Талдықорған қаласында «Заң мен тәртіп, қауіпсіздік пен жауапкершілік» науқаны аясында ірі кәсіпорындар мен зауыт өкілдерімен кездесу өтті

Талдықорған қаласында «Заң мен тәртіп, қауіпсіздік пен жауапкершілік» науқаны аясында ірі кәсіпорындар мен зауыт өкілдерімен кездесу өтті. Іс-шараны Жетісу облысының прокуратурасы ұйымдастырып, оған қала және облыс деңгейіндегі құқық қорғау, еңбек инспекциясы мен төтенше жағдайлар органдарының өкілдері қатысты.

Кездесудің мақсаты – еңбек ұжымдары арасында заңға мойынсұнатын мінез-құлықты қалыптастыру, құқық бұзушылықтардың, өндірістегі жазатайым оқиғалар мен авариялардың алдын алу, сондай-ақ құқықтық және өндірістік тәртіп деңгейін арттыру.

Жиын барысында қызметкерлердің еңбек құқықтарын қорғау, жалақының уақытылы төленуі, заңсыз жұмыстан босатуға жол бермеу, қауіпсіз еңбек жағдайларын қамтамасыз ету мәселелері кеңінен түсіндірілді. Сонымен қатар кәсіпкерлердің құқықтарын қорғау, негізсіз тексерулерге жол бермеу және мемлекеттік бақылау шараларының заңдылығы туралы айтылды.

Шараға Қазақстан Республикасы Бас прокуратурасы жанындағы Құқықтық статистика және арнайы есепке алу жөніндегі комитеттің облыстық департаменті, ҚР Мемлекеттік еңбек инспекциясы комитетінің облыстық департаменті, Полиция департаменті және Төтенше жағдайлар департаментінің жауапты мамандары қатысты.

Прокуратура органдарының негізгі мақсаты – заңдылықты қамтамасыз ету, азаматтардың конституциялық құқықтарын қорғау және еңбек саласында тұрақтылықты сақтау. Кездесу қорытындысы бойынша түсіндіру жұмыстары алдағы уақытта да тұрақты түрде жалғасатыны атап өтілді.