Жетісу облысында ауылдық жерде тағы бір медициналық нысан пайдалануға берілді

Қарғалы ауылында ашылған жаңа фельдшерлік-акушерлік пунктте жедел медициналық көмек, алғашқы медициналық-санитарлық және акушерлік көмек көрсетуге барлық жағдай жасалған. Нысан ана мен баланың денсаулығын қорғауға, аурулардың алдын алуға және халыққа сапалы медициналық қызмет көрсетуге бағытталған. Қарғалы ауылдық ФАП-та барлығы 5 адам жұмыс істейді, оның ішінде орта буынның 3 медицина қызметкері бар.

Ауыл тұрғындары жаңа медициналық нысанға және онда жасалған жағдайларға дән риза.

– Көп жыл бойы бізге медициналық көмек ескі ғимаратта көрсетіліп келді. Заманауи талаптарға сай келмейтін, бейімделмеген ғимаратта қызмет алу біз, ауыл тұрғындары үшін де, медицина қызметкерлері үшін де белгілі бір қиындықтар туғызды. Соған қарамастан, олар өз міндеттерін адал атқарды, өйткені денсаулық – адам өміріндегі ең басты байлық. Сондықтан жаңа медициналық нысан – бұл жай ғана ғимарат емес, ауыл тұрғындарының әл-ауқаты мен болашағына көрсетілген нақты қамқорлықтың белгісі. Жаңа медициналық пункт халық денсаулығын нығайтуға өз үлесін қосады деп сенемін, – деді жергілікті тұрғын Амангелді Сейсенұлы.

Қызыл лента қиылып, жаңа нысанның жұмысы ресми түрде басталды. Содан кейін барлық қонақтар ғимараттың ішкі жабдықтарымен танысу мүмкіндігіне ие болды.

Айта кету керек, бұл – жыл басынан бері Сарқан ауданында пайдалануға берілген осындай екінші нысан. Бұған дейін М. Төлебаев ауылында фельдшерлік-акушерлік пункт ашылған болатын.

Еске сала кетейік, Жетісу облысында «Ауылдық денсаулық сақтауды жаңғырту» ұлттық жобасы аясында барлығы 59 нысан салынды. Атап айтқанда, 2023–2025 жылдар аралығында 15 дәрігерлік амбулатория, 39 фельдшерлік-акушерлік пункт және 5 медициналық пункттің құрылысы аяқталды.