Ветеринария саласын жаңғыртуға биыл 1 миллиард теңгеге жуық қаражат жұмсалмақ

Облыс аумағында ветеринариялық қауіпсіздікті нығайту және инфрақұрылымды дамыту мақсатында биыл 16 жаңа блокты-модульді пункт, 4 ветеринариялық станция мен 10 мал қорымын салу жоспарланып отыр. Бұл мақсаттарға бюджеттен 845 миллион теңгеден астам қаражат қарастырылған.
Сонымен қатар, биылғы жылдың 1 сәуіріне дейін өңірдегі 129 сібір жарасы көміндісінің қоршауларын бетонға ауыстыру жұмыстары толық аяқталады. Бүгінгі таңда 65 нысан бетонмен қоршалып үлгерді, қалған 64 нысан бойынша жұмыстар қарқынды жүруде.
Инфрақұрылымдық дамумен қатар, биыл жануарлардың аса қауіпті ауруларының алдын алу үшін 11,8 миллион манипуляция жасау көзделген. Профилактикалық шаралар ақпан айында басталып, қазіргі уақытта мамандар қажетті вакциналардың 46%-мен қамтамасыз етілді. Биылғы жоспарда пастереллез бен қарасан сияқты ауруларға қарсы екпе көлемі 10,9%-ға азайтылды.
Саланы цифрландыру және жабдықтау жұмыстары соңғы екі жылдағы нәтижелер негізінде жалғасуда. 2023-2025 жылдар аралығында өңірде 67 жаңа ветеринариялық нысан салынып, паркі 78 арнайы автокөлікпен толыққан болатын.
Биылғы жоспар бойынша 850 мыңнан астам жаңа туған төлді бірдейлендіру деректер қорына тіркеу жұмыстары да басты басымдықтардың бірі болып қала бермек.