түскен сұхбатымызда.

Дәурен Нұрдәулетұлына жігерің жасымай, күш-қуатың еселеніп, аңсаған армандарыңа жетуіңе шын жүректен тілектеспіз дейміз.

Айнаш ҚАСЕНОВА.