«QazTalks»- ашық әңгіме алаңы

ҚР Ақпарат және коммуникациялар министрлігінің Орталық коммуникациялар қызметі мен Алматы облысының ішкі саясат басқармасы «QazTalks – ашық әңгіме алаңы» атты жаңа мемлекеттік тілде өткен жобаны алғаш рет өңірлердің ішінде Алматы облысында ұйымдастырды.Өткізіліп отырған бейресми баспасөз шарасына облысымызға танымал адамдар, БАҚ өкілдері, түрлі саланың өкілдері, аудандардың ішкі саясат, мәдениет, білім, кәсіпкерлік бөлімінің басшылары қатысып отырды. Талдықорған қаласындағы Оқушылар Сарайының мәжіліс залында өткен, ҚР Президенті Н. Ә. Назарбаевтың «Болашаққа бағдар: рухани жаңғыру» атты мақаласында көрсетілген міндеттердің іске асырылуы бойынша және қазақстандық ақпараттық кеңістіктегі жаңа коммуникациялар туралы өз тәжірибелері, пікірлері және идеяларымен бөліскен іс-шараға, спикер ретінде еліміздің танымал тұлғалары, атап айтсақ, белгілі саясаттанушы Саясат Нұрбек, Қазақстан Республикасы Мәдениет және спорт министрлігі «Қазақстан Республикасының Ұлттық Музейі» РМКК жанындағы «Сакралды Қазақстан» ғылыми-зерттеу орталығы директоры Берік Әбдіғали, А.Байтұрсынұлы атындағы Тіл білімі институтының директоры Қажыбеков Ерден және белгілі қазақстандық тілші, Алматы облыстық «Жетісу» телеарнасының бас директоры, жүргізуші Бейсен Құранбек және «Жаңалықтар» қызметінің жетекшісі Есболат Айдабосын қатысты.
Сахна төріне алғашқылардың бірі болып шыққан «Орталық коммуникациялар қызметі» РММ директоры Артур Нығметов өз сөзінде «QazTalks- ашық әңгіме алаңы» ҚР Президенті Н.Ә.Назарбаевтың «Болашаққа бағдар:рухани жаңғыру» атты мақаласында көрсетілген бірқатар идеяларды жүзеге асыруға арналған жиын екенін және өңірлерде бірінші болып осы Алматы облысында өтіп отырғандығын айта отырып, Орталық коммуникациялар қызметінің мемлекеттің ақпараттық саясатын дұрыс бағытта жүргізетін іс-шаралар туралы айтып өтті. Келесі кезекте спикерлерге сөз берілді. Өздеріне берілген 20 минутты тиімді пайдаланған «Астана» халықаралық қаржы орталығының атқарушы директоры Нұрбек Саясат, «Сакралды Қазақстан» ғылыми зерттеу орталығының басшысы Берік Әбдіғали ойларын ортаға салып, пікір бөлісті. ҚР ҰҒА корреспондент мүшесі А.Байтұрсынұлы атындағы Тіл білімі институтының директоры Ерден Қажыбек латын қарпіне көшу туралы өз ойымен бөлісті. 1926 жылдары құрамында Т.Рысқұлов, Б.Майлин, Ж.Чомбалов сынды тіл жанашырлары болған Қазақстанда жаңа әліпбишілер қоғамы құрылып, жұмыс істей бастайды. Қызылордада «Жаңа қазақ» әліпби орталығы құрылады. Алайда, солшыл саясаттың кесірінен бастама аяқсыз қалғандығы туралы жеткізе білген спикер латын әрпіне көшудің пайдасы туралы айтып өтті.Танымал журналист, жерлесіміз Бейсен Құранбектің ұлы Абайдың ұрпағы туралы айтқан деректері іс-шараға қатысып отырған талайды ойландырып тастағаны анық. «Жаңалықтар» қызметінің жетекшісі Есболат Айдабосын әр облыс өзінің өзге облыстарда жүрген мықты, талантты ұл-қыздарын өз туған жерлеріне шақырып, жағдайларын жасаса, олардың қызметінің пайдасы да зор болып, берерлері де көп болар еді деген ойларын нақты мысалдармен келтіре отырып, ақпараттық кеңістіктегі жаңа коммуникациялар туралы өз тәжірибе – идеяларымен бөлісті
Өз тілшіміз.