Ардагерлер бас қосты

Ішкі істер органдары – қоғамда құқұқтық тәртіпті қағадалап және азаматтардың өмірінің қауіпсіздігін қамтамасыз ететін маңызды құрылымдардың бірі боп саналады.

Сақшылардың кәсіби қызметі зор жауапкершілігімен, тәуекелге бел бууымен, кейде ажалға да бас тігуімен құнды, 10 қараша күні Кеңес заманындағы ішкі істер органының құрылғанына  100 жыл толды.

Осы орайда Ә.Сарыбаев атындағы аудандық Мәдениет үйінде аталмыш мерекеге орай салтанатты жиын болып өтті.

Жиынға аудан әкімі Бағдат Байшалұлы Алиев, аудан прокуроры Саян Алтынбекұлы Шалғымбаев, АІІБ-інің бастығы Бостукпаев Марат Сағындықұлы, Алматы облысы ішкі істер органдарының ардагері, облыстық Ардагерлер кеңесі  төрағасының орынбасары Жүсіпов Марат Абдуллаұлы,  ішкі істер органының ардагерлері, АІІБ-інің құрамы қатысты. Қазақстан Республикасының Гимні ойналып, алғашқы құттықтау сөз кезегін аудан әкімі  Бағдат Байшалұлы алды:

—         Армысыздар құрметті ардагерлер, қонақтар! Кеңес заманындағы ІІО құрылғанына 100 жыл толуына орай өтіп жатқан мерекемен сіздерді шын жүректен құттықтаймын. Кеңес үкіметі кезінен бастап қазірге дейін құқық қорғау жолында күндіз-түні дамыл таппай халықтың тыныштығын сақтап, өмірлерін денсаулығын қорғау жолында аянбай еңбек еткен ардагерлеріміз бүгін ортамызда отыр. Осындай айбынды батырларымыздың ерен еңбегінің нәтижесінде бүгінгі «қой үстінде бозторғай жұмыртқалаған» берекелі заманға қол жеткізіп отырмыз. Бүгін еліміздің тыныштығымен қоғамдық тәртіпті, мемлекеттің мүддесін қорғап келген Кеңес заманындағы милиция органының құрылғынына бір ғасыр болыпты. Бұл орган еліміз егемендік алғаннан кейін полиция деген атауға ие болсада атқаратын жұмыс жауапкершілігі сондай.

Құрметті ішкі істер  органдарының қызметкерлері! Халқымыздың тыныштығын сақтауда атқарып жүрген жұмыстарыңыз қиын әрі қауіпті екенін жақсы білеміз. Сондықтан мемлекет те жергілікті билік органдары да сіздердің еңбектеріңізді бағалайды. Елбасымыз Нұрсұлтан Әбішұлы Назарбаев патриот болу дегеніміз Қазақстанды мақтан етіп қана қоймай, еліміздің мүддесін қорғауда өзіңді аямау, ел игілігі үшін еңбек ету деген болатын. Біз бүгінде өзіндік бет-бейнесі,  өзіндік ұстанымы бар, алдына үлкен мақсаттар қойып, соған қол жеткізе алатын амбициясы зор ілгері ұмтылған мемлекетпіз. Өз қызметтік міндетін атқаруда адалдық танытып, халық арасында сақтық жұмыстарын жүргізіп, ел тыныштығын күзетіп, өмірлерін қорғаған ардагерлерімізге алғыс білдіреміз.

Қымбатты ардагерлер! «Милиция» деген сөз сіздер мен біздерге өте ыстық. Өйткені біз Кеңес  кезінде тәрбиеленген азаматтармыз. Ол кезде қазіргідей жақсы жағдай болған жоқ, техникалық база да өте төмен болды. Соған қарамастан күн-түн демей еңбек еттіңіздер. Сол үшін қандай құрметке болса да лайықсыздар.

Бүгінгі таңда үкіметіміздің, облыс әкімі Амандық Ғаббасұлының бастамасымен полиция қызметкерлері көлікпен, баспанамен қамтамасыз етілген, жағдайлары жасалған. Сол үшін қуаныштымыз. Елбасына, өңір басшысына рахмет. Елімізде тыныштық болсын. Ауданда қылмыс азайып, бүгінгідей іс-шара көбейсін.

