Денсаулық — зор байлық

Жуырда Малайсары ауылы «integra Construction KZ» ЖШС Жоламан қиыршықтас зауытында «Нұр Отан» партиясы  аудандық филиалы төрағасының бірінші орынбасары Бозымбеков Жомарт Саханұлы, аудандық  орталық аурухананың хирург дәрігері, спикері Сматов Данияр Оралбайұлы міндетті әлеуметтік медицина сақтандыру жүйесі туралы  зауыттың ұжымы мен ауыл халқына  түсінік берді. Сөз бастаған Данияр Оралбайұлы:
— Бұл  медициналық жүйеде әрбір науқастанған қазақстандық көрсетілген медициналық көмек қорына жиналған қаржы арқылы толығымен емделе алады, ол үшін әр адам міндетті түрде тіркеуге тұруы тиіс. Міндетті әлеуметтік  медициналық сақтандыру жүйесі мемлекеттің жұмыспен қамтушының және жұмыс берушілер  мен өзін- өзі еңбекпен  қамтыған азаматтардың міндетті сақтандыру төлемдерінен құрылатын болады. Бұл ретте жұмыс берушілер мен өз жұмысшылары үшін еңбекақы қорынан бес пайыз, жұмысшылар екі пайыз, өзін-өзі  еңбекпен қамтамасыз етушілер көрсетілген табысынан жеті пайыз жарна төлейтін болады. Кез-келген  азаматтың қай жерде тіркелгеніне қарамастан Қазақстан Республикасының бүкіл аумағында медициналық қызмет көрсетіледі. Бұл жүйенің  енгеніне көп болмаса да, тіркеуге тұрушылардың саны аз емес. Мұндай сақтандыру жүйесі дамыған мемлекеттердің барлығында дерлік бар. Сондықтан қатардан қалмай, бір ауыздан қолдап, тіркеуге тұрып, болашағымызды ойлап, денсаулығымызға үлкен мән берейік, —  деді.
Сөз тізгінін алған Жоламан қиыршықтас зауытының басшысы Тілеухан Удербаев  тіркеуге тұру, денсаулықты сақтаудың керек екенін, бұл қозғалған мәселелердің бәрі міндетті түрде қолға алынып, орындалатынын жеткізді. Жиналысты қорытындылаған Жомарт Саханұлы жүйенің заманға сай, мемлекет тарапынан көрсетілген үлкен көмек екенін айтып, келген қонақтармен жұмысшыларға алғысын айтты. Жұмысшылар тарапынан сұрақтар қойылып, толықтай жауаптар алынды.
Дидар Асқарұлы.