Жетісу облысындағы су шаруашылығы: жаңа инфрақұрылымдық жобалар мен заманауи технологиялар
Жетісу облысында 2024–2028 жылдарға арналған су шаруашылығын дамыту жөніндегі Кешенді жоспарға сәйкес су шаруашылығындағы 37 нысанды қайта жаңғырту және жөндеу жобалары іске асырылады. Аталған жобалардың нәтижесінде шамамен 80 мың гектар суармалы жердің сумен қамтылуы жақсарып, қосымша 3,2 мың гектар жаңа жер айналымға енгізіледі. Нәтижесінде суару каналдарындағы судың шығыны 35 пайызға дейін азаяды. Сонымен қатар, ағымдағы жылы су үнемдеу технологиясын енгізуді 79,2 мың гектарға дейін жеткізу жоспарлануда, – деп хабарлайды Жетісу облысы әкімінің баспасөз қызметі.
Атап айтқанда, өңірде су жинау құрылыстарын салу аясында жалпы сыйымдылығы 157 млн текше метрді құрайтын 7 жаңа су қоймасын салу көзделген. Олар «Быжы», «Балықты», «Бүйен», «Қорғас», «Тышқан», «Өсек», «Покатиловка» су қоймалары. Республикалық бюджет есебінен Қызылағаш суару алқабын салу жұмыстары жүргізілуде, нысанды 2026 жылдың соңына дейін аяқтау жоспарланған. Бұдан бөлек, су жинау құрылыстарын қайта жаңғырту шеңберінде 11 жобаны іске асыру жоспарланып отыр.
Суару желілерін қайта жаңғырту бағытында да 11 жоба қарастырылған. Бүгінгі таңда Ақсу, Көксу аудандарында және Талдықорған қаласында 3 суару жүйесін қайта жаңғырту жұмыстары жүргізілуде. Сонымен қатар Қаратал және Ескелді аудандарындағы «Үштөбе» және «Бәйбіше» магистральдық арналарына реконструкция және жөндеу жұмыстары атқарылуда.
Заманауи су үнемдеу технологияларын енгізу мәселесі де назардан тыс қалмай отыр.
«Өткен жылы Жетісу облысында ылғал үнемдеу технологиялары 33,7 мың гектар аумақта енгізілді. Оның ішінде 13,2 мың гектарда – тамшылатып суару, 20,5 мың гектарда – жаңбырлатып суару әдістері қолданылды. Ал биыл заманауи суару технологияларын 79,2 мың гектарға енгізу жоспарланып отыр. Сонымен қатар су үнемдеу технологияларының қолжетімділігін арттыру мақсатында «Талдықорған» индустриялық аймағында жылына 110 дана жаңбырлату қондырғысын өндіретін кәсіпорынның құрылысы жалғасуда. Бұдан бөлек, өңірде арзан әрі қолдануға ыңғайлы дискретті суару әдісі 4,8 мың гектар аумақта енгізіліп, бұл суармалы суды 30 пайызға дейін үнемдеуге мүмкіндік береді», – деп атап өтті облыстық ауыл шаруашылығы басқармасында.
Инвестициялар және инфрақұрылым: Премьер-министр Мемлекет басшысының тапсырмалары аясында Алатау қаласын дамыту жөніндегі кеңес отырысын өткізді
Жиында инвестициялық жобалардың орындалу барысы, инфрақұрылымдық қамтамасыз ету бойынша жұ…