Осылайша жүрекжарды тілегін жетізген аудан әкімі, Кеңес дәуіріндегі ІІО-ның ардагері, Сарыөзек ауылының азаматы Әділбаев Берік Әділбайұлына Кербұлақ ауданының Құрметті азаматы атағын берді.

Өз кезегінде сөз алған Алматы облысы ІІО ардагерлер кеңесі төрағасының орынбасары Марат Абдуллаұлы Жүсіпов. Елбасы Нұрсултан Әбішұлы Назарбаевтың халқына Жолдауында көрсетілгендей, елімізді қолымыздағы бар мүмкіндіктер мен артықшылықтар арқылы әлемдік экономикаға кіріктіруге бағытталған мемлекеттік саясаттың бір бағыты құқық қорғау іс-тәжірибесін жетілдіру және құқық тәртібін  нығайту болып табылатынын тілге тиек етіп, ардагерлерді совет милициясының 100 жылдық мерейтойымен құттықтап, бүгінгі күні ардагерлердің қуанышын бөлісіп келіп отырған аудан әкімі Бағдат Байшаұлына үлкен рахметін айтып, облыстық Ардагерлер кеңесінің шешімімен аудан әкімін «Совет милициясына 100 жыл» мерейтойлық төсбелгісімен марапаттады. Сонымен қатар, аталмыш төсбелгімен Кербұлақ ауданының прокуроры Шалғымбаев Саян Алтынбекұлы, АІІБ бастығы Бостуқпаев Марат Сағындықұлы марапатталды. Осы мереке қарсаңында 60 жасқа толып отырған, ішкі істер органдарында көп жыл абыроймен қызмет атқарған ардагер Мамбетбаев Нұрмолда Жоламанұлын мерейтойымен құттықтаған әріптістері ардагерлерге ІІД-нің Алғыс хатын «Совет милициясына 100 жыл» төсбелгісін табыстап, иығына шапан жапты.

Әріптестерінің құрметі мен ыстық ықыласына тәнті болған Нұрмолда Жоламанұлы өз тарапынан әріптестерін айтулы мерекемен құттықтап, ризашылығын білдіріп, жастарға ақыл-кеңесін айтып, естеліктермен бөлісті.

Жиын барысында еліміздің дамуына үлкен үлестерін қосқан, қиын-қыстау кезеңде де сан мәрте батырлықпен ерліктің үлесін көрсетіп, бүгінгі күні еңбектерінің зейнетін көріп отырған бір топ ардагер «ішкі істер органдарының ардагері» және «Совет милициясына 100 жыл» мерейтойлық төсбелгілерімен марапатталды.

Бұдан соң АІІБ-нің қызметкерлері дайындаған, бүгінгі таңдағы полиция қызметкерлерінің қиындығы мен қызығы қатар жүретін өмірлерінен сыр шертетін бейне-роликтер тамашаланды. Бөлім қызметкері  Нұрлан Айнабековтың орындауындағы  «Ты знаешь, как хочется жить» атты ән залда жиналғандардың көңілдерін толқытып, көздеріне жас үйірді.

Жиынды Алматы облыстық ІІД ардагерлер кеңесі төрағасының орынбасары Жүсіпов Марат Абдуллаұлы қорытындылады.

Жиын соңы Ә.Сарыбаев атындағы аудандық Мәдениет, әскери гарнизонның офицерлер үйі әншілері мен бишілерінің АІІБ жеке құрамының күшімен дайындаған концерттік бағдарламаға ұласты.

Бүгінгі таңда 10 қараша кәсіби мереке боп есептелмейді. Алайда, облыстық ІІД ардагерлер кеңесі мүшелерінің шешімімен аудандарда  100 жылдық мерекені атап өтуді ұйғарыпты. Өйткені өткен күнде белгі бар. Тарихы тереңде жатқан бұл мерекеде ардагерлер марапатқа емес, бір-бірімен аман-есен қауышқандарына, жүздесіп, әңгімелескендеріне қуанып жатты. Жеке құрам орындарынан тік тұрып, ардагерлерді салтанатты түрде шығарып салды. Олардың барлығы да «елімізде тыныштық болып, бейбіт өмірде осындай жылы жүздесулер көп болса екен» деген ақ тілеу тілеп бара жатты. Лайым солай болғай.

Дина АМАНҚЫЗЫ.